މިހާރު ކުރިއަށްދާ، "ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2023" ގައި ރޭ ކުޅުނު މެޗުތަކުން ގއ. ދެއްވަދޫ އާއި ރ. ދުވާފަރުން ބޮޑު މޮޅަކާ އެކު މުބާރާތް ފަށައިފި އެވެ.
ރޭ ކުޅުނު ރ އަތޮޅުގެ ގްރޫޕް އެކެއްގެ މެޗުން މީދޫ އަތުން ދުވާފަރު ވަނީ 6-1 އިން މޮޅުވެފަ އެވެ. ދުވާފަރުން ރޭގެ މެޗުގައި ލަނޑުތައް ޖެހީ އާދަމް އިލްޔަސައު އާއި މުހައްމަދު ޖުމާން އަހުމަދު ކޮންމެ ކުޅުންތެރިއަކު ދެ ގޯލާއި މުހައްމަދު އިސާމް އާއި އަހުމަދު އީސާ އެވެ. މީދޫގެ ހަމައެކަނި ލަނޑު ޖެހީ ރަޝާދު އަބްދުލް މަތީން އެވެ.
ގއ. ގްރޫޕް އެކެއްްގައި ގެމަނަފުށި އަތުން ދެއްވަދޫ 5-0 އިން މޮޅުވިއިރު، މި ގްރޫޕްގެ އަނެއް މެޗުން މާމެންދޫ ވަނީ 3-0 އިން ވިލިނގިލި ބަލިކޮށްފަ އެވެ. ގއ. ގެ ގްރޫޕް ދޭއްގައި ކޮނޑޭ އަތުން ކަނޑުހުޅުދޫ 3-0 އިން މޮޅުވިއިރު، އެ ގްރޫޕްގެ އަނެއް މެޗުން ދާންދޫ އަތުން ނިލަންދޫ ވަނީ 2-1 އިން ކުރިހޯދައިފަ އެވެ. ށ. އަތޮޅުގެ ގްރޫޕް އެކެއްގައި ރޭ ކަނޑިތީމުން 4-2 އިން ބިލެތްފަހި ބަލިކުރިއިރު، މިލަންދޫ އާއި މަރޮށި ވަނީ 2-2 އިން އެއްވަރުވެފަ އެވެ. އަދި ށ. އަތޮޅު ދެ ވަނަ ގްރޫޕްގައި ކުޅުނު މެޗުގައި ފޯކައިދޫން ފީވަށް ބަލިކުރީ 1-0 އިންނެވެ.
ރެހެންދި ފުޓްސަލް ދަނޑުގައި ރޭ ކުޅުނު ފުރަތަމަ މެޗުން ދެއްވަދޫ އިން މާމެންދޫ ބަލިކުރިއިރު، ގޯލުތައް ޖެހީ ޓީމުގެ ކެޕްޓަން، ނަސޫހު ސައީދު ދެ ގޯލާއި ރަޝްވާން ރަޝީދު އަދި އައިމަން ތައުފީގު އެވެ. ދެއްވަދޫ އިން ގިނަ ގޯލުތައް ޖެހީ އޭރިއާބޭރުން ފޮނުވާލި ހަމަލާތަކުންނެވެ. މާމެންދޫން ވިލިނގިލި ބަލިކުރިއިރު، ގޯލުތައް ޖެހީ ރައުހާން ރިއްފަތު ދެ ގޯލާއި އަހުސާމް ހަސަން ދީދީ އެވެ.
ކަނޑުހުޅުދޫ އާއި ކޮނޑޭ ބައްދަލުކުރި މެޗުގެ ތެރެއިން.--- ފޮޓޯ: މުހައްމަދު ޝާބިން/ އަދަދު
ކޮނޑޭ އާއި ކަނޑުހުޅުދޫ ބައްދަލުކުރި މެޗުގައި ރެފްރީގެ ނިންމުމަކާ ހެދި މެޗުގެ ދެ ވަނަ ހާފުގެ ވަކި ހިސާބަކުން މެޗު މެދުކަނޑާލި ނަމަވެސް ފަހުން މެޗު ވަނީ ފުރިހަމަކޮށްފަ އެވެ. ކަނޑުހުޅުދޫ އަށް މި މެޗުގައި ލަނޑުތައް ޖަހައިދިނީ މުހައްމަދު ޒައިން ނިޔާޒާއި އަލީ އަޒްވާން އަބްދުލް އަޒީޒް އެވެ. ނިލަންދޫން ދާންދޫ ބަލިކުރިއިރު، ނިލަންދޫގެ ގޯލުތައް ޖެހީ މަމްދޫހު އިބްރާހިމް އެވެ. ދާންދޫގެ ހަމައެކަނި ލަނޑު ޖެހީ އިސްމާއިލް ނަސީރު އެވެ.
ބިލެތްފަހި އަތުން ކަނޑިތީމު މޮޅުވިއިރު، ލަނޑުތައް ޖެހީ އަހުމަދު ރިޒާން ހެޓްރިކަކާއި މުހައްމަދު ޝާން އެވެ. ބިލެތްފަހިގެ ލަނޑުތައް ކާމިޔާބުކުރީ އާދަމް އަފްރާހް އާއި އިބްރާހިމް އައިމަން އެވެ. އެ ގްރޫޕްގައި މިލަންދޫ އާއި މަރޮށި ބައްދަލުކުރި މެޗު ނިމުނީ 2-2 އެއްވަރުވެގެންނެވެ. ށ. އަތޮޅުގެ އަނެއް ގްރޫޕްގައި ފޯކައިދޫން ވަނީ މުހައްމަދު ރިސްވާން (ފުކޭ) ޖެހި ގޯލުން ފީވަށް ބަލިކޮށްފަ އެވެ.
ޖުމްލަ 102 ޓީމު ވާދަކުރާ މި ފަހަރުގެ ގޯލްޑަން ފުޓްސަލް ޗެލެންޖްގައި މިއަދު ވެސް އަށް މެޗެއް ކުޅޭނެ އެވެ. އެ ގޮތުން، 8 ޖަހާއިރު، ކުޅޭނީ ހއ. ތަކަންދޫ އާއި ހއ. މުރައިދޫގެ މެޗާއި ހދ. ވައިކަރަދޫ އާއި ހދ. ނެއްލައިދޫގެ މެޗެވެ. ދެން އެ އަށް ފަހު، 9 ޖަހާއިރު އޮތީ، ހއ. ދިއްދޫ އާއި ހއ. ފިއްލަދޫގެ މެޗާއި ހދ. ފިނޭ އާއި ހދ. މަކުނުދޫ ކުޅޭ މެޗެވެ. ދިހައެއް ޖަހާއިރު ކުޅޭނީ ހއ، މާރަންދޫ އާއި ތުރާކުނުގެ މެޗާއި ހއ. އުތީމާއި އިހަވަންދޫ ބައްދަލުކުރާ މެޗެވެ. މިރޭ އެންމެ ފަހުން ކުޅޭ މެޗުތައް 11 ޖަހާއިރު ފަށާއިރު، އެ ވަގުތު ކުޅޭނީ ހއ. ބާރަށާއި ކެލާގެ މެޗާއި ހއ. ހޯރަފުށްޓާއި ވަށަފަރު ބައްދަލުކުރާ މެޗެވެ.
