ނޭޕްލްސް (ފެބްރުއަރީ 21) - ނަޕޯލީ އަށް ކުޅެމުން އަންނަ ޖޯޖިއާގެ ވިންގް، ކްވިޗާ ކްވަރަޝްކޭލިއާ 100 މިލިއަން ޑޮލަރަށް ވެސް ނުވިއްކާނެ ކަމަށް އެ ޓީމުގެ ރައީސް އައުރޭލިއަން ޑީ ލައުރެންޓީސް ވިދާޅުވެއްޖެ އެވެ.
ޖޯޖިއާގެ ޑިނަމޯ ބަޓޫމީ ދޫކޮށް 10 މިލިއަން ޑޮލަރުގެ އަގަކަށް މިދިޔަ ޖުލައި މަހު ނަޕޯލީ އަށް ބަދަލުވި ކްވަރަޝްކޭލިއާގެ ޑިމާންޑް މިހާރު ބޮޑުވެފައިވަނީ މި ސީޒަނުގައި އެ ޓީމުގައި ދައްކަމުން އަންނަ ތަފާތު މޮޅު ކުޅުމުގެ ސަބަބުންނެވެ. ނަޕޯލީން އިޓާލިއަން ލީގުގެ ކުރީގައި އޮތްއިރު، ޗެމްޕިއަންސް ލީގުގެ ނޮކައުޓް ބުރާ ހަމައަށް ދިއުމުގައި ކްވަރަޝްކޭލިއާގެ ދައުރު ބޮޑެވެ. ކްވަރަޝްކޭލިއާ، މި ސީޒަނުގައި މިހާތަނަށް 24 މެޗުން 12 ގޯލު ޖަހައި، 14 ގޯލު ޖަހަން ވަނީ ފުރުސަތު ތަނަވަސްކޮށްދީފަ އެވެ.
ކުރިން ރަޝިއާގެ ރުބިން ކަޒާން އަށް ވެސް ކުޅުނު ކްވަރަޝްކޭލިއާ ގަންނަން ސްޕެއިންގެ ރެއާލް މެޑްރިޑާއި އިންގްލެންޑްގެ މެންޗެސްޓާ ސިޓީ އަދި ނިއުކާސަލް ޔުނައިޓެޑުން ވެސް މަސައްކަތް ކުރަމުން އަންނަ ކަމަށް މީޑިއާ ރިޕޯޓްތައް ބުނެ އެވެ.
ކްވަރަޝްކޭލިއާގެ ޓްރާންސްފާ ވާހަކަތައް މީޑިއާގައި ދެކެވޭ މިންވަރު އިތުރުވަމުން އަންނައިރު، ދާދި ފަހުން އިޓަލީގެ ނޫހަކަށް ޑި ލައުރެންޓީސް ދެއްވި އިންޓަވިއުއެއްގައި ވިދާޅުވީ ނަޕޯލީން ދާން ބޭނުންވާ މިސްރާބަށް ވާސިލްވާން ކްރަވަޝްކޭލިއާ އާއި ނައިޖީރިއާގެ ފޯވާޑް ވިކްޓަ އޮސީމެން އަކީ މުހިންމު ކުޅުންތެރިން ކަމަށެވެ. މީގެ ތެރެއިން ކްވަރަޝްކޭލިއާ އަކީ އަގުހެޔޮކޮށް ނަޕޯލީން ގަތް ކުޅުންތެރިއެއް ނަމަވެސް މިހާރު ޑިމާންޑް ބޮޑުވެފައިވާ ކުޅުންތެރިއެކެވެ.
"ކްވިޗާ (ކްވަރަޝްކޭލިއާ) އަކީ ވިއްކާ ކުޅުންތެރިއެއް ނޫން. ބަޔަކު ހީކޮށްފާނެ 100 މިލިއަން ޑޮލަރު ދީގެން މި ޑީލް ނިމިދާނެ ކަމަށް. އެކަމަކު، އެހެނެއް ނުވާނެ. އެ އަގަށް ވެސް މަޝްވަރާ ނުކުރާ ގޮތަށް މި ތިބީ،" ޑި ލައުރެންޓީސް ވިދާޅުވި އެވެ.
ނަޕޯލީ މި ވަގުތު އިޓާލިއަން ލީގުގެ ކުރީގައި އޮތީ 15 ޕޮއިންޓުގެ ލީޑަކާ އެކު އެވެ. އެ ޓީމުން މަސައްކަތް ކުރަމުން އަންނަނީ 1990 ވަނަ އަހަރަށް ފަހު ފުރަތަމަ ފަހަރަށް އިޓާލިއަން ލީގު ކާމިޔާބު ކުރުމަށެވެ.
ޗެމްޕިއަންސް ލީގުގެ ގަދަ 16 ބުރުގައި މިރޭ ނަޕޯލީން ޖަރުމަނުގެ އައިންޓްރަކް ފްރޭންކްފާޓާ ދެކޮޅަށް އެ ޓީމުގެ ދަނޑުގައި ކުޅޭނެ އެވެ.
