ކޮންމެ ކުޅިވަރެއްގައި ވެސް ކުރިމަގު ބިނާވެފައި އޮންނަނީ އެ ކުޅިވަރެއްގައި ހިމެނޭ ޒުވާން ކުޅުންތެރިންގެ މައްޗަށެވެ. ޒުވާން ކުޅުންތެރިންގެ ހުނަރާއި، ގާބިލްކަމާ އެކު މުސްތަގުބަލުގައި އެ ކުޅިވަރަކުން ހޯދޭނެ ކާމިޔާބީތަކުގެ ހިސާބު ޖަހާލަން ފަސޭހަވެ އެވެ. ބައެއް ކުޅިވަރުތަކަކީ ބައިނަލްއަގުވާމީ މަދު މުބާރާތްތަކެއް އޮންނަ ކުޅިވަރުތަކެއް ކަމަށް ވިޔަސް، ލިބޭ ކޮންމެ ފުރުސަތެއްގައި ވެސް ދިވެހިން ބޭނުން ވަނީ ކާމިޔާބީ ހޯދާށެވެ. މި ކާމިޔާބީ ހޯދަން ބޮޑެތި ޕްލޭންތައް ހަދާއިރު، ޒުވާން ކުޅުންތެރިންގެ ފެންވަރަށް ބަލައި ހިސާބު ޖަހާލަން ފަސޭހަވެ އެވެ.
އަންނަ މަހު ސިންގަޕޫރުގައި ވާދަކުރާ ނެޓްބޯޅަ ގައުމީ ޓީމަށް ބަލާއިރު، ފެންނަނީ އުއްމީދީ މަންޒަރެކެވެ. ފަހުގެ ތާރީހެއްގައި ނެޓްބޯޅަ ސީނިއާ ޓީމުން އެންމެ ގިނައިން ޒުވާން ކުޅުންތެރިން ފެންނާނެ ފަހަރަށް މި ފަހަރު ވާނެ އެވެ. ގައުމީ ޓީމުގައި ހިމެނޭ ކުޅުންތެރިންގެ ތެރެއިން ހަތަރު ކުޅުންތެރިންނަކީ 20 އަހަރުން ދަށުގެ ހަތަރު ކުޅުންތެރިންނެވެ.
ޖުނައިނާ އަހުމަދު އިޝްހާގު
ޖޫނިއާ މުބާރާތްތަކުން ފާހަގަވި ޖުނައިނާ އަށް މި އަހަރަކީ ކާމިޔާބު އަހަރެކެވެ. ގައުމީ ސްކޮޑުން މިދިޔަ އަހަރުގެ ފަހުކޮޅު ޖާގަ ހޯދި ޖުނައިނާ 19، ވަނީ އޭނާގެ ފެންވަރު މިއަހަރުގެ މުބާރާތްތަކުން ސާބިތުކޮށްދީފަ އެވެ.
ޖުނައިނާ ގައުމީ ޓީމްގެ ޕްރެކްޓިސްގައި - ފޮޓޯ: އަދަދު / މުހައްމަދު ޝާބިން
މި އަހަރު ކުރިއަށްދިޔަ ގައުމީ މުބާރާތުގެ ދެ ވަނަ ޑިވިޝަންގެ ޗެމްޕިއަން ކަން ހޯދި ޔޫތު ޔުނައިޓެޑް ސްޕޯޓްސް ކުލަބުގެ އެންމެ މުހިންމު ކުޅުންތެރިޔަކީ ޖުނައިނާ އެވެ. އެ މުބާރާތުގެ އެންމެ މޮޅު ހަތް ކުޅުންތެރިންގެ ތެރޭގައި ހިމެނުމުގެ އިތުރުން އޭނާ އަކީ ދެ ވަނަ ޑިވިޝަންގެ އެންމެ މޮޅު ކުޅުންތެރިޔާ ވެސް މެ އެވެ.
