މިލާން (ފެބްރުއަރީ 19) - އިޓާލިއަން ލީގުގައި ރޭ އިންޓަ މިލާނުން 3-1 އިން އުދިނޭޒީ ބަލިކުރިއިރު، މޮންޒާ އަތުން 1-0 އިން މޮޅުވެ، އެންމެ ފަހުގެ ޗެމްޕިއަން، އޭސީ މިލާން ލީގުގެ ތިން ވަނަ އަށް ޖެހިލައިފި އެވެ.
ލީގުގެ އެއް ވަނައިގައި އޮތީ ސަސުއޯލޯ އަތުން 2-0 އިން މޮޅުވި ނަޕޯލީ އެވެ. ނަޕޯލީ އެއް ވަނަ މަގާމުގައި އޮތީ 23 މެޗުން 62 ޕޮއިންޓާ އެކު އެވެ. ދެ ވަނައިގައި އޮތް އިންޓަ އަށް ވަނީ 23 މެޗުން 47 ޕޮއިންޓް ލިބިފަ އެވެ. ތިން ވަނައިގައި އޮތް މިލާނަށް ވަނީ 23 މެޗުން 44 ޕޮއިންޓް ލިބިފަ އެވެ.
އިންޓަ އިން ރޭގެ މެޗުގައި ލީޑުނެގީ 20 ވަނަ މިނިޓްގައި ޕެނަލްޓީ އަކުން ރޮމެލޫ ލުކާކޫ އެވެ. މިއީ، މި ފަހަރުގެ ސީޒަނު ލީގުގައި ފުރަތަމަ މެޗަށް ފަހު ލުކާކޫގެ ގޯލެއް ފެނުނު ފުރަތަމަ ފަހަރެވެ. އުދިނޭޒީން ވަނީ ފުރަތަމަ ހާފު ނިމުމުގެ ކުރިން އެއްވަރުކޮށްފަ އެވެ. މި ލަނޑު ޖެހީ ބާރު ހަމަލާ އަކުން ސަންޑޯ ލޮވްރިކް އެވެ.
މެޗުގެ 73 ވަަަނަ މިނިޓްގައި އިންޓަ އަށް އަލުން ލީޑުނަގައިދިނީ ހެންރިކް މިކިތާރްޔަން ޖެހި ހިތްގައިމު ގޯލުންނެވެ. ފެޑެރީކޯ ޑި މާކޯ ދިން ބޯޅަ، މިކިތާރްޔަން ވަނީ ގޯލުގެ ތެރެއަށް ބޯޅަ އަމާޒުކޮށްލައިފަ އެވެ. ބަދަލު ކުޅުންތެރިއެއްގެ ގޮތުގައި ކުޅެން އަރައި، ލަޓާރޯ މާޓީނޭޒް ވަނީ މެޗުގެ ފަހު މިނިޓްގައި އިންޓަގެ ތިން ވަަނަ ގޯލު ޖަހައި، އެ ޓީމަށް މެޗުގެ ތިން ޕޮއިންޓް ޔަގީންކޮށްދީފަ އެވެ.
އިންޓަގެ ކޯޗު ސިމޯން އިންޒާގީ ބުނީ އުދިނޭޒީ ކަހަލަ ފިޒިކަލް ޓީމެއް އަތުން ފަހު ވަގުތާ ހަމައަށް ރަނގަޅަށް ކުޅެގެން މޮޅެއް ހޯދުމަކީ ސީޒަނުގެ ކުރިއަށް ހުރި މެޗުތަކުގައި ފައިދާކުރާނެ ކަމެއް ކަމަށެވެ.
މިލާންގެ ކުރީގެ ރަައީސް ސިލްވިއޯ ބަރްލުސްކޯނީގެ ކްލަބެއް ކަމަށްވާ މޮންޒާގެ ދަނޑުގައި ރޭ ކުޅުނު މެޗުގައި މިލާންގެ ހަމައެކަނި ލަނޑު ޖެހީ 31 ވަނަ މިނިޓްގައި ޖޫނިއާ މެސިއަސް އެވެ. އޭރިއާގެ ރޮނގުކައިރިން މެސިއަސް ޖެހި ބާރު ބޯޅަ ހުއްޓުވަން މޮންޒާގެ ކީޕަރު މިޝޭލޭ ޑި ގްރެގޯރިއޯ އަށް މާ ބޮޑު ކަމެއް ނުކުރެވުނެވެ.
މެޗަށް ފަހު މިލާންގެ ކޯޗު ސްޓެފާނޯ ޕިއޯލީ ބުނީ ރަނގަޅަށް ކުޅެގެން މޮޅެއް ހޯދަން ބޭނުންވަނީ ޑިފެންސްގައި ވެސް ތަފާތު ދައްކައިގެން ކަމަށެވެ. އަދި ކޮޅަށް ލަނޑެއް ނުވަދެ ގިނަ މެޗުތަކެއް ނިންމާލުމަކީ ނަތީޖާ ނެރުމުގައި ޓީމުގެ އިތުބާރު ބޮޑުވާނެ ސަބަބެއް ކަމަށް ޕިއޯލީ ވަނީ ބުނެފަ އެވެ.
