ގައުމީ އަންހެން ވޮލީބޯޅަ ޓީމާ އެކު މަސައްކަތް ކުރަން ފެށި ފުރަތަމަ ދުވަހުން ފެށިގެން ވެސް ވިސްނުން ބެހެއްޓީ މެޑަލް ހޯދުމަށް ކަމަށާއި އެ ނޫން ޓާގެޓަކަށް ދިއުމެއް ނެތް ކަމަށް ގައުމީ އަންހެން ވޮލީ ޓީމުގެ ކޯޗު ނިޒާރު އިބްރާހިމް (ބޮޑޭ) ބުނެފި އެވެ.
މީގެ ފަސް ވަރަކަށް މަސް ކުރިން، ގައުމީ އަންހެން ވޮލީ ޓީމުގެ ކޯޗަކަށް ބޮޑޭ ހަމަޖައްސައި، ޓްރެއިނިންތައް ފެށި ފަހުން، އޮކްޓޫބަރު/ ނޮވެމްބަރުގައި ވަނީ ސައުދީ އަރަބިއްޔާގައި ޓްރެއިނިން ކޭމްޕެއް ފުރިހަމަކޮށްފަ އެވެ. އޭގެ ފަހުން، މި މަހު މި ވަނީ ފޯ ނޭޝަންސް ކަޕަށް ތައްޔާރުވުމަށް ތައިލެންޑްގެ ބެންކޮކްގައި 10 ދުވަހުގެ ޓްރެއިނިން ކޭމްޕެއް ނިންމައިފަ އެވެ. ދެ ކޭމްޕްގައި ވެސް ވާދަވެރި މެޗުތަކެއް ކުޅެފައިވެ އެވެ.
އަންހެން ޓީމު ގޮވައިގެން ރަސްމީކޮށް މުބާރާތަކަށް ފުރަތަމަ ފަހަރު ނުކުންނައިރު، ނިޒާރު ބުނީ ޓްރެއިނިންތައް މިހާތަނަށް ގެންދެވުނު ގޮތް ރަނގަޅު ކަމަށެވެ.
ފޯ ނޭޝަންސް ކަޕްގެ އަންހެން ޑިވިޝަނުގައި ކުޅެނީ ތިން ގައުމެކެވެ. އެއީ މެލޭޝިއާ އާއި ސިންގަޕޫރު އަދި ރާއްޖެ އެވެ. ނިޒާރު ބުނީ އެ ޓީމުތަކާ ދެކޮޅަށް ކުޅެ ކާމިޔާބު ހޯދޭނެ ކަމުގެ އުންމީދު އެބައޮތް ކަމަށެވެ.
"މުބާރާތަށް އަޅުގަނޑުމެން ތައްޔާރުވަނީ އިރާދަކުރެއްވިއްޔާ ކާމިޔާބަށް. މި މުބާރާތުގެ ކާމިޔާބަށް އަމާޒުހިފައިގެން. މި ޓީމު ލިބުނު ދުވަހުން ފެށިގެން ކުޅުންތެރިންނަށް އިރުޝާދު ދެމުން މިދަނީ މެޑަލް ނޫން އެހެން އެއްވެސް އެއްޗެއް ބޭނުން ނޫންކަން. ހަމަ މި މުބާރާތް ކާމިޔާބު ކުރުމަށްޓަަކައި އަޅުގަނޑުމެން ކުރަން ޖެހޭ ވަރަށް ބައިވަރު މަސައްކަތް ކުރަމުން މިދަނީ،" ގައުމީ ފިރިހެން ވޮލީ ޓީމުގެ އެސިސްޓަންޓް ކޯޗަކަށް ހުރެ ލޯ މެޑަލް ހޯދި، ނިޒާރު، ތައިލެންޑް ޓްރެއިނިން ކޭމްޕްގެ ފަހު މެޗަށް ފަހު ދިން އިންޓަވިއުގައި ބުންޏެވެ.
ނިޒާރު ބުނީ ސައުދީ އަރަބިއްޔާ އާއި ތައިލެންޑް ކޭމްޕުން ހަގީގަތުގައި ލިބިގެންދިޔައީ ވަރަށް ބޮޑު ފުރުސަތެއް ކަމަށެވެ.
"އަހަރެމެންނަށް މީގެ ތެރެއިން ވަރަށް ގިނަ ކަންކަން އެކްސްޕީރިއަންސް ކުރެވޭނެ. މުބާާރާތް (ފޯ ނޭޝަންސް ކަޕް) ކާމިޔާބު ކުރެވޭނެ ވަރަށް ބޮޑު އުންމީދެއް ކުރެވޭ،" ނިޒާރު ބުންޏެވެ.
