ފޯ ނޭޝަންސް ކަޕް ވޮލީބޯޅަ މުބާރާތުގެ އަންހެން ޑިވިޝަނުގައި މެލޭޝިއާ އިން ފަސް ސެޓު ކުޅެގެން 3-2 އިން ރާއްޖެ ބަލިކޮށްފި އެވެ.
މެޗުގެ ފުރަތަމަ ސެޓު މެލޭޝިއާ އިން ގެންގޮސްފައި ވަނިކޮށް ރާއްޖޭން ދެން ކުޅުނު ދެ ސެޓު ގެންގޮސް، ލީޑުނެގި އެވެ. އެކަމަކު، މެލޭޝިއާ އިން ވަނީ އޭގެ ފަހުން، ކުޅުނު ތިން ސެޓު ކާމިޔާބުކޮށް މެޗުން މޮޅުވެފަ އެވެ. މެޗުގެ ސެޓުތައް ދިޔައީ 25-20، 22-25، 23-25، 25-21 އަދި 16-14 އިންނެވެ.
ޒުވާނުންގެ މަރުކަޒު އެތެރެ ކޯޓުގައި މިއަދު ހަވީރު ކުޅުނު މެޗު ފަށައިގެން ފުރަތަމަ ސެޓުގައި، މެލޭޝިއާ އިން ދިޔައީ ލީޑަކާ އެކު ކުޅެމުންނެވެ. އެ ގޮތުން ސެޓުގެ ކުރީކޮޅުގައި ހަތަރު ޕޮއިންޓުގެ ލީޑެއް ނެގިއިރު، ދެ ފަހަރެއްގެ މަތިން ރާއްޖޭން އެ ލީޑު އެއް ޕޮއިންޓަށް ކުޑަކުރި އެވެ.
ރާއްޖޭގެ އެޓޭކްތަކުގައި ކެޕްޓަން ހައްވާ ރާޝިދާ (ހައްވަ) އާއި އައިމިނަތު ޝަހާ ޝާމިން އަށް ޕޮއިންޓް ސްކޯ ކުރެވުނަސް، މެލޭޝިއާ އިން ދިޔައީ މެދުތެރެއިން އެޓޭކްކޮށް، ޕޮއިންޓް ހޯދައި، ލީޑު ދަމަހައްޓަމުންނެވެ. ދެ ފަހަރެއްގެ މަތިން ޓައިމް އައުޓް ނަގައިގެން ރާއްޖެ ޓީމުގެ ހާލަތު ރަނގަޅު ކުރެވޭތޯ ބެލި ނަމަވެސް މެލޭޝިއާ އިން ވަނީ 25-20 އިން ފުރަތަމަ ސެޓު ގެންގޮސްފަ އެވެ.
މެލޭޝިއާގެ ކުޅުންތެރިއަކު ޖަހާ ޝޮޓެއް ބްލޮކްކުރަން ރާއްޖޭގެ ޖޫޒާން މަސައްކަތް ކުރަނީ.--- ފޮޓޯ: މުހައްމަދު ޝާބިން/ އަދަދު
ދެ ވަނަ ސެޓު ފަށައިގެން، ރާއްޖޭން ކުޅުން ރަނގަޅުކުރި އެެވެ. މި ސެޓު ފަށައިގެން، ރާއްޖޭގެ އައިޝަތު މާޖިދާގެ ކުޅުން ރަނގަޅުވެ، ދެ ޕޮއިންޓުގެ ލީޑެއް ނެގި އެވެ. މި ސެޓުގެ ކުރީކޮޅުގައި މެލޭޝިއާ އިން ވެސް ލީޑުނެގި ނަމަވެސް އެއް ފެންވަރެއްގައި ކުޅުން ދެމެހެއްޓޭގޮތް ނުވީ ރާއްޖޭން ރިސީވް ރަނގަޅު ކުރުމުންނެވެ.
ރާއްޖޭގެ މާޖިދާ އާއި ސެޓަރު، ޖޫޒާން ޒަރީރުގެ ކުޅުން ދެ ވަނަ ސެޓުގައި ރަނގަޅުވުމުގެ އަސަރު މުޅި ޓީމުން ފެނުނުއިރު، ކެޕްޓަން، ހައްވަ ވެސް ރަނގަޅު އެޓޭކްތަކެއް ކޮށް، ޕޮއިންޓް ސްކޯކުރި އެވެ. އޭގެ އިތުރުން، ބަދަލުގައި ރާއްޖޭން ކުޅެން އެރުވި، ހައްވާ ނާޒިމާ އާއި ފާތިމަތު ސަމްހާ ވެސް ރަނގަޅު ކުޅުމެއް ދައްކައި ޓީމުގެ ފޯމު ދެމެހެއްޓި އެވެ.
