ގައުމީ ސާފް ލީގުގެ މި އަހަރުގެ ފުރަތަމަ މުބާރާތް ކަމަށްވާ "ކަޅެގަލެކޮޑާ" 2023 ގދ.ގައްދޫގައި އިއްޔެ ފަށައިފި އެވެ.
މިދިޔަ އަހަރެކޭ އެއްގޮތަށް މި އަހަރު ވެސް ގައުމީ ސާފް ލީގު ރާއްޖޭގެ ފަސް ސަރަހައްދެއްގައި ކުރިއަށްދާނެ އެވެ. އެ ގޮތުން ފުރަތަމަ މުބާރާތް ގައްދޫގައި އިއްޔެ ފެށިއިރު، ދެ ވަނަ މުބާރާތް މ. މުލީގައި އޮންނާނީ މެއި މަހުގެ 2 އިން 6 އަށެވެ. އެ އަށް ފަހު ޖުލައި 4 އިން 8 އަށް ކ. ހިންމަފުށީގައި ގާމާދޫކޮޅު މުބާރާތް ކުރިއަށް ގެންދިޔުމަށް ފަހު، ޖުލައި 31 އިން އޮގަސްޓް 5 އަށް ހުރާކޮޅުރާޅުގަނޑު ކުރިއަށް ދާނީ ރ. ކިނޮޅަހުގަ އެވެ. މި އަހަރުގެ ވެސް އެންމެ ފަހު މުބާރާތް ކަމަށްވާ ރަންނަމާރި ޗެލެންޖް މާލޭގައި އޮންނާނީ އޮކްޓޫބަރު މަހުގެ 27 އިން ނޮވެމްބަރު މަހުގެ 25 ގެ ނިޔަލަށެވެ.
ގައްދޫގައި ފެށި ކަޅެގަލެކޮޑާ 2023 ގައި އިއްޔެ ކުރިއަށްދިޔައީ ޖޫނިއާ ބައިގެ ފުރަތަމަ ބުރުގެ ހީޓުތަކާއި، ފިރިހެން އޯޕަން ބައިގެ ފުރަތަމަ ބުރުގެ ހީޓުތަކުންނެވެ.
ފިރިހެން އޯޕަން ބަޔަށް ބަލާއިރު ފުރަތަމަ ބުރުގައި އެންމެ ފާހަގަކޮށްލެވުނީ މިދިޔަ އަހަރުގެ ލީގު ޗެމްޕިއަން އަހުމަދު އާގިލް (އައްމަޑޭ) ވާދަކުރި ހީޓުން ދެ ވަނަ އަށް ދިޔުމެވެ. ހީޓު އެކަކުން އައްމަޑޭ ދެ ވަނަ އަށް ދިޔައީ 9.07 ގެ ސްކޯއަކުންނެވެ. އެ ގޮތުން، 10.84ގެ ސްކޯ އަކުން މި ހީޓު ކާމިޔާބުކުރީ މުހައްމަދު އިރުޝާދު (ބިއްލޫ) އެވެ. އައްމަޑޭ އާއި ބިއްލޫ ތިން ވަނަ ބުރަށް ދިޔައިރު، ހީޓުން ތިން ވަނަ އަށް ދިޔަ އަހުމަދު އަރުޒަން އާއި މުހައްމަދު އަޝްފާގް ވާދަކުރާނީ ރީކޮލިފައި-ހީޓުގަ އެވެ.
ފުރަތަމަ ދުވަހު އެންމެ މަތީ ސްކޯއެއް ހޯދީ އިސްމާއިލް ރަޝީދު (ސްމައިލީ) އެވެ. ހަސަން ނާސިހު އާއި އިސްމާއިލް ޒަހީން ވާދަކުރި ހީޓުން ސްމައިލީ އެއް ވަނަ ހޯދީ 17.34 ގެ ސްކޯއަކުންނެވެ. ނާސިހު އަށް 10.50ގެ ސްކޯއެއް ލިބުނުއިރު، ޒަހީން އަށް ލިބުނީ 9.07ގެ ސްކޯ އެކެވެ.
ގައްދޫގެ ސްމައިލީގެ އިތުރުން އެރަށަށް ނިސްބަތްވާ ހޫދު އަހުމަދު، ޖައިލަމް ނިޒާރު އަދި މުހައްމަދު ނަޖާހު (ކަބޯ)ވެސް ވަނީ އެ ރާޅާއެޅުންތެރިންގެ ހީޓުތައް ކާމިޔާބުކޮށްފަ އެވެ. މި ހަތަރު އެތުލީޓުންނަކީ ވެސް ގައުމީ ޓީމްގެ އެތުލީޓުންނެވެ.
