އަންނަ ބުރާސްފަތި ދުވަހު މާލޭގައި ފަށާ ފޯ ނޭޝަންސް ވޮލީބޯޅަ މުބާރާތަށް ނުކުންނައިރު، ފާއިތުވި އަހަރެއްހާ ދުވަސްތެރޭ ޓީމާ އެކު ކުރެވުނު މަސައްކަތުން ހާސިލްކުރެވުނު އެންމެ ބޮޑު ކަމަކީ ކާމިޔާބު ހޯދަން ކަންކަން ކުރަންޖެހޭ މިންވަރު ދެނެގަންނަން ޓީމު ދަސްވުން ކަމަށް ގައުމީ ފިރިހެން ވޮލީ ޓީމުގެ ކޯޗު، ބްރެޒިލްގެ ސާޖިއޯ ވެލޯސޯ ބުނެފި އެވެ.
މިދިޔަ އަހަރު މާޗް މަހު ގައުމީ ފިރިހެން ޓީމުގެ ކޯޗުކަމާ ވެލޯސޯ ހަވާލުވި ނަމަވެސް މިހާތަނަށް ރަސްމީ މެޗަކަށް ޓީމާ އެކު ނުކުމެފައި ނުވެ އެވެ. ވެލޯސޯގެ ކޯޗުކަމުގައި ގައުމީ ޓީމުން މިދިޔަ އަހަރުގެ ސެންޓްރަލް އޭޝިއަން ޒޯން (ކާވާ) ޗެލެންޖް ކަޕާއި އޭޝިއަން ގޭމްސްގައި ކުޅެން އޮތެވެ.
އޭޝިއަން ގޭމްސް މި އަހަރަށް ފަސްކުރިއިރު، ޗެލެންޖް ކަޕް ވީ ކެންސަލް އެވެ.
އެހެންވެ، ވެލޯސޯ އަށް ޓީމު ގޮވައިގެން މިހާތަނަށް ބައިނަލްއަގުވާމީ އެއްވެސް ލެވަލެއްގައި މެޗުތަކެއް ކުޅެވިފައިވަނީ މިދިޔަ އޮކްޓޫބަރު/ނޮވެމްބަރު ގައި ސައުދީ އަަރަބިއްޔާގައި ކުރިއަށްދިޔަ ޓްރެއިނިން ކޭމްޕާއި މި މަހު ތައިލެންޑްގައި ބޭއްވި ޓްރެއިނިން ކޭމްޕްގަ އެވެ.
ދެ ކޭމްޕްގައި ވެސް ގިނަ މެޗުތަކެއް ކުޅެ، މޮޅުތަކެއް ހާސިލްކުރިއިރު، ވެލޯސޯ ވަނީ ޓީމުގެ ގިނަ ކުޅުންތެރިންނަށް ފުރުސަތު ދީފަ އެވެ.
ފޯ ނޭޝަންސް ކަޕްގައި ވާދަކޮށް، ރަސްމީކޮށް ފުރަތަމަ ފަހަރަށް ޓީމަށް މެޗެއްގައި އިރުޝާދުދޭން ނުކުންނައިރު، ވެލޯސޯ ހުރީ އިތުބާރާ އެކުގަ އެވެ.
"ޓީމާ އެކު އެއް އަހަރު މިވީ. އަހަރެމެންނަށް މިދިޔަ އަހަރު މައްސަލަތަކެއް ދިމާވީ މުބާރާތްތަކެއް ނުކުޅެވުނީމަ. ބައެއް މުބާރާތްތަކުގެ ތާރީހަށް ބަދަލު އައީ. އަނެއް މުބާރާތްތައް ކެންސަލް މިވީ. އަހަރެން ހައިރާންވި ކަމަކީ އެ ހުރިހާ ކަމެއް ދިމާވިއިރު ވެސް ކުޅުންތެރިން ދިޔައީ ވަރަށް ބުރަކޮށް މަސައްކަތް ކުރަމުން. އެއްވެސް ވަރަކަށް ދުލެއް ނުދޭ. އަހަންނަށް އެބަ ފެނޭ މި ކުޅުންތެރިން އިމްޕްރޫވްވި މިންވަރު، ސައުދީ ކޭމްޕްގައި ވެސް ރަނގަޅު މެޗުތަކެއް ކުޅެ މޮޅުވީ،" ތައިލެންޑް ޓްރެއިނިން ކޭމްޕްގެ ފަހު މެޗަށް ފަހު ވެލޯސޯ ބުންޏެވެ.
