އިސްތަންބޫލް، ތުރުކީ (ފެބްރުއަރީ 8) - ތުރުކީ އާއި ސީރިއާ އަށް އައި ބިންހެލުމުގައި ވެއްޓުނު އިމާރާތެއްގެ ހަލާކުވެފައި އޮތް ބައިތަކުގެ ތެރެއިން، ތުރުކީގެ ސުޕަ ލީގުގެ ކްލަބް، ހަތެޔާސްޕޯ އަށް ކުޅެމުން އަންނަ ގާނާގެ މިޑްފީލްޑަރު ކްރިސްޓިއަން އަޓްސޫ ސަލާމަތްކޮށްފި އެވެ.
ރެކްޓާ މިންގަނޑުން 7.8 ގެ ބާރުމިނުގެ ބިންހެލުމަކާ ގުޅިގެން ތުރުކީގައި ކުއްލި ހާލަތު އިއުލާންކޮށްފައިވާއިރު، އެ ގައުމުގެ ފުޓްބޯޅަ ސީޒަން މެދުކަނޑާލަން ތުރުކީގެ ފުޓްބޯޅަ ފެޑެރޭޝަނުން ވަނީ ނިންމައިފަ އެވެ. ހަތަރު ހާހަށް ވުރެ ގިނަ މީހުން މަރުވެފައިވާ ކަމަށް ރިޕޯޓްތައް ބުނާއިރު، ވީނުވީއެއް ނޭނގި ގެއްލިފައިވާ މީހުންގެ އަދަދު ވެސް އިތުރެވެ.
ބިންހެލުމުގެ އަސަރު އެންމެ ބޮޑަށް ކުރި ސަރަަހައްދު ހަތެޔާގެ ކްލަބް، ހަތެޔާސްޕޯ އަށް ކުޅެމުން އަންނަ އަޓްސޫ، 31، ގެ އިތުރުން އެ ކްލަބްގެ ސްޕޯޓިން ޑިރެކްޓަރު، ތަނޭރު ސަވޫތު ވެސް ވީނުވީއެއް ނޭނގިގެން ހަތެޔާސްޕޯގެ ނައިބު ރައީސް މުސްތަފާ އޯޒާތު ވަނީ މީޑިއާގައި ކަންބޮޑުވުން ފާޅުކޮށްފަ އެވެ.
ގާނާގެ ފުޓްބޯޅަ އެސޯސިއޭޝަނާއި ހަތެޔާސްޕޯ އިން ވެސް ވަނީ އަޓްސޫ ސަލާމަތްކުރެވިފައިވާ ކަމަަށް ބުނެފަ އެވެ. އެކަމަކު، ހަތެޔާސްޕޯގެ ނައިބު ރައީސް އޯޒާތު ބުނީ ސަވޫތު ހޯދަން ކުރާ މަސައްކަތުގައި އަދި ކާމިޔާބެއް ނުލިބޭ ކަމަށެވެ.
ކުރިން އިނގިރޭސި ޕްރިމިއާ ލީގުގައި ޗެލްސީ، ނިއުކާސަލް ޔުނައިޓެޑް، އެވަޓަން އަދި ބޯންމައުތަށް ވެސް ކުޅުނު އަޓްސޫ އަށް، އެކިވަރުގެ އަނިޔާތަކެއް ލިބިފައިވާއިރު، 24 ގަޑިއިރެއްހާއިރު، އޭނާ ވެއްޓުނު އިމާރާތުގެ ތެރޭގައި ތާށިވެފައި އޮތެވެ. މިހާރު ހޮސްޕިޓަލްގައި ފަރުވާ ދެމުން އަންނައިރު، ގާނާ ފުޓްބޯޅަ އެސޯސިއޭޝަނުން އަންނަނީ އޭނާގެ ކަންކަން ގާތުން ބަލަމުންނެވެ.
ސައުދީ އަރަބިއްޔާގެ އަލް ރާއެދް ދޫކޮށް މިދިޔަ ސެޕްޓެމްބަރު މަހު ހަތެޔާސްޕޯ އަށް ބަދަލުވި އަޓްސޫ ވަނީ ގާނާ ގައުމީ ޓީމަށް 65 މެޗު ކުޅެފަ އެވެ. މިދިޔަ އާދިއްތަ ދުވަހު، ތުރުކީ ސުޕަ ލީގުގައި ހަތެޔާސްޕޯ ކުޅުނު މެޗުގެ ފަހު ވަގުތުގައި އެ ޓީމު މޮޅުވި ގޯލު ޖެހީ އަޓްސޫ އެވެ. މެޗުގެ އިތުރު ވަގުތުގައި ކަސިމްޕާސާ ކޮޅަށް އަޓްސޫ މި ގޯލު ޖެހީ ހިލޭ ޖެހުމަކުންނެވެ.
