ގައުމީ ސާފް ލީގުގެ ފުރަތަމަ މުބާރާތް ކަމަށްވާ ކަޅެގަލެކޮޑާ 2023ގެ ފައިނަލުގައި ގައްދޫގެ ޗެމްޕިއަން އިސްމާއިލް ރަޝީދު (ސްމައިލީ) ބަލިކޮށް، އެ ރަށުގެ މުހައްމަދު ނަޖާހު (ކަބޯ) ޗެމްޕިއަންކަން ހޯދައިފި އެވެ.
ގައްދޫގައި ކުރިއަށްދިޔަ މި އަހަރުގެ ކަޅެގަލެކޮޑާ 2023 އަކީ ސާފިން އެސޯސިއޭޝަނުން އެ ރަށުގައި ބޭއްވި ތިން ވަނަ މުބާރާތެވެ. މިދިޔަ ދެ މުބާރާތުގެ ޗެމްޕިއަންކަން ހޯދި ސްމައިލީ ފައިނަލުގައި ބަލިވީ 0.33ގެ ތަފާތުންނެވެ. ކަބޯ 15.33ގެ ސްކޯއެއް ހޯދިއިރު، ސްމައިލީ އަށް ލިބުނީ 15.00ގެ ސްކޯއެކެވެ.
ފައިނަލުގެ ފުރަތަމަ ރާޅު އެޅި ކަބޯ ވަނީ އެ ރާޅުގައި 8.33ގެ ސްކޯއެއް ހޯދައިފަ އެވެ. އޭގެ ފަހުން ސްމައިލީ ވަނީ ދެ ރާޅުން 7.17 އާއި 7.83ގެ ސްކޯއެއް ހޯދައި ލީޑު ނަގައިފަ އެވެ. 15.00ގެ ސްކޯއެއްގައި ސްމައިލީ އޮއްވާ ކަބޯ ވަނީ އޭނާގެ ދެ ވަނަ ރާޅުގައި 7.00ގެ ސްކޯއެއް ހޯދައި ފައިނަލުގައި ލީޑު ނަގާފަ އެވެ. އޭގެ ފަހުން ސްމައިލީ ދެ ރާޅު އެޅި ނަމަވެސް އޭނާގެ ދެ ވަނަ އަށް އެންމެ މަތީ ސްކޯ އަށް ވުރެ ރަނގަޅު ސްކޯއެއް ނުހޯދުނެވެ.
ކަޅެގަލެކޮޑާ 2023 އަކީ ސާފިން އެސޯސިއޭޝަންގެ ރަސްމީ މުބާރާތެއްގައި ކަބޯ ޗެމްޕިއަންކަން ހޯދި ފުރަތަމަ މުބާރާތެވެ. މީގެ ކުރިން މިދިޔަ އަހަރު ގައުމީ ލީގުގައި ކުރިއަށްދިޔަ ފަސް މުބާރާތުގެ ތެރެއިން ދެ މުބާރާތެއްގެ ފައިނަލުން އޭނާ ބަލިވި އެވެ. އޭގެ ތެރޭގައި ސްމައިލީ އަތުން މިދިޔަ އަހަރު ގައްދޫގައި ބަލިވި ފައިނަލް ހިމެނެ އެވެ.
ސްމައިލީ މި ފަހަރުގެ މުބާރާތުގައި ފެނުނީ ރަނގަޅު ފޯމެއްގަ އެވެ. ފައިނަލް ފިޔަވައި އޭނާ އެޅި ހުރިހާ ހީޓެއްގައި އޭނާ ކާމިޔާބުކުރި އެވެ. މި މުބާރާތުގެ ކުރިން ކުރިއަށްދިޔަ ގައުމީ ޓީމްގެ ސެލެކްޝަން ޓްރަޔަލްސްގައި މަތީ ސްކޯތަކެއް ހޯދައި ގައުމީ ޓީމުން ޖާގަ ވެސް ހޯދި އެވެ.