ހޫދު އޭނާ ވާދަކުރި ހީޓު ކާމިޔާބުކުރީ 14.17ގެ ސްކޯ އަކުންނެވެ. މި ހީޓުން ދެ ވަނަ އަށް ދިޔައީ 8.10ގެ ސްކޯއަކާ އެކު އަބްދުﷲ އަރީފް (ފުކު) އެވެ. ޖައިލަމް ހީޓު ކާމިޔާބުކުރީ 13.77ގެ ސްކޯއަކާ އެކުގަ އެވެ. މި ހީޓުން ދެ ވަނަ އަށް ދިޔައީ 7.26ގެ ސްކޯއަކާ އެކު ޔަމާން އިބްރާހިމް އެވެ.
އެ ގޮތުން، 15.50 ގެ ސްކޯއަކުން ކަބޯ އޭނާގެ ހީޓު ކާމިޔާބުކުރިއިރު، މި ހީޓުން ދެ ވަނަ އަށް ދިޔައީ މުހައްމަދު ފަޔާޒު (ޕެލޭ) އެވެ.
ފިރިހެން އޯޕަން ބައިގައި އިއްޔެ އެޅި އެހެން ރާޅާ އެޅުންތެރިންނަށް ބަލާއިރު ހުސައިން އަރީފް (އިބޫ) ވަނީ 14.06ގެ ސްކޯއަކާ އެކު ހީޓު ތިނެއް ކާމިޔާބުކޮށްފަ އެވެ. މި ހީޓުން ދެ ވަނަ އަށް ދިޔައީ 9.50ގެ ސްކޯއަކުން އަލީ އަހުމަދު އެވެ. އާދަމް މުއީން އިބްރާހިމް ވަނީ 11.73ގެ ސްކޯ އަކުން އޭނާ ވާދަކުރި ހީޓު ކާމިޔާބުކޮށްފަ އެވެ. މި ހީޓުން ދެ ވަނަ އަށް ދިޔައީ ޔޫސުފް ކަޔާން ހަމްދާން ޒަކީ އެވެ. އެއީ 9.34ގެ ސްކޯއަކުންނެވެ.
ފުރަތަމަ ބުރުގައި އެންމެ ފޯރިގަދަކޮށްދިޔައީ ހަ ވަނަ ހީޓެވެ. މި ހީޓު 9.73 އިން ކަޔާން އަބްދުﷲ އަރީފް ކާމިޔާބުކުރިއިރު، ދެ ވަނަ ހޯދީ 8.90ގެ ސްކޯއަކުން މުހައްމަދު ޒަޔާން (ޗޮއްޕު) އެވެ. ތިން ވަނަ އަބްދުﷲ އަރުޝަދު އަށް ލިބުނީ 8.07 ގެ ސްކޯއަކުންނެވެ. ހީޓުގެ ފުލަށް ދިޔައީ 7.33ގެ ސްކޯއަކުން ޔާސިން އަހުމަދު ނާޝިދު އެވެ.
އިއްޔެ ކުރިއަށްދިޔަ ފުރަތަމަ ބުރުގެ ކޮންމެ ހީޓަކުން ކުރި ހޯދި ދެ އެތުލީޓުން ކޮލިފައިވީ ތިން ވަނަ ބުރަށެވެ. އަނެއް ދެ އެތުލީޓުން ޖެހޭނީ ރީ-ކޮލިފައި ހީޓުގައި ވާދަކުރާށެވެ.
މިއަދު ކުރިއަށްދިޔަ ޖޫނިއާ ބަޔަށް ބަލާއިރު ޔޫސުފް ކަޔާން، ކަޔާން އަބްދުﷲ އަރީފް، މުހައްމަދު އިނާން، މުހައްމަދު ޒަޔާން، އަހުމަދު މިސްކް، އަދި ޔާސިން އަހުމަދު ނާޝިދު ވަނީ ކުއާޓާ ފައިނަލުން ފުރުސަތު ހޯދާފަ އެވެ.
ފުރަތަމަ ބުރުގައި ކުރިއަށްދިޔަ ތިން ހީޓުގެ ގަދަ ދޭއްގައި ނުހިމެނުނު ހަތަރު ބައިވެރިން ކަމަށްވާ އަހުމަދު ޒަޔާން، ސައްދިޔު ސަލާހުއްދީން، އަހުމަދު ލުޒަައިން އަދި މުހައްމަދު ޖިނާން ވާދަކުރާނީ ރީ ކޮލިފައި ހީޓުގަ އެވެ.
މިއަހަރުގެ ގައުމީ ސާފް ލީގުގައި މިދިޔަ އަހަރެކޭ އެއްގޮތަށް ލީގުގެ ޗެމްޕިއަން ކަނޑައަޅާއިރު، މިއަހަރު މުޅިން އަލަށް ލީގުގެ ޖޫނިއާ ޗެމްޕިއަންވެސް ހޮވާނެ އެވެ.
