ލައިޕްޒިގު (ފެބްރުއަރީ 23) - ޔުއެފާ ޗެމްޕިއަންސް ލީގުގެ ދެ ވަނަ ބުރުގެ ފުރަތަމަ ލެގުގައި އަމިއްލަ ދަނޑުގައި ކުޅުނު ޖަރުމަނުގެ އާރްބީ ލައިޕްޒިގުން 1-1 އިން މެންޗެސްޓާ ސިޓީއާ އެއްވަރުކޮށްފި އެވެ.
މެޗުގެ ބޮޑުބައި ސިޓީން ބޯޅަ ހިފަހަައްޓައިގެން ކުޅުނުއިރު، އެ ޓީމުން ވަނީ 27 ވަނަ މިނިޓްގައި ލީޑުނަގައިފަ އެވެ. މިއީ އިލްކާއި ގުންޑޮގާން ދިން ބޯޅައެއް ހިފައިގެން، ލައިޕްޒިގު އޭރިއާތެރެއަށް ދެމިގަތުމަށް ފަހު ސިޓީގެ ރިޔާދު މާރޭޒް ގޯލުގެ ތިރީ ކަނަށް ބޯޅަ ފޮނުވާލައިގެން ޖެހި ގޯލެކެވެ. މިއީ މި ސީޒަނުގައި މާރޭޒް ޖެހި 12 ވަނަ ގޯލެވެ.
ލައިޕްޒިގުން ކުޅުން ރަނގަޅުކޮށް، ދެ ވަަނަ ހާފް ފަށައިގެން އެޓޭކްތައް ރަނގަޅު ކުުރަން ފެށި އެވެ. އެ ގޮތުން ދެ ވަނަ ހާފުގައި ބަދަލަކަށް އެރި ބެންޖަމިން ހެންރިޗްސް އަށް ރަނގަޅު ދެ ފުރުސަތެއް ލިބިގެންދިޔަ އެވެ. ފުރަތަމަ ފުރުސަތުގައި ބޮލުން ޖެހި ބޯޅަ ހުރަސްދަނޑިމަތިން ދިޔައިރު، ދެން، އޭރިއާތެރެއިން ލިބުނު ބޯޅައަކުން ފޮނުވާލި ހަމަލާ ދިޔައީ ދަނޑިކައިރިން ބޭރުންނެވެ.
އޭގެ ފަހުން، ލައިޕްޒިގުގެ ޕޯޗުގީސް ފޯވާޑް އަންޑްރޭ ސިލްވާ، ސިޓީގެ އޭރިއާތެރެއިން ތަނަވަސްކުރި އެޓޭކެއްގައި ފޮނުވާލި ޝޮޓް ސިޓީގެ ކީޕަރު އެޑަސަން މޮރާއެސް ވަނީ މަތަކޮށްފަ އެވެ.
ނަތީޖާ ހަމަހަމަ ކުރަން ލައިޕްޒިގުން ކުރި މަސައްކަތް ކާމިޔާބުވީ 70 ވަނަ މިނިޓްގަ އެވެ. އެ ގޮތުން، ކޯނަރެއްގައި ތަނަވަސްކުރި ފުރުސަތެއްގައި އޭރިއާތެރެއިން ހުރަސްވި ބޯޅައެއް ލައިޕްޒިގުގެ ކްރޮއޭޝިއާ ޑިފެންޑަރު، ޖޮސްކޯ ގްވާޑިއޯލް ވަނީ ގޯލަށް ފޮނުވާލައިފަ އެވެ.
ސިޓީ ދަނޑުގައި ކުޅޭ ދެ ވަނަ ލެގުގެ މެޗު އޮންނާނީ އަންނަ މަހުގެ 14 ވަނަ ދުވަހުގެ ރޭގަ އެވެ.
