މި މަހު 23-27 އަށް މާލޭގައި ބާއްވަން ނިންމާފައިވާ ފޯ ނޭޝަންސް ކަޕް ވޮލީބޯޅަ މުބާރާތުގައި ރާއްޖޭގެ ގައުމީ ވޮލީބޯޅަ ޓީމުން ބޭނުންކުރަން ހަމަޖެހިފައިވާ ޖޯޒީ، ރައީސް އިބްރާހިމް މުހައްމަދު ސޯލިހަށް ކުޅިވަރާ ބެހޭ ވަޒީރު، އަހުމަދު މަހުލޫފް ވެދުމަށް އަރުވައިފި އެވެ.
ރައީސް ސޯލިހު، ފޯ ނޭޝަންސް ކަޕްގައި ރާއްޖޭން ބޭނުންކުރާ ޖޯޒީ، ލޯންޗްކޮށްދެއްވީ ފާއިތުވި ހަފްތާގައި ރައީސް އޮފީހުގައި ބޭއްވި އިވެންޓެއްގެ ތެރެއިންނެވެ. މި އިވެންޓްގައި، މިނިސްޓަރު މަހުލޫފާއި ވޮލީބޯލް އެސޯސިއޭޝަން (ވީއޭއެމް)ގެ ރައީސް މުހައްމަދު ރަނޭޝް (ރަނޭ) އާއި ވީއޭއްގެ ނައިބު ރައީސް، އަޝްރަފް އަލީ (އަޝްރާ) ވަނީ ބައިވެރިވަޑައިގެންފަ އެވެ.
ފޯ ނޭޝަންސް ކަޕްގެ ފިރިހެން ޑިވިޝަނުގައި ކުޅޭނީ ރާއްޖެ، ސިންގަޕޫރު، މެލޭޝިއާ އަދި އަފްގާނިސްތާން އެވެ. އަންހެން ބައިގައި ރާއްޖޭގެ އިތުރުން މެލޭޝިއާ އާއި ސިންގަޕޫރު އެވެ.
ގައުމީ ވޮލީ ޓީމުތަކުން މި ފަހަރު، ފޯ ނޭޝަންސް ކަޕްގައި ބޭނުންކުރާނެ ޖޯޒީ ފަރުމާކޮށްފައިވާ ގޮތަށް ބަލާއިރު، ޖޯޒީގެ ޑިޒައިނުގައި މަންޓާ ރޭ ވަނީ ވަރަށް ބޮޑަށް ހިމަނައިފަ އެވެ. މިއީ، ވިސްނުންތެރިކަމާ އެކު ކުޅިވަރުގެ ތެރެއިން ކުރިއަށް ދިއުމާއި ގައުމީވަންތަ ކަމުގެ ނިޝާނެއް، ޖޯޒީގެ ޑިޒައިނުގެ ތެރެއިން ދައްކާލުމަށް ކުރެވުނު ކަމެކެވެ.
އަދި ޖޯޒީގެ ޑިޒައިނާއި ތިން ކިޓްގައި ބޭނުންކޮށްފައިވާ ކުލަތަކަކީ ރާއްޖޭގެ ގައުމީ ދިދައިގައި ވެސް ހިމެނޭ ކުލަތަށް ކަމަށްވާއިރު، މި ޖޯޒީގެ ޑިޒައިނުގެ އެންމެ ބޮޑު ބޭނުމަކީ، ފަހުރުވެރިކަމާ އެކު ގައުމު ތަމްސީލްކުރަން ގައުމީ ޓީމުން ކުޅޭއިރު، ބޭނުންކުރާ ޖޯޒީން ގައުމުގެ ޒީނަތްތެރި ސިފަތައް ފެންނަ ގޮތްވުން ކަމަށް ވޮލީބޯލް އެސޯސިއޭޝަނުން ބުނެފައިވެ އެވެ.
ފޯ ނޭޝަންސް ކަޕަށް ތައްޔާރުވާން ގައުމީ ވޮލީބޯޅަ ޓީމުން މިހާރު އަންނަނީ ތައިލެންޑްގައި ޓްރެއިނިން ކޭމްޕެއް ފުރިހަމަ ކުރަމުންނެވެ.
