ބާސެލޯނާ (ނޮވެމްބަރު 6) - ސްޕެނިޝް ލީގުގައި ރޭ ބާސެލޯނާ އިން 2-0 އިން އަލްމޭރިއާ ބަލިކޮށް ލީގުގެ ކުރިއަށް ޖެހިލައިފި އެވެ.
ރޭގެ މެޗަކީ ބާސެލޯނާގެ ޑިފެންޑަރު، ޖެރާޑް ޕީކޭ އެ ޓީމުގެ ސަޕޯޓަރުންގެ ކުރިމަތީގައި އަމިއްލަ ދަނޑުގައި ކުޅުނު ފަހު މެޗެވެ. ޕީކޭ ވަނީ ފުޓްބޯޅައިން ރިޓަޔާކުރަން ނިންމައިފަ އެވެ. ރޭގެ މެޗުގައި ބާސެލޯނާގެ ކެޕްޓަން ބޭންޑް އަޅައިގެން ކުޅުނު ޕީކޭ، 84 ވަނަ މިނިޓްގައި ބަދަލުކުރިއިރު ހުރީ ރޮވިފަ އެވެ.
ޕީކޭ، 35، މެޗަށް ފަހު ބާސެލޯނާގެ ސަޕޯޓަރުންނާ މުހާތަބުކޮށް ވާހަކަ ދެއްކިއިރު، ބުނީ އޭނާ އަކީ ބާސެލޯނާ ސަރަހައްދަށް އުފަން އެ ސިޓީގެ މީހެއް ކަމަށާއި މަރުވާނީ ވެސް އެ ތަނުގައި ކަމަށެވެ. އަދި ދިރިއުޅުމުގައި ކުރިއަށްދާއިރު، އުމުރުން ދުވަސްވުމުން ބައެއް ކަހަލަ ނިންމުންތައް ނިންމާއިރު، އެންމެ ހިތްރުހޭ ކަންކަމުން ވެސް ދުރުވާންޖެހޭ ވަގުތު އަންނާނެ ކަމަށާއި ފުޓްބޯޅައިން ވަކިވުމަކީ އެ ކަހަލަ ނިންމުމެއް ކަމަށް ޕީކޭ ވަނީ ބުނެފަ އެވެ.
"އެކަމަކު، އަހަންނަށް ޔަގީން އަދި އަހަރެން ބާސެލޯނާ އަށް ހިދުމަތް ކޮށްދޭން އެނބުރި އަންނާނެކަން،" ޕީކޭ ބުންޏެވެ.
ހޯމަ ދުވަހު ބާސެލޯނާ އިން އޮސަސޫނާ ދަނޑުގައި ކުޅޭ މެޗަކީ ޕީކޭގެ އެންމެ ފަހު މެޗަށް ވުމުގެ ފުރުސަތު އެބައޮތެވެ. އެކަމަކު، އެ މެޗުގައި އޭނާ ބޭނުންކުރާނެ ކަމުގެ ޔަގީންކަމެއް ނެތެވެ.
ބާސެލޯނާ އަށް ރޭގެ މެޗުގައި ލީޑުނަގައިދޭން ފުރަތަމަ ހާފުގައި ލިބުނު ޕެނަލްޓީން ރޮބަޓް ލެވަންޑޯސްކީ ފޮނުވާލި ބޯޅަ ދިޔައީ އަރިމަތިން ބޭރުންނެވެ. ބާސެލޯނާ އިން ލީޑުނެގީ ދެ ވަނަ ހާފްގެ ތިން ވަނަ މިނިޓްގަ އެވެ. އަރިމަތިން އޮސްމާން ޑެމްބެލޭ އަށް ލިބުނު ބޯޅަ ހިފައިގެން އޭރިއާތެރެއަށް ވަދެ، އަލްމޭރިއާ ދެ ކުޅުންތެރިން ކައިިރިން ނައްޓާފައި ޑެމްބެލޭ ވަނީ ތިިރިތިިރިން ގޯލުގެ ދުރު ކަނަށް ބޯޅަ ފޮނުވާލައިފަ އެވެ.
މެޗުގެ 61 ވަނަ މިނިޓްގައި ބާސެލޯނާގެ ދެ ވަނަ ގޯލު ޖެހީ ރީބައުންސް ބޯޅައަކުން އޭރިއާތެރޭގައި ހުރި ފްރެންކީ ޑި ޔޯން އެވެ.
މި މޮޅާ އެކު ބާސެލޯނާ އެއް ވަނަ އަށް އެރީ ދެ ވަނައިގައި އޮތް ރެއާލް މެޑްރިޑަށް ވުރެން އެއް މެޗު އިތުރަށް ކުޅެގެންނެވެ. ބާސެލޯނާ އަށް 13 މެޗުން 34 ޕޮއިންޓް ލިބިފައިވާއިރު، ރެއާލަށް 12 މެޗުން ލިބިފައިވަނީ 32 ޕޮއިންޓެވެ.
