ރާއްޖޭން 2017 ވަނަ އަހަރު އެފްއައިވީބީ ކޮލިފައިން މުބާރާތް ހޯސްޓްކުރިއިރު، އޭރު އައިމިނަތު ޝަހާ ޝާމިން ޓީމަކު ނުހިމެނެ އެވެ. އެކަމަކު، އޭގެ ހަ އަހަރު ފަހުން، މިއަދު ރާއްޖޭގައި ފޯ ނޭޝަންސް ކަޕްގެ ނަމުގައި އިންޓަނޭޝަނަލް މުބާރާތެއް ހޯސްޓްކުރާއިރު، ޝަހާ ވަނީ މިދިޔަ އަހަރުތަކުގައި ސީނިއާ ޓީމުގައި ހިމެނިގެން މުބާރާތްތަކެއް ކުޅެ، މުހިންމު ތަޖުރިބާތަކާއި ކާމިޔާބީ ވެސް ހާސިލްކޮށްފަ އެވެ.
މި ފަހަރުގެ މި ފޯ ނޭޝަންސް ކަޕަކީ އަމިއްލަ ގައުމުގައި ޝަހާ ކުޅޭނެ ފުރަތަމަ ބައިނަލްއަގުވާމީ މުބާރާތް ކަމަށްވާއިރު، އޭނާ ހުރީ މި މުބާރާތުން ވެސް ހާއްސަ ކާމިޔާބީއެއްގެ އުންމީދަކާ އެކު އެވެ.
ރާއްޖޭގެ އެންމެ އުންމީދީ އަންހެން ވޮލީބޯޅަ ކުޅުންތެރިޔާގެ މަގާމު، 2019 ވަނަ އަހަރު ހޯދާފައިވާ ޝަހާ އަކީ މިހާރު ޓީމުގެ މުހިންމު ކުޅުންތެރިއެކެވެ.
ނޭޕާލުގައި 2019 ވަނަ އަހަރު ސެންޓްރަލް އޭޝިއަން ވޮލީބޯޅަ އަންހެން މުބާރާތުން ރާއްޖޭން ރިހި މެޑަލް ހޯދި ޓީމުގައި ޝަހާ ކުޅުނުއިރު، އެންމެ ފަހުން ބަންގްލަދޭޝްގައި 2021 ވަނަ އަހަރު ކުރިއަށްދިޔަ ސެންޓްރަލް އޭޝިއަން އަންހެން މުބާރާތުގައި ޓީމުގެ ސީނިއާ ކުޅުންތެރިންގެ ތެރޭގައި ޝަހާ ހިމެނުނެވެ.
އެ ހުރިހާ ތަޖުރިބާ އަކަށް ފަހު، އަމިއްލަ ގައުމުގައި ފުރަތަމަ އިންޓަނޭޝަނަލް މުބާރާތް ކުޅެން ތައްޔާރުވާއިރު، ޝަހާ ހުރީ އުންމީދެއްގަ އެވެ.
"މުބާރާތް އޮތީމަ ވަރަށް އުފާވޭ، މިއީ ޝަހާގެ ފުރަތަމަ އިންޓަނޭޝަނަލް މުބާރާތް ރާއްޖޭގައި ކުޅޭ. ދެން އަޅުގަނޑު ދެކެނީ މިއީ ހުރިހާ ޔަންގް އަރަމުން އަންނަ ވޮލީ ކުޅޭ ހުރިހާ ކުޅުންތެރިންނަށް ވެސް އަސްލު ރަނގަޅު ޗާންސެކޭ ކުޅުން ދައްކަން،" ޝަހާ ބުންޏެވެ.
"މިސާލަކަށް މިއީ ގޯލްޑް އެޅުވޭ ވަރުގެ މުބާރާތެއް ކަމަށް އަޅުގަނޑު އަމިއްލަ އަށް ވެސް ދެކެނީ. އެހެންވީމަ، އެހާ މަސައްކަތް ކުރެވިއްޖިއްޔާމު. ގޯލްޑަން ޗާންސެއް މި އޮތީ ލިބިފައި، ރާއްޖޭގައި މި މުބާރާތް ކުޅެގެން އެކަން ހާސިލްކުރަން،"
ފޯ ނޭޝަންސް ކަޕްގެ އަންހެން ޑިވިޝަންގައި ރާއްޖޭން ކުޅެން ޖެހެނީ ސިންގަޕޫރާއި މެލޭޝިއާއާ އެވެ. ފުރަތަމަ މެޗުގައި މިއަދު ހަވީރު 16:30 ގައި މެލޭޝިއާއާ ކުޅުމަށް ފަހު ދެ ވަނަ މެޗުގައި ސިންގަޕޫރާ ދެކޮޅަށް މާދަމާ ހަވީރު 16:30 ކުޅޭނެ އެވެ.
އަންހެން ޑިވިޝަނުގެ ފޯމެޓް ރޭވިފައިވާ ގޮތަށް ބަލާއިރު، ތިން ޓީމު ކުޅޭ ލީގު ބުރަށް ފަހު އެންމެ ގިނަ ޕޮއިންޓް ހޯދާ ޓީމެއް ފައިނަލަށް ކޮލިފައިވާނެ އެވެ. ފައިނަލުގެ އަނެއް ޖާގަ ލިބޭނީ ދެ ވަނަ އާއި ތިން ވަނަ ބައްދަލުކުރާ ސެމީ ފައިނަލް މެޗުން މޮޅުވާ ޓީމަކަށެވެ.