"ސައުދީ އަށް ދިޔަ ޓީމާއި ތައިލެންޑް ޓްރެއިނިންގައި އުޅޭ ޓީމަށް ބަދަލުތަކެއް އައިސްފި. ސީނިއާ ވެސް ކުޅުންތެރިންނާއި ޔަންގް ވެސް ކުުޅުންތެރިންނާ އެކު މި ނުކުންނަނީ. ސައުދީ އަށް ދިޔަ ޓީމުގައި ޔަންގް ކުޅުންތެރިން މަދުވާނެ. މި ފަހަރު (ތައިލެންޑް ކޭމްޕްގައި) އެ އަށް ބަދަލެއް އައިސްފައި މި ވަނީ،"
ނިޒާރު ބުނީ ދެ ކޭމްޕްގެ އަނެއް ތަފާތަށް ބަލާއިރު، ސައުދީ އަރަބިއްޔާ އިން ވާދަވެރި ރަނގަޅު ލެވަލްގެ މެޗުތަކެއް ނުލިބުނު ކަމުގައި ވިޔަސް ތައިލެންޑްގައި ކުޅެން ލިބުނު ފަސް މެޗުން ވެސް ޓީމުގައި ރަނގަޅު ކުރަން ހުރި ގިނަ ކަންކަމަށް ބަދަލު ގެނެވޭނެ ކަމަށެވެ.
ޓްރެއިނިން ކޮންމެ މެޗަކަށް ވެސް ކަނޑައެޅީ ވަކި ޓާގެޓްތަކެއްކަން ފާހަގަކޮށް ނިޒާރު ބުނީ ޖުމްލަކޮށް ކުޅުންތެރިންގެ ފަރާތުން ފެނުނު ކަންކަން ވެސް ރަނގަޅު ކަމަށެވެ. އަދި މުބާރާތަށް ތައްޔާރުވުމުގެ ގޮތުން މިހާރު ކުރަމުން އަންނަ ކަމަކީ މެލޭޝިއާ އާއި ސިންގަޕޫރުގެ މެޗުތައް ބެލުންކަން ނިޒާރު ބުނެފައިވެ އެވެ.
"މިހާރު އެ ދެ ޓީމުގެ މެޗުތައް ބަލަމުން މި ދަނީ ވަރަށް ބޮޑު އުންމީދެއް އެބައޮތް، އިރާދަކުރެއްވިއްޔާ މި ތަށި ހޯދައިގެން ފޭބޭނެ ކަމުގެ. މި ޓީމުގައި ހިމެނިގެން ކޭމްޕްގައި މި ލިބުނީ ގާތްގަނޑަކަށް މުބާރާތެއްގައި ލިބޭނެ ކަހަލަ ފުރުސަތެއް. ވާހަކަ އަކީ މީގެ ސަބަބުން ކުޅުންތެރިން ވަރަށް ބޮޑަށް އިމްޕްރޫވްވެގެން އައިސްފިއޭ. ބޭނުންވާ ވަރަށް ޕާފޯމަންސް (ވެސް) އަންނަނީ ރަނގަޅުވަމުން،" ދާދި ފަހުން، ކްލަބް ވެމްކޯ އަށް ގައުމީ މުބާރާތުގެ އަންހެން ޑިވިޝަނުގެ ތަށި ހޯދައިދޭން މުހިންމު މަސައްކަތްތަކެއް ކުރި ނިޒާރު ބުންޏެވެ.
ރާއްޖޭގެ ވޮލީ އަންހެން ގައުމީ ޓީމު އަމިއްލަ ފަސްގަނޑުގައި ބައިނަލްއަގުވާމީ މުބާރާތެއް މި ކުޅެނީ 2017 ވަނަ އަހަރުގެ ފަހުން ފުރަތަމަ ފަހަރަށެވެ. ގައުމީ އަންހެން ޓީމުން ވަނީ 2019 ވަނަ އަހަރު ނޭޕާލުގައި ބޭއްވި ސެންޓްރަލް ޒޯން މުބާރާތުން ރިހި މެޑަލް ހޯދައިފަ އެވެ.
އަންނަ ބުރާސްފަތި ދުވަހު ފަށާ ފޯ ނޭޝަންސް ކަޕްގެ އަންހެން ޑިވިޝަންގެ ތިން ގައުމުގެ މެދުގައި ލީގު ބުރެއް ކުޅުމަށް ފަހު އެއް ވަނަ ޓީމު ދާނީ ފައިނަލަށެވެ. ދެ ވަނަ އާއި ތިން ވަނަ ސެމީ އެއް ކުޅެފައި، އެ ތަނުން މޮޅުވާ ޓީމަކަށް ފައިނަލްގެ އަނެއް ޖާގަ ލިބޭނެ އެވެ.