ރާއްޖޭން، ދެ ވަނަ ސެޓުގައި ހަތަރު ޕޮއިންޓުގެ ލީޑެއްގައި އޮއްވައި، ސެޓުގެ ފަހުކޮޅުގައި މެލޭޝިއާ އިން ފަރަގުކުޑަކުރި އެވެ. އެކަމަކު، ރަނގަޅު ވަގުތުގައި ރާއްޖޭގެ ކޯޗު ނިޒާރު އިބްރާހިމް (ބޮޑޭ) ވަނީ ޓައިމްއައުޓެއް ނަގައި، ޓީމު ހަމަޔަކަށް އަޅުވައި، 22-25 އިން ސެޓު ގެންދިއުމަށް މަގުފަހިކޮށްދީފަ އެވެ.
ރާއްޖޭގެ މާޖިދާ (ކ) އާއި ސިލްމާ ޕޮއިންޓެއް ސްކޯކުރުމަށް ފަހު އުފާފާޅުކުރަނީ.--- ފޮޓޯ: މުހައްމަދު ޝާބިން/ އަދަދު
ތިން ވަނަ ސެޓު ފަށައިގެން، ރާއްޖޭން ލީޑެއްނެގި ނަމަވެސް މި ސެޓުގެ މެދަކާ ހަމައިން ރާއްޖޭގެ ރިސީވް ދަށްވެ، މެލޭޝިއާ އިން އަލުން ލީޑުނެގި އެވެ. އެކަމަކު، ސެޓުގެ ފަހުކޮޅުގައި ރާއްޖޭން ކުޅުން ރަނގަޅުކޮށް، އެޓޭކްތައް ވިސްނުންތެރިކަމާ އެކު ކުރަމުންދިއުމުގެ ނަތީޖާ އަކަށްވީ އަލުން ލީޑު އަނބުރާ ލިބުމެވެ. ރަނގަޅު ވަގުތުގައި މާޖިދާ އާއި ޝަހާ އަދި ހައްވަ ސްކޯކުރި، ޕޮއިންޓްތަކާ އެކު ރާއްޖޭން ތިން ވަނަ ސެޓު، 23-25 އިން ގެންގޮސް ލީޑެއްނެގި އެވެ.
ރާއްޖެ އަށް ހަތަރު ވަނަ ސެޓުގައި ޑިފެންސްގައި ގިނަ ގޯސްތަކެއް ހެދުމުގެ ނަތީޖާ އަކަށްވީ އެ ބޯޅަތަކުގެ ފައިދާނަގައި މެލޭޝިއާ އިން މި ސެޓު، 25-21 އިން ގެންގޮސް ނަތީޖާ ނެރޭ ސެޓެއް ކުޅެން ޖެހުމެވެ. ނަތީޖާ ނެރެން ކުޅުނު ސެޓުގައި، ދެ ޓީމުގެ ފަރާތުން ވެސް ފޯރިގަދަ ކުުޅުމެއް ފެނިގެންދިޔައިރު، މި ސެޓުގައި ދެ ޓީމަށް ވެސް ލީޑުހިފަހައްޓައިނުލެވުނެވެ. ފަހު ވަގުތު މެލޭޝިއާ އިން ކުރި ހިތްވަރާ އެކު އެ ޓީމުން، 16-14 އިން ސެޓު ގެންގޮސް މެޗުން މޮޅުވީ އެވެ.
ފޯ ނޭޝަންސް ކަޕްގައި މުބާރާތުގައި މިރޭ ކުޅޭ މެޗުގައި ރާއްޖޭގެ ފިރިހެން ޓީމު ކުޅޭނީ މެލޭޝިއާ ޓީމާ ދެކޮޅަށެވެ.
ރާއްޖޭގެ އަންހެން ޓީމު ކުޅޭ ދެ ވަނަ މެޗުގައި މާދަމާ ހަވީރު ބައްދަލުކުރާނީ ސިންގަޕޫރާ އެވެ. މެޗު ފަށާނީ 16:30 ގަ އެވެ.
