ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2023 ގައި ރޭ ކުޅުނު މެޗުތަކުން މޮޅުވެ، ލ. ގަމާއި ގދ. ހޯޑެއްދޫން މުބާރާތުގައި ދެ ވަނަ މޮޅު ހޯދައިފި އެވެ.
ފަސް ޓީމު ބައިވެރިވެފައިވާތީ، ލ. އަތޮޅާއި ގދ. އަތޮޅުގައި ކުރިއަށްދަނީ ލީގު އުސޫލުން ބުރެކެވެ. އެއީ އެންމެ ގިނަ ޕޮއިންޓް ހޯދާ ދެ ޓީމެއް ފައިނަލުގައި ކުޅޭ ގޮތަށެވެ. ލ. އަތޮޅުން ރޭ ކުުޅުނު މެޗުތަކުގެ ނަތީޖާ އަށް ބަލާއިރު، ގަމުން ވަނީ ކަލައިދޫ އަތުން 6-1 އިން މޮޅުވެފަ އެވެ. އަދި ލ. މާބައިދޫ އަތުން އިސްދޫ މޮޅުވީ 3-0 އިންނެވެ. ގދ. އަތޮޅުގައި ރޭ ހޯޑެއްދޫން ވަނީ މަޑަވެލި އަތުން 3-1 އިން މޮޅުވެފަ އެވެ. ތިނަދޫ އަތުން ގައްދޫ މޮޅުވީ 2-1 އިންނެވެ.
ލ އަތޮޅުގެ ތާވަލަށް ބަލާއިރު، ގަން އެއް ވަަނައިގައި އޮތީ ދެ މެޗުން ހަ ޕޮއިންޓާ އެކު އެވެ. ދެ ވަނައިގައި އޮތް އިސްދޫ އަށް ތިން ޕޮއިންޓް ލިބިފައިވާއިރު، ތިން ވަނައިގައި އޮތް މާބައިދޫ އަށް ވެސް ވަނީ ތިން ޕޮއިންޓް ލިބިފަ އެވެ. ކަލައިދޫ އާއި މާމެންދޫ އަށް އަދި ޕޮއިންޓެއް ނުލިބެ އެވެ.
ގައްދޫ ޓީމުގެ އާލިމް ރޭގެ މެޗުގައި ތިނަދޫ ކޮޅަށް ގޯލު ޖެހުމަށް ފަހު އުފާފާޅުކުރަނީ.--- ފޮޓޯ: މުހައްމަދު ޝާބިން/ އަދަދު
ގދ. އަތޮޅުން ހޯޑެއްދޫ ވަނީ ދެ މެޗުން ހަ ޕޮއިންޓް ހޯދައިފަ އެވެ. ވާދޫ އާއި ގައްދޫ އަށް ވަނީ ތިން ޕޮއިންޓް ލިބިފަ އެވެ. މަޑަވެއްޔާއި ތިނަދޫ އަށް އަދި ޕޮއިންޓެއް ނުލިބެ އެވެ.
ރެހެންދި ފުޓްސަލް ދަނޑުގައި ރޭ ކުޅުނު މެޗުން ގަމުގެ ގޯލުތައް ޖަހައިދިނީ ހުސެއިން ނާޝިދު (ނާއްޓޯ)، އަބްދުﷲ ޖުނައިދު (ޖެންނޭ)، ހުސެއިން ޝަރީފް (އޮންލީ)، ހުސެއިން އަޒުމީ، ޒައިދާން އަބްދުﷲގެ އިތުރުން ކަލައިދޫގެ މުހައްމަދު އަކުރަމް އަތުން ބައި ގޯލެކެވެ. ކަލައިދޫގެ ހަމައެކަނި ލަނޑު ޖެހީ މުހައްމަދު އައްސަދު އެވެ. އިސްދޫން މާބައިދޫ ކޮޅަށް ގޯލުތައް ޖެހީ އަލީ ހުމޭޒް ދެ ގޯލާއި ހުސެއިން އަފްހާން އެވެ.
މަޑަވެލި އަތުން ހޯޑެއްދޫ މޮޅުވިއިރު، އެ ޓީމުގެ ލަނޑުތައް ޖެހީ ޓީމުގެ ކެޕްޓަން، އާދަމް ލަރީފް (ރޮނާ)، އަހުމަދު ޝާނިއު އަބްދުލް ގަނީ އަދި ސާއިން އަސްލަމް އެވެ. މި މެޗުގައި މަޑަވެލިން ޖެހި ގޯލަކީ ހޯޑެއްދޫގެ ސާއިން އަތުން ބައިކޮޅަށް ވަން ގޯލެކެވެ.
ފުރަތަމަ މެޗުގައި ވާދޫ އަތުން ބަލިވި ގައްދޫން މުބާރާތުގައި ފުރަތަމަ މޮޅު ހޯދި މެޗުގައި ތިނަދޫ ކޮޅަށް ދެ ގޯލު ޖެހީ އާލިމް އަބްދުލް އަޒީޒް އެވެ. ތިނަދޫގެ ހަމައެކަނި ގޯލު ޖެހީ ހުސެއިން ރަޝީދު އެވެ.
މިރޭގެ މެޗުތަކުގެ ޝެޑިއުލް:
20:00 - ބ. ފެހެންދޫ - ބ. އޭދަފުށި
20:00 - އއ. ފެރިދޫ - އއ. މަތިވެރި
21:00 - ބ. ކެންދޫ - ބ. ތުޅާދޫ
21:00 - އއ. ތޮއްޑޫ - އއ. ބޮޑުފޮޅުދޫ
22:00 - ގއ. ގެމަނަފުށި - ގއ. ވިލިނގިލި
22:00 - ގއ. މާމެންދޫ - ގއ. ދެއްވާދޫ
23:00 - ގއ. ނިލަންދޫ - ގއ. ކޮނޑޭ
23:00 - ގއ. ކަނޑުހުޅުދޫ - ގއ. ދާންދޫ
