މިހާރު ކުރިއަށްދާ ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2023 ގެ ހއ. އަތޮޅުގެ ކުއާޓާ ފައިނަލް މެޗުތަކުން މޮޅުވެ، ހއ. ވަށަފަރާއި އުތީމު، މުރައިދޫ އަދި ފިއްލަދޫން ސެމީ ފައިނަލްގެ ޖާގަތައް ޔަގީންކޮށްފި އެވެ.
ކުއާޓާ ފައިނަލްގައި ރޭ ކެލާ އަތުން މުރައިދޫ މޮޅުވީ ޕެނަލްޓީ ޖަހައިގެން 4-2 އިންނެވެ. ފިއްލަދޫން ވަނީ ބާރަށް އަތުން 1-0 އިން މޮޅުވެފަ އެވެ. ވަށަފަރުން މާރަންދޫ ބަލިކުރީ 4-2 އިންނެވެ. އަދި ދިއްދޫ އަތުން އުތީމު މޮޅުވީ 2-1 އިންނެވެ.
މި މަހު 17 ވަނަ ދުވަހު ކުޅޭ ހއ. އަތޮޅުގެ ސެމީގައި މުރައިދޫން ކުޅޭނީ ފިއްލަދޫއާ އެވެ. އަދި ވަށަފަރުން ނުކުންނާނީ އުތީމާ ދެކޮޅަށެވެ.
ރެހެންދި ފުޓްސަލް ދަނޑުގައި ރޭ މުރައިދޫ އާއި ކެލާ ކުޅުނު މެޗު ނިމުނީ 0-0 އިން އެއްވަރުވެގެންނެވެ. ޕެނަލްޓީ ޖަހައިގެން ނަތީޖާ ނެރެން ޖެހުނުއިރު، މުރައިދޫން ވަނީ ފަސް ޕެނަލްޓީގެ ތެރެއިން ހަތަރު ޕެނަލްޓީ ވައްދާލައިފަ އެެވެ. ކެލާ އަށް ހަތަރު ޕެނަލްޓީގެ ތެރެއިން ކާމިޔާބު ކުުރެވުނީ ދެ ޕެނަލްޓީ އެވެ. މުރައިދޫގެ އިޔާން އަހުމަދު ރަޝީދު، އައިރޫން އަހުމަދު ރަޝީދު، ހުސެއިން އިރުފާން އަލީ އަދި އުޝާމް އަބްދުﷲ ޕެނަލްޓީ ކާމިޔާބުކުރި ނަމަވެސް އެ ޓީމުގެ އަބްދުﷲ ސާލިމް ޖެހި ޕެނަލްޓީ ވީ ނާކާމިޔާބެވެ. ކެލާ ޓީމުގެ ކީޕަރު އަބްދުﷲ ޒިމާމާއި އަހުމަދު އިނާދުގެ ޕެނަލްޓީ ނާކާމިޔާބުވިއިރު، އެ ޓީމުގެ އަހުމަދު އިނާދާއި އަލީ އިމާދު ވަނީ ޕެނަލްޓީ ވައްދާލައިފަ އެވެ.
ވަށަފަރު ޓީމުގެ ސިނާން (ކ) މާރަންދޫ ޓީމުގެ ހަމްދޫން ކައިރިން ބޯޅަ ހިފައިގެންދާން މަސައްކަތް ކުރަނީ.--- ފޮޓޯ: މުހައްމަދު ޝާބިން/ އަދަދު
ބާރަށް ކައިރިން ފިއްލަދޫން ކުރިހޯދީ އެންމެ ގޯލަކުންނެވެ. މި މެޗުގައި ފެނިގެންދިޔަ ހަމައެކަނި ގޯލު ޖެހީ ފިއްލަދޫ ޓީމުގެ އަލީ ކާމިލް އެވެ.
ދިއްދޫން ވަނީ މިރޭގެ މެޗުގެ ފުރަތަމަ ހާފުގެ ފަހުކޮޅުގައި ފާއިގު އަހުމަދު ހުސްކޮށް އަރައި ޖެހި ގޯލަކުން ލީޑުނަގައިފަ އެވެ. އުތީމުން މެޗުގެ ނަތީޖާ އަނބުރާލީ ދެ ވަަނަ ހާފުގަ އެވެ. އެ ޓީމަށް ނަތީޖާ ހަމަހަމަކޮށްދިން ގޯލު ޖެހީ އަހުމަދު އައިހަމް ރަނގަޅު ވަގުތުގައި ބޯޅަ ފޮނުވާލައިގެންނެވެ. މެޗުގެ އިތުރު ވަގުތުގައި އުތީމު މޮޅުކޮށްދިން ގޯލު ޖެހީ ވެސް އައިހަމް އެވެ. އައިހަމް މި ގޯލު ޖެހީ ހިލޭ ޖެހުމަކުން ގޯލުގެ ކަނަށް ބޯޅަ ފޮނުވާލައިގެންނެވެ.
މި ފަހަރުގެ މުބާރާތުގައި މޮޅު ކުޅުމެއް ދައްކަމުން އަންނަ ވަށަފަރުން ވަނީ މިރޭ މާރަންދޫ ކައިރިން ފަހަތުން އަރައި ކާމިޔާބު ހޯދައިފަ އެވެ. މާރަންދޫގެ ސަމްހާން އަބްދުލް ރަހުމާން އާއި މުހައްމަދު ސާޖިދު ގޯލުތައް ޖެހިއިރު، ވަށަފަރު ކޮޅަށް ނަތީޖާ އެނބުރުމުގައި އެންމެ ބޮޑު ރޯލެއް ކުޅުނީ އެ ޓީމުގެ ސާޖިދު ރަޝީދުގެ އެވެ. އޭނާ ވަނީ ހެޓްރިކެއް ހަދައިފަ އެވެ. އަނެއް ގޯލު ޖެހީ އަބްދުﷲ ސިނާން އެވެ.
މުބާރާތުގައި މިރޭ ހުރި މެޗުތައް:
20:00 - ތ. ވޭމަންޑޫ - ތ. ހިރިލަންދޫ
20:00 - ގދ. މަޑަވެލި - ގދ. ހޯޑެއްދޫ
21:00 - ތ. ގާދިއްފުށި - ތ. އޮމަދޫ
21:00 - ގދ. ގައްދޫ - ގދ. ތިނަދޫ
22:00 - ލ. އިސްދޫ - ލ. މާބައިދޫ
22:00 - ލ. ގަން - ލ. ކަލައިދޫ
23:00 - އދ. ފެންފުށި - އދ. އޮމަދޫ
23:00 - އދ. ދަނގެތި - އދ. މާމިިގިލި