ސެމީ ފައިނަލުގައި ސްމައިލީ މޮޅުވީ ހަސަން ނާސިހު (ޗިކާ) އަތުންނެވެ. ކަނބޯ ސެމީ ފައިނަލުގައި މޮޅުވީ 12 އަހަރުގެ ޔޫސުފް ކަޔާން ހަމްދާން ޒަކީ އަތުން މޮޅުވެގެންނެވެ.
ޖޫނިއާ ބައިގެ ޗެމްޕިއަންކަން ހޯދީ ޗޮއްޕު
ކަޅެގަލެކޮޑާ 2023ގެ 18 އަހަރުން ދަށުގެ ބައިގެ ޗެމްޕިއަންކަން ހޯދީ މުހައްމަދު ޒަޔާން (ޗޮއްޕު) އެވެ. ގައުމީ ޖޫނިއާ ޓީމްގެ ޗޮއްޕު ފައިނަލު މެޗު ކާމިޔާބުކުރީ ޔޫސުފް ކަޔާންއާ ވާދަކޮށް ރަނގަޅު ނަތީޖާއަކުންނެވެ.
ފައިނަލުގައި ޗޮއްޕު 12.34ގެ ސްކޯއެއް ހޯދިއިރު، ކަޔާން އަށް ލިބުނީ 8.10ގެ ސްކޯއެކެވެ.
ޖޫނިއާ ބައިގައި ތަފާތު މޮޅުކޮށް ފެނުނު ކަޔާން އަށް ފައިނަލުގައި އެންމެ އެދެވޭ ހުނަރެއް ނުދެއްކުނެވެ. އޭނާގެ އެންމެ ރަނގަޅު ދެ ރާޅުގެ ސްކޯއަކީ 3.50 އާއި 4.60ގަ އެވެ. ފައިނަލުގައި ޗޮއްޕު އެޅި ރާޅުތަކުގައި ކަޔާން އަށްވުރެ ރަނގަޅު ނަތީޖާތަކެއް އޭނާ ނެރުނެވެ. މިގޮތުން 5.67ގެ ސްކޯއެއް ފުރަތަމަ ރާޅުގައި ހޯދިއިރު، ތިން ވަނަ ރާޅުން 6.67ގެ ސްކޯއެއް ހޯދި އެވެ.
ޖޫނިއާ ބައިގެ ސެމީ ފައިނަލުގައި ޗޮއްޕު މޮޅުވީ ޔާސިން އަހުމަދު ނާޝިދު އަތުންނެވެ. ޔޫސުފް ކަޔާން މޮޅުވީ ކަޔާން އަބްދުﷲ އަރީފްއާ ވާދަކޮށެވެ.
މި އަހަރުގެ ގައުމީ ލީގުގައި ފުރަތަމަ ފަހަރަށް ޖޫނިއާ ލީގު ޗެމްޕިއަންވެސް ހޮވާނެ އެވެ. އެހެންކަމުން ފުރަތަމަ މުބާރާތްވެސް ފެނުނީ މިދިޔަ އަހަރަށްވުރެ ފޯރިގަދަ ކޮށެވެ.
ގައުމީ ސާފް ލީގުގެ މިއަހަރުގެ ދެވަނަ މުބާރާތް އޮންނާނީ މ. މުލީގަ އެވެ. މެއި މަހުގެ 2 އިން 6 އަށް އޮންނަ މުލީކޮޅު ރާޅުގަނޑު މުބާރާތަށްފަހު ޖުލައި 4 އިން 8 އަށް ކ. ހިންމަފުށީގައި ގާމާދޫކޮޅު މުބާރާތް އޮންނާނެ އެވެ. އޭގެ ފަހުން، ޖުލައި 31 އިން އޮގަސްޓް 5 އަށް ހުރާކޮޅު ރާޅުގަނޑު ކުރިއަށް ދާނީ ރ. ކިނޮޅަހުގަ އެވެ. މި އަހަރުގެ ވެސް އެންމެ ފަހު މުބާރާތް ކަމަށްވާ ރަންނަމާރި ޗެލެންޖް މާލޭގައި އޮންނާނީ އޮކްޓޫބަރު މަހުގެ 27 އިން ނޮވެމްބަރު މަހުގެ 25 ގެ ނިޔަލަށެވެ.
