ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2023 ގެ އަތޮޅު ފައިނަލްތަކުން ފ. މަގޫދޫ، ފ. ނިލަންދޫ، އއ. ބޮޑުފޮޅުދޫ، ބ. އޭދަފުށި އަދި ބ. ފެެހެންދޫން ޖާގަ ހޯދައިފި އެވެ.
މަގޫދޫން ވަނީ ނިލަންދޫ އަތުން މިރޭ 1-0 އިން މޮޅުވެފަ އެވެ. ފ. އަތޮޅު އަނެއް މެޗުން ބިލެތްދޫން ވަނީ 2-1 އިން ދަރަނބޫދޫ އަތުން މޮޅުވެފަ އެވެ. ފ. ފައިނަލުގައި މަގޫދޫ ކުޅޭނީ ނިލަންދޫއާ އެވެ.
އއ. ބޮޑުފޮޅުދޫ އަށް އެއްވަރުކޮށްލައިގެން ވެސް ފައިނަލަށް ދެވެން އޮތްއިރު، އެ ޓީމުން ވަނީ ފޯރިގަދަ މެޗަކަށް ފަހު، 3-2 އިން ރަސްދޫ ބަލިކޮށްފަ އެވެ. އެ އަތޮޅު އަނެއް މެޗުން މިރޭ ތޮއްޑޫން ވަނީ ފެރިދޫ އަތުން 6-1 އިން މޮޅުވެފަ އެވެ. އއ. ފައިނަލުގައި އެންމެ ފަހުގެ ޗެމްޕިއަން، މަތިވެރިން ބައްދަލުކުރާނީ ބޮޑުފޮޅުދޫއާ އެވެ.
ބ. އަތޮޅުގައި މިރޭ ފޯރިގަދަ މެޗަކަށް ފަހު، ހަމްދާން އަބްދުއްސައްތާރުގެ ހަމައެކަނި ގޯލުން އޭދަފުށި ވަނީ 1-0 އިން ތުޅާދޫ ބަލިކޮށްފަ އެވެ. އެ އަތޮޅުގެ އަނެއް މެޗުން ކެންދޫއާ ކުޅެގެން ފެހެންދޫ ވަނީ 0-0 އިން އެއްވަރުވެފަ އެވެ. ބ. އަތޮޅު ފައިނަލުގައި ކުޅޭނީ ފެހެންދޫ އާއި އޭދަފުށްޓެވެ. ލީގު ބުރުގައި މި ދެ ޓީމު ވަނީ އެއްވަރުވެފަ އެވެ.
އިނގުރައިދޫގެ އަލީ ހާފިޒް (ކ) ދުވާފަެރުގެ ޖުމާން މުހައްމަދު ކައިރިން ބޯޅަ ހިފައިގެންދަނީ.--- ފޮޓޯ: މުހައްމަދު ޝާބިން/ އަދަދު
ރ. އަތޮޅު ފައިނަލުން ފުރުސަތު ހޯދާފައިވާ އިނގުރައިދޫ އާއި ދުވާފަރުގެ މެޗުން އިނގުރައިދޫ ވަނީ ތަފާތު ބޮޑުކޮށް، 5-1 އިން މޮޅުވެފަ އެވެ. އެ އަތޮޅު އަނެއް މެޗުން އަލިފުށިން ވަނީ 5-1 އިން ރ. މީދޫ ބަލިކޮށްފަ އެވެ.
ރެހެންދި ފުޓްސަލް ދަނޑުގައި މިރޭ ކުޅުނު މެޗުގައި ނިލަންދޫ ކޮޅަށް މަގޫދުން ޖެހި ހަމައެކަނި ގޯލު މެޗުގެ ދެ ވަނަ ހާފުގައި ކާމިޔާބުކުރީ މޫސާ އައްސަދު އަންވަރު އެވެ. ހުސްކޮށް އެރި ބޯޅައެއް އޭނާ ވަނީ ރަނގަޅަށް ނިންމައިލައިފަ އެވެ.
ބިލެތްދޫގެ މުހައްމަދު ޒީދާން ޒުހުރީ ވަނީ ދަރަނބޫދޫ ކޮޅަށް ދެ ގޯލު ޖަހައިފަ އެވެ. ދަރަނބޫދޫގެ ހަމައެކަނި ގޯލު ޖެހީ އަހުމަދު ރިފާއު އެވެ.
އިނގުރައިދޫން ދުވާފަރު ކޮޅަށް ގޯލުތައް ޖެހީ އަހުމަދު އައިހަމް (އައިހު) ދެ ގޯލާއި މުހައްމަދު މަމްދޫހު، އަލީ ހާފިޒް އަދި އަހުމަދު މަޝީދު ކޮންމެ ކުޅުންތެރިއަކު ގޯލެކެވެ. ދުވާފަރުގެ ހަމައެކަނި ގޯލު މުހައްމަދު ޖުމާން އަހުމަދު ޖެހިއިރު، އޭނާ ފޮނުވާލި ޕެނަލްޓީއެއް އިނގުރައިދޫ ކީޕަރު އަހުމަދު އިހުސާން ވަނީ މަތަކޮށްފަ އެވެ.
ނިލަންދޫގެ ކެޕްޓަން ފާރޫގު (ވ) މަގޫދޫ ކުޅުންތެރިއަކު ކައިރިން ބޯޅަ ހިފައިގެންދަނީ.--- ފޮޓޯ: މުހައްމަދު ޝާބިން/ އަދަދު
އަލިފުށިން މީދޫ ބަލިކުރިިއިރު، އަލިފުށީގެ ލަނޑުތައް ޖެހީ އަހުމަދު ހުސާމް ހެޓްރިކަކާއި އަހުމަދު އިމްރާން ލައިޒަނަން މުހައްމަދު އެވެ. މީދޫގެ ހަމަައެކަނި ލަނޑު ޖެހީ ރަޝާދު އަބްދުލް މަތީން އެވެ.
މިރޭ ފެރިދޫ ކޮޅަށް ތޮއްޑޫން ލަނޑުތައް ޖެހީ އަލީ މަނާލް މުސްތަފާ ދެ ގޯލާއި އިބްރާހިމް ސުހާން މުހައްމަދު، އަހުމަދު ޝަމީމް، އާދަމް ހުފާފު، މުހައްމަދު ޝަފީއު ނަސްރުﷲ ގޯލެކެވެ. ފެރިދޫގެ ހަމައެކަނި ގޯލު ޖެހީ ހުސެއިން ހިޝާމް އަބްދުﷲ އެވެ. ބޮޑުފޮޅުދޫން ގޯލުތައް ޖެހީ ޓީމުގެ ކެޕްޓަން، އަހުމަދު ރިޔުޝާން އާއި އަލީ ޝަނީޒްގެ އިތުރުން ރަސްދޫ ކުޅުންތެރިއަކު އަތުން ބައިކޮޅަށް ވަން ގޯލެކެވެ.
