އިންޑިއާގެ ނާގްޕޫރުގައި މިހާރު ކުރިއަށްދާ މަހަރާޝްތުރާ އިންޓަނޭޝަނަލް ޗެލެންޖްގެ މިކްސް ޑަބަލްސް އިވެންޓްގައި ރާއްޖޭގެ ޒަޔާން ޒަކީ އާއި ފާތިމަތު ނަބާހާ (ނަބާ) ގެ ޕެއާ ގަދަ 16 އިން ފުރުސަތު ހޯދައިފި އެވެ.
މި މުބާރާތުގައި ފިރިހެން ކުޅުންތެރިން ރިވައިވަލް ސްޕޯޓްސް ކްލަބްގެ ފަރާތުން ވާދަކުރާއިރު، އަންހެން ކުޅުންތެރިން ވާދަކުރަނީ ގައުމީ ސްކޮޑުންނެވެ.
ރާއްޖޭގެ އެއް ވަނަ މިކްސް ޑަބަލްސް ޕެއާ ކަމަށްވާ ޒަޔާން އާއި ނަބާހާ ވަނީ މަހަރާޝްތުރާ އިންޓަނޭޝަނަލް ޗެލެންޖްގެ ފުރަތަމަ ބުރުގައި އިންޑިއާގެ އަނޫބަވް ސަކްސޭނާ އާއި އަނޫބާ ކޯޝިކްގެ ޕެއާ އަތުން އަތުން 2-0 އިން މޮޅުވެފަ އެވެ. ޒަޔާން އާއި ނަބާގެ ޕެއާ ސެޓުތައް ގެންދިޔައީ 24-22، 21-16 އިންނެވެ. ގަދަ 16 ބުރުގައި ނަބާ އާއި ޒަޔާން ކުޅޭނީ އިންޑިއާގެ ގައުސް ޝައިކް އާއި މަނީޝާގެ ޕެއާއާ ދެކޮޅަށެވެ.
ރާއްޖޭގެ ކުޅުންތެރިން ވަނީ މި މުބާރާތުގެ ފިރިހެން ސިންގަލްސް، އަންހެން ސިންގަލްސް އަދި ފިރިހެން ޑަބަލްސް އިވެންޓްގައި މިހާތަނަށް ވާދަކޮށްފަ އެވެ. ފިިރިހެން ސިންގަލްސްގެ ކޮލިފައިންގައި ވާދަކޮށް ރާއްޖޭގެ ހައިޝަމް އިބްރާހިމް އިންޑިއާގެ ރަޖަން ޔާދަވް އަތުން ބަލިވީ 21-04، 21-11 އިންނެވެ. އިންޑިއާގެ ހާޝް އަރޯރާ އަތުން ރާއްޖޭގެ އަހުމަދު ތޯއިފް ބަލިވީ 21-07، 21-10 އިންނެވެ. އިންޑިއާގެ އޮރިޖިތު ޗަލިހާ އަތުން ރާއްޖޭގެ ރިޝްވާން ޝިޔާމް ބަލިވީ 21-11، 21-13 އިންނެވެ. ފިރިހެން ސިންގަލްސް އޯޕަން ޑްރޯގައި ވާދަކޮށް ޒަޔާން ބަލިވީ އިންޑިއާގެ ދްރޫވް ކުމާރް އަތުން 21-07، 21-08 އިންނެވެ.
ފިރިހެން ޑަބަލްސް ކޮލިފައިންގައި ތޯއިފް އާއި ޒަޔާންގެ ޕެއާ ވަނީ ހަތް ވަނަ އަށް ސީޑްކޮށްފައިވާ އިންޑިއާގެ ސިދާތު ޖާކަރު އާއި ހިމާންޝޫ ސަރޯހާގެ ޕެއާ އަތުން 21-14، 21-13 އިން ބަލިވެފަ އެވެ. ރާއްޖޭގެ ރިޝްވާން އާއި ހައިޝަމްގެ ޕެއާ އަތުން އިންޑިއާގެ އަދިތުޔާ ދިވާކަރާއި ސަކެތު ރަމަގޫނީގެ ޕެއާ މޮޅުވީ 21-08، 21-09 އިންނެވެ.
އަންހެން ސިންގަލްސް މެއިން ޑްރޯގައި އައިމިނަތު ނަބީހާގެ މައްޗަށް އިންޑިއާގެ ރުޗާ ސާވަންތު ކުރިހޯދީ 21-07، 21-12 އިންނެވެ. ނަބާ އަތުން އިންޑިއާގެ ކަނިކާ ކަންވާލް މޮޅުވީ 21-12، 21-08 އިންނެވެ. އަންހެން ޑަބަލްސްގައި މިއަދު ނަބާ އާއި ނަބީގެ ޕެއާ ކުޅޭނީ އޯޕަން ޑްރޯގަ އެވެ. ފުރަތަމަ މެޗުގައި ބައްދަލުކުރާނީ އިންޑިއާގެ މެގާ މޯޗާނާ ބޯރާ އާއި ޔަޝިކާ ޖާކަރުގެ ޕެއާއާ އެވެ.