އާމިނަތު އައިނީ
ރާއްޖޭގެ ގައުމީ ޓީމާއި ޖޫނިއާ ޓީމަށް ބަލާއިރު އެންމެ ހުނަރުވެރި ކުޅުންތެރިންގެ ތެރޭގައި އައިނީ ފާހަގަކުރެވެ އެވެ. ސޯޅަ އަހަރުގެ އައިނީ އަކީ 2019 އަހަރު ބޭއްވި ސައުތު އޭޝިއަން ޖޫނިއާ ނެޓްބޯޅަ ޗެމްޕިއަންޝިޕްގައި ވާދަކުރި ގައުމީ ޓީމްގެ ކެޕްޓަނެވެ.
އައިނީގެ ލީޑާޝިޕްގެ ދަށުން ޖޫނިއާ ގައުމީ ޓީމުން އެ މުބާރާތުން ލޯ މެޑަލް ހޯދި އެވެ. ގައުމީ ޓީމު އެ މުބާރާތުގައި ކުޅުނު މެޗުތަކުގެ ތެރެއިން އެއް މެޗުގައި އައިނީ ވަނީ މޮޅު ކުޅުންތެރިޔާގެ މަގާމު ހޯދައިފަ އެވެ.
ޅަ އުމުރުގައި ގައުމީ ފެންވަރުގެ މުބާރާތްތަކުގައި ވާދަކޮށް އައިނީ ވަނީ ރަނގަޅު ކާމިޔާބީތަކެއް ވެސް ހޯދައިފަ އެވެ. އޭނާ އަކީ 2021 ވަނަ އަހަރުގެ ގައުމީ މުބާރާތުގެ އެންމެ މޮޅު ހަތް ކުޅުންތެރިންގެ ތެރޭގައި ހިމެނިފަ އެވެ. އަދި މި އަހަރު ބޭއްވި ގައުމީ މުބާރާތުގެ އެންމެ އުއްމީދީ ކުޅުންތެރިއަކީ ވެސް އައިނީ އެވެ.
މަލަކް އިސްމާއިލް މުހައްމަދު
އުމުރުން 17 އަހަރުގެ މަލަކު ސީނިއާ ގައުމީ ޓީމާ އެކު ފުރަތަމަ ތަޖުރިބާ އަށް ތައްޔާރުވާއިރު، އޭނާ އަށް މިއީ މުހިންމު އަހަރެކެވެ. ޖީސީއޯލެވެލް އިމްތިހާނު އަހަރު ނަމަވެސް މަލަކް ފެނުނީ ޕްރެކްޓިސް އަށް ފަރުވާތެރި ބުރަކޮށް މަސައްކަތްކުރާ ކުޅުންތެރިއެއްގެ ގޮތުގަ އެވެ.
މަލަކް އަކީ ވެސް 2019 އަހަރު ބޭއްވި ސައުތު އޭޝިއަން ޖޫނިއާ ނެޓްބޯޅަ ޗެމްޕިއަންޝިޕުން ބްރޮންޒް މެޑަލް ހޯދި ޓީމުގެ ކުޅުންތެރިއެކެވެ. އޭނާ އަކީ އެ ޓީމުގެ ވައިސް ކެޕްޓަނެވެ.
މަލަކް ގައުމީ ޓީމްގެ ޕްރެކްޓިސްގައި - ފޮޓޯ: އަދަދު / މުހައްމަދު ޝާބިން
ގައުމީ ލެވެލްގައި މަލަކް ހޯދާފައިވާ ކާމިޔާބީތަކަށް ބަލާއިރު، 2021 ވަނަ އަހަރުގެ އެސޯސިއޭޝަން ކަޕްގެ އެންމެ މޮޅު ހަތް ކުޅުންތެރިންގެ އޭނާ ހިމެނެ އެވެ. މީގެ އިތުރުން މިއަހަރުގެ ގައުމީ މުބާރާތުގެ ޗެމްޕިއަންކަން ހޯދި ކުޅުދުއްފުށި ޔޫތު އެންޑް ރެކްރިއޭޝަން ކުލަބް (ކޭވައިއާރުސީ)ގައިވެސް އޭނާ ހިމެނެ އެވެ.