"މި ފަހަރު ތައިލެންޑްގައި ވެސް އެ ތަނުގެ ގައުމީ ލެވަލްގެ ޓީމުތަކާ ދެކޮޅަށް ރަނގަޅު މެޗުތަކެއް މި ކުޅުނީ. ޕްރޮފެޝަނަލް ޓީމުތަކާ ދެކޮޅަށް ވެސް އަހަރެމެން މި ދެއްކި ކުޅުމުން ފެންނަ ކަމަކީ، ހަމައެކަނި އިމްޕްރޫވްވީ އެޓޭކިން ހާލަތްތަކުގައި ބޭނުންވާ ޓެކްނިކް އެކަންޏެއް ނޫން ކަން. އަހަރެމެން މަތީ ލެވަލްގައި ކުޅެން ވިސްނުންތެރިކަމަށް ބަލާއިރު ވެސް ރަނގަޅުވެއްޖެކަން އެނގިގެންދިޔަ،"
ބަހްރޭން ގައުމީ ވޮލީބޯޅަ ޓީމުގެ ކޯޗަކަށް 2020 ވަނަ އަހަރު ހުރި ވެލޯސޯ، ބުނީ މިހާތަނަށް ކުރެވުނު މަސައްކަތާ އެކު އުންމީދުކުރަނީ ކުރިއަށް އޮތް ފޯ ނޭޝަންސް ކަޕްގައި ރާއްޖޭގެ ވޮލީގައި އުޅޭ މީހުންނަށް ރާއްޖޭގެ ފިރިހެން ވޮލީ ޓީމުގެ ކުރިއެރުން ފެންނާނެ ކަމަށެވެ.
"ވަރަށް ބޮޑު ކޮންފިޑެންސެއް އެބައޮތް ރަނގަޅު މެޗުތަކެއް ކުޅެވޭނެ ކަމުގެ. ކާމިޔާބު ވެސް ހޯދޭނެ،" 25 އަހަރަށް ވުރެ ދިގު މުއްދަތެއްގެ ކޯޗިން ތަޖުރިބާ ހުރި ވެލޯސޯ ބުންޏެވެ.
ފޯ ނޭޝަންސް ކަޕްގައި ރާއްޖެއާ ދެކޮޅަށް ނުކުންނަ މެލޭޝިއާ، ސިންގަޕޫރު އަދި އަފްގާނިސްތާން ކުޅުނު މެޗުތަކުގެ ވީޑިއޯތައް ބަލަމުން އަންނަ ކަމަށާއި އެ ޓީމުތަކާ ދެކޮޅަށް ރަނގަޅު ފައިޓެއް ދެވޭނެ ކަމުގެ އުންމީދު އެބައޮތް ކަމަށް ވެލޯސޯ ވަނީ ބުނެފަ އެވެ.
"އަހަރެމެންނަށް އެނގޭ އެމީހުންގެ މައުލޫމާތުތައް ކިޔައިދިނުމަކީ، އަހަރެމެން މި މައުލޫމާތުގެ ބޭނުންހިފާނީ އެ މީހުންނާ ދެކޮޅަށް ކުޅޭ މެޗުގައި. އަހަރެމެންނަށް އެ މީހުންގެ ހާލަތާއި އަހަރެމެންގެ ފެންވަރު އަޅާކިޔައިގެން ރަނގަޅު ޕްލޭނަކާ އެކު ކުރިއަށް ދެވޭނެ،" ބްރެޒިލްގެ މަޝްހޫރު ވޮލީބޯޅަ ކްލަބެއް ކަމަށްވާ މިނިއާސް ޓެނީސް ކްލަބަށް ގިނަ ކާމިޔާބީތަކެއް ހޯދައިދިން ވެލޯސޯ ބުންޏެވެ.
"މިހާރު އޮތް އެންމެ ބޮޑު އުފަލަކީ ރާއްޖެ ޓީމު ވަރަށް ރަނގަޅަށް ދަސްވެފައިވުން. ކޮންމެ ކުޅުންތެރިއެއް ވެސް ރަނގަޅަށް ދަސްވެފައި އޮތުމަކީ އަހަންނަށް އޮތް ފަސޭހައެއް. ބޭނުންވާ ކޮންމެ ދަނޑިވަޅެއްގައި ވެސް ކުޅުންތެރިއަކު ބޭނުންކުރެވޭނެ ހާލަތްތައް އެނގުމަކީ ޓީމާ އެކު ކާމިޔާބު ހޯދޭނެ ސަބަބެއް. މިހާރު މި އޮތީ އެއް ލެވަލެއްގައި ކުޅެވޭނެ 14 ކުޅުންތެރިންނާ އެކު އޮތް ޓީމެއް،"
ރާއްޖޭގައި ހަ އަހަރު ތެރޭ ފުރަތަމަ ފަހަރަށް ހޯސްޓްކުރާ ބައިނަލްއަގުވާމީ އިންޑޯ ފުރަތަމަ ވޮލީ މުބާރާތް، ފޯ ނޭޝަންސް ކަޕްގެ ފިރިހެން ޑިވިޝަން ރޭވިފައި އޮތީ ހަތަރު ގައުމުގެ މެދުގައި ލީގު ބުރެއް ކުޅުމަށް ފަހު ދެ ސެމީ ކުޅުމަށް ފަހު ފައިނަލް މެޗު ކުޅޭ ގޮތަށެވެ. އެއީ ގިނަ މެޗު ކުޅޭ ގޮތަށް ފުރުސަތު ދިނުމުގެ ބޭނުމުގަ އެވެ.
