މަނަމާ، ބަހްރޭން (ފެބްރުއަރީ 1) - އޭޝިއާގެ މައި ފުޓްބޯޅަ އިދާރާ (އޭއެފްސީ)ގެ ރައީސްގެ މަގާމަށް ތިން ވަނަ ދައުރަކަށް، ބަހްރޭނުގެ ޝެއިހް ސަލްމާން ބިން އިބްރާހިމް އެލް ހަލީފާ އިންތިހާބުވެވަޑައިގެންފި އެވެ.
ބަހުރޭންގެ ޝާހީ އާއިލާގެ ބޭފުޅެއް ކަމަށްވާ ޝެއިހް ސަލްމާން އޭއެފްސީގެ ރައީސްގެ މަގާމުގެ ތިން ވަނަ ދައުރަކަށް، މިއަދު އިންތިހާބުވެވަޑައިގަތީ، ބަހްރޭނުގައި ކުރިއަށްގެންދިޔަ، 33 ވަނަ އޭއެފްސީ ކޮންގްރެސްގަ އެވެ. ޝެއިހް ސަލްމާން އަކީ ފީފާގެ ނައިބު ރައީސްގެ މަގާމު ވެސް ފުރުއްވަމުން އަންނަ ފަރާތެވެ.
ވާދަކުރާނެ އިތުރު ކެންޑިޑޭޓަކު ނެތި، ޝެއިހް ސަލްމާން، ރައީސް ކަމުގެ އިތުރު ދައުރެއް މިއަދު ފައްޓަވާއިރު، އޭނާ އެންމެ ފުރަތަމަ 2013 ވަނަ އަަހަރު އޭއެފްސީގެ އިސް ވެރިޔާގެ މަގާމާ ހަވާލުވެވަޑައިގަތީ، އޭރުގެ ރައީސް މުހައްމަދު ބިން ހަންމާމު މަގާމުން ވަކިވުމުންނެވެ. ގަތަރުގެ ވިޔަފާރިވެރިޔާ، ހަންމާމު، އަށް ފުޓްބޯޅައިގެ ހަރަކާތްތަކުން އުމުރު ދުވަހުގެ ސަސްޕެންޝަނެއް ދިނީ ކޮރަޕްޝަނުގެ ތުހުމަތާ އެކު އެވެ.
ހަންމާމުގެ ދައުރުގެ ފަހު ދެ އަހަރު ރައީސްކަން ކުރެއްވި، ޝެއިހް ސަލްމާން ވަނީ 2015 އާއި 2019 ވަނަ އަހަރު އޭއެފްސީގެ ރައީސްގެ މަގާމަށް އިންތިހާބުވެވަޑައިގެންފަ އެވެ. އަދި ކުރިން ދެ ފަަހަރެކޭ އެއްގޮތަށް މި ފަހަރު ވެސް ޝެއިހް ސަލްމާނާ އިދިކޮޅަށް ނިކުންނާނެ ކެންޑިޑޭޓެއް ނެތެވެ.
"އިތުރު ހަތަރު އަހަރުގެ ދައުރަކަށް އަހަރެން މި މަގާމުގައި ބަހައްޓަން ނިންމީތީ އެންމެނަށް ޝުކުރު އަދާކުރަން،" މިއަދުގެ ކޮންގްރެސްގައި ޝެއިހް ސަލްމާން ވިދާޅުވި އެވެ. "މިހާރު އޭޝިއާގެ ފުޓްބޯޅަ މި ދަނީ ބޮޑު ބަދަލުތަކެއް އަންނާނެ މިސްރާބަކުން،"
ފީފާގެ ކޮންގްރެސްގެ ތެެރެއިން އިންފަންޓީނޯ (ކ) އާއި ޝެއިހް ސަލްމާން.
ފީފާގެ ރައީސްގެ މަގާމަށް 2016 ވަނަ އަހަރު ޖިއާނީ އިންފަންޓީނޯ އިންތިހާބުވެވަޑައިގަތްއިރު، ޝެއިހް ސަލްމާން އަކީ އިންފަންޓީނޯއާ ވާދަކުރައްވަން ނުކުތް ކެންޑިޑޭޓެކެވެ. އެކަމަކު، ފަހަކަށް އައިސް އިންފަންޓީނޯ އާއި ޝެއިހް ސަލްމާން އަކީ އަރިސް ދެބޭފުޅުންނެވެ. ޝެއިހް ސަލްމާން އިތުރު ދައުރަކަށް އިންތިހާބުވެވަޑައިގެެންނެވުމާ އެކު، އިންފަންޓީނޯ ވަނީ ޝެއިހް ސަލްމާނަށް މަރުހަބާ ދަންނަވައިފަ އެވެ.
"މި ފަހަރު ގަތަރުގައި ބޭއްވި ވޯލްޑް ކަޕަކީ އެންމެ ފުރިހަމަ މުބާރާތް، އެއާ ހަމަކުރެވޭނެ މުބާރާތެއް އަވަހަށް ނާންނާނެ،" އިންފަންޓީނޯ ވިދާޅުވި އެވެ.
ޝެއިހް ސަލްމާނާ އެކު، 2023-2027 ގެ ދައުރުގައި ނައިބު ރައީސުންގެ ގޮތުގައި ތިއްބަވާނީ، ވެސްޓް ޒޯނުގައި ލެބަނަންގެ ހައިޝަމް ހައިދަރު، ސެންޓްރަލް ޒޯނުގައި އީރާންގެ މެހްދީ ތާޖު، ސައުތު ޒޯންގައި ބޫޓާންގެ އިއުގެން ސެޝުޕް، އާސިއާން ޒޯންގައި މިޔަންމާގެ ޒައޮ ޒައޮ އަދި އީސްޓް ޒޯނުގައި މޮންގޯލިއާގެ ގަންބާތަރު އަމްގަލަންބާތަރު އެވެ.
އޭއެފްސީ އަކީ ދުނިޔޭގެ މައި ފުޓްބޯޅަ އިދާރާގެ ދަށުން އޮންނަ ބައްރުތަކުގެ ފެޑެރޭޝަންތަކުގެ ތެރެއިން އެންމެ ބޮޑު ފެޑެރޭޝަނެވެ. އެގޮތުން ފީފާގެ މެމްބަރު 211 ގައުމުގެ ތެެރެއިން، 47 ގައުމު ނިސްބަތްވަނީ އޭއެފްސީ އަށެވެ.