އައިޝަތު ސަނާ އިބްރާހިމް
ގައުމީ ޓީމަށް ކުޅުންތެރިން އިތުރުކުރުމަށް ހުޅުވާލި ސެލެކްޝަންގައި ބައިވެރިވެ ޓީމުން ޖާގަ ހޯދި ސަނާ އަކީ ވަރަށް އުއްމީދީ ޑިފެންޑަރެކެވެ. ރަނގަޅު އިސްކޮޅެއް ހުރުމާ އެކު، އޭނާގެ ހުނަރަށް ބަލާއިރު 18 އަހަރުގެ ސަނާ ފާހަގަކޮށްލެވެ އެވެ.
މި އަހަރުގެ ގައުމީ މުބާރާތުގެ ދެ ވަނަ ޑިވިޝަންގެ ޗެމްޕިއަންކަން ޔޫތު ސްޕޯޓްސް ކުލަބުން ހޯދިއިރު ސަނާ ވަނީ މުހިންމު ދައުރެއް އަދާކޮށްފަ އެވެ. ދެވަނަ ޑިވިޝަންގެ އެންމެ މޮޅު ހަތް ކުޅުންތެރިންގެ ތެރޭގައި ވެސް ސަނާ ހިމެނެ އެވެ.
ގައުމީ ޓީމްގެ ކެޕްޓަން އީމާ (ކ) އާއި ޒުވާން ޑިފެންޑަރު ސަނާ (ވ) - ފޮޓޯ: އަދަދު / މުހައްމަދު ޝާބިން
ގައުމީ ޓީމްގެ ކޯޗު ނީޝާ ހަލީމް ބުނީ މި ފަހަރުގެ ޓީމުގައި ހިމެނޭ ޒުވާން ކުޅުންތެރިންނަކީ ހުރިހާ ގޮތަކުން ބަލާއިރު ވެސް މި ޓީމުން ޖާގަ ހައްގު ކުޅުންތެރިންނެވެ. އެންމެ ފަހުން ނިމުނު މުބާރާތްތަކުގައި ދެއްކި ކުޅުމާއި ޕްރެކްޓިސްތަކުގައި ދައްކަމުން އަންނަ ކުޅުމަށް ބަލާއިރު ވެސް މަންޒަރު ވަރަށް ސާފެވެ.
ގައުމީ ޓީމުގައި މިފަހަރު ތިބި ކުޅުންތެރިންގެ ތެރެއިން ސީނިއީ ޓީމާ އެކު ބައިނަލްއަގްވާމީ މެޗެއްގައި ކުޅެފައިވަނީ އެންމެ ދެ ކުޅުންތެރިންނެވެ. އެހެންކަމުން ބާކީ ތިބި 10 ކުޅުންތެރިންނާ އެކު ކޯޗު ނީޝާ އަށް އޮތީ އުނދަގޫ މަސައްކަތެކެވެ. ކުޅުންތެރިންގެ ކުޅުމުގެ ސްޓައިލަށް ބަދަލު ގެނެސް މިފަހަރު ދިވެހިރާއްޖެ އޭޝިއަން ޗެމްޕިއަންޝިޕުގައި ތަފާތު ޓީމެއްގެ ގޮތުގައި ފެންނާނެކަމަށް ކޯޗު ގަބޫލުކުރެ އެވެ.
މުޅިން އަލަށް ގައުމީ ޓީމުން ފުރުސަތު ހޯދި ނަމަވެސް މި ހަތަރު ކުޅުންތެރިންނާއިމެދުވެސް ކޯޗު ކުރަނީ ފޮނި އުއްމީދުތަކެކެވެ. ލިބޭ ފުރުސަތުގައި އެ ކުޅުންތެރިންގެ ފަރާތުން ރަނގަޅު ކުޅުމެއް ފެންނާނެކަމުގެ އިތުބާރު ކޯޗަށް އެބައޮތެވެ.
