ތިން އަހަރުގެ މެދުކެނޑުމަކަށް ފަހު މާލޭގައި ބޭއްވި އިންޓަ ސްކޫލް ކްރިކެޓް މުބާރާތުގެ ޗެމްޕިއަންކަން ތާޖުއްދީން ސްކޫލާއި ބިލަބޮންގް ހައި އިންޓަނޭޝަނަލް ސްކޫލުން ހޯދައިފި އެވެ.
ކޮވިޑް-19 ގެ ބްރޭކަށް ފަހު އިންޓަ ސްކޫލް ކްރިކެޓް މުބާރާތް ގްރޭޓާ މާލެ ސަރަހައްދަށް އެނބުރި އައިއިރު، މި ފަހަރުގެ މުބާރާތުގައި ފަސް ސްކޫލަކުން ބައިވެރިވި އެވެ. މުބާރާތް ކުރިއަށްދިޔައީ 13 އަހަރާއި 17 އަހަރުން ދަށުގެ އުމުރުފުރާ އިން ފިރިހެން ޑިވިޝަނާއި އަންހެން ޑިވިޝަނުގައި ދެ ސްކޫލެއްގެ މެދުގައި ކުޅެވުނު "ބިގް މެޗު" އެކެވެ.
އެ ގޮތުން، ތޭރަ އަހަރުން ދަށުގެ ފިރިހެން ޗެމްޕިއަންކަން ހޯދީ ބިލަބޮންގް އެވެ. ސަތާރަ އަހަރުން ދަށުގެ ފިރިހެން ޗެމްޕިއަންކަމާއި އަންހެން "ބިގް މެޗު" ކާމިޔާބުކުރީ ތާޖުއްދީން ސްކޫލުންނެވެ.
13 އަހަރުން ދަށުގެ އިންޓަ ސްކޫލް ޗެމްޕިއަންކަން ހޯދި ބިލަބޮންގް ސްކޫލްގެ ކުޅުންތެރިން އުފާފާޅުކުރަނީ.--- ފޮޓޯ: ކްރިކެޓް ބޯޑް އޮފް މޯލްޑިވްސް
ކުޅިވަރު އެކުވެނި ކްރިކެޓް ދަނޑުގައި ކުޅުނު މުބާރާތުގައި 13 އަހަރުން ދަށުގެ ފައިނަލުގައި ބިލަބޮންގް އިން ވަނީ ހަތް ވިކެޓުން ތާޖުއްދީން ސްކޫލް ބަލިކޮށްފަ އެވެ. މި އުމުރުފުރާގެ އެންމެ މޮޅު ފަސް ކުޅުންތެރިންނަކީ މުހިއްޔުއްދީން ސްކޫލްގެ މުހައްމަދު ނީލް ފައިޒާން އާއި ހުސެއިން އިޒާން، ތާޖުއްދީންގެ އިސްމާއިލް އައުސަމް އާއި އިސްމާއިލް މާން މުހުތަބާ އަދި ބިލަބޮންގްގެ ޝާޒިލް އެވެ.
ސަތާރަ އަހަރުން ދަށުގެ ފައިނަލްގައި މުހިއްޔުއްދީން އަތުން ތާޖުއްދީން މޮޅުވީ ނުވަ ވިކެޓުންނެވެ. މި އުމުރުފުރާގެ މޮޅު ކުޅުންތެރިންނަކީ ތާޖުއްދީންގެ އަހުމަދު ނާހިލް މުހައްމަދު، އަލްޔަން އަދި އާދަމް ހަލަފް ހަލީލްގެ އިތުރުން މުހިއްޔުއްދީންގެ ތާދު މުހައްމަދު ފައިސަލް އަދި ޖަމާލުއްދީން ސްކޫލްގެ މުހައްމަދު ޝަމަލް ޝިޔާމް އެވެ.
އަންހެން ކުޅުންތެރިންނަށް ހާއްސަ ކޮށްގެން ބޭއްވި "ބިގް މެޗު" ކާމިޔާބުކުރި ތާޖުއްދީން ސްކޫލްގެ ކުޅުންތެރިން.--- ފޮޓޯ: ކްރިކެޓް ބޯޑް އޮފް މޯލްޑިވްސް
އަންހެން ކުޅުންތެރިންނަށް ހާއްސަކޮށްގެން ކުޅުނު ބިގް މެޗުގައި 32 ލަނޑުން ތާޖުއްދީން ސްކޫލުން ވަނީ ރެހެންދި ސްކޫލް ބަލިކޮށްފަ އެވެ.
މުބާރާތުގެ ފޯމެޓް ރޭވުނު ގޮތުން، 17 އަހަރުން ދަށުގެ މެޗުތައް ކުޅެފައިވަނީ 12 އޯވަރަށެވެ. އަދި 13 އަހަރުން ދަށުގެ މެޗުތައް ކުޅެފައިވަނީ 10 އޯވަރަށެވެ.
ސްކޫލް ކްރިކެޓް މުބާރާތަކީ މީގެ ކުރިން ވެސް ގައުމީ ލެވަލަށް ކުޅުންތެރިން ނެރެދިނުމުގައި އިސް ދައުރެއް އަދާކުރި މުބާރާތެކެވެ. ކްރިކެޓް ބޯޑް އޮފް މޯލްޑިވްސް (ސީބީއެމް)ގައި މިހާރު އޮތް ލީޑަޝިޕުން ދުރު ރާސްތާ ޕްލޭނެއް ހަދައިގެން، ކްރިކެޓް ކުރިއަރުވަން ކުރެވޭ މަސައްކަތުގައި ޔޫތު ޑިވެލޮޕްމަންޓްގެ ތެރެއަށް ހުނަރުވެރި ކުޅުންތެރިން ހޯދާނެ މުބާރާތަކީ އިންޓަ ސްކޫލް މުބާރާތެވެެ.
