އަންނަ ޖުލައި މަހު ކ.މާފުށީގައި ބާއްވާ އޭޝިއަން ބޮޑީބިލްޑިން ޗެމްޕިއަންޝިޕަށް ގައުމީ ބޮޑީބިލްޑިން ޓީމު ތައްޔާރުކުރަން މަތީ ފެންވަރުގެ ކޯޗެއް ކަމަށްވާ މެލޭޝިއާގެ ވޮން ހޮންގް ހަމަޖައްސައިފި އެވެ.
ހޮންގް، އަކީ ގައުމީ ބޮޑީބިލްޑިން ޓީމަށް ކޯޗުކޮށްދޭނެ ބިދޭސީ ދެ ވަނަ ކޯޗެވެ. އެންމެ ފަހުން 2019 ވަނަ އަހަރުގެ އޭޝިއާގެ ބޮޑީބިލްޑިން ޗެމްޕިއަންޝިޕަށް ގައުމީ ބޮޑީބިލްޑިން ޓީމު ޓްރެއިން ކުރީ އިންޑިއާގެ ކޯޗު އަނުރާގް އަނިލްކުމާރް އެވެ.
ބޮޑީބިލްޑިން އެސޯސިއޭޝަންގެ އޮފިޝަަލަކު، "އަދަދު" އަށް ބުނީ ވޮން ކޯޗަކަށް ގެނައީ ޖުލައި 21 ވަނަ ދުވަހުގެ ނިޔަލަށް ކަަމަށެވެ. އެއީ، ޖުލައި 15 ގައި މާފުށީގައި ފަށަން ތާވަލުކޮށްފައިވާ އޭޝިއާ ބޮޑީބިލްޑިން މުބާރާތް ނިމޭނީ ޖުލައި 21 ވަނަ ދުވަހު ކަމަށްވާތީ އެވެ.
"ޕާފޯމަންސާ ކަންކަން ބަލާފައި، ކޮންޓްރެކްޓް އިތުރުކުރުމުގެ ވިސްނުމެއް މިހުރީ،" އޮފިޝަލް ބުންޏެވެ.
ގައުމީ ޓީމުގެ ކޯޗަކަށް ހަމަޖެއްސި ވޮން ވަނީ 1999 ވަަނަ އަހަރު މިސްޓަ އޭޝިއާގެ މަގާމު ހޯދައިފަ އެވެ. އަދި 1996 އާއި 1999 ވަނަ އަހަރު މިސްޓަ މެލޭޝިއާ އަށް ހޮވުނު ވޮން ވަނީ 2002 ވަނަ އަހަރު އެމެރިކާގައި ވެސް ޝަރަފްވެރި ވަނަތަކެއް ހޯދައިފަ އެވެ. އެ ގޮތުން ބަލާއިރު ވޮން ވަނީ އެމެރިކާގެ ނިއުޔޯކްގެ އެންޕީސީ ނިއުޔޯކް މެޓްރޮޕޮލިޓާން އޯވަރޯލް ޗެމްޕިއަންކަމާއި އެންޕީސީ އީސްޓާން މުބާރާތުގެ އޯވަރޯލް ޗެމްޕިއަންކަން ހޯދައިފަ އެވެ.
ވޮން، ޕްރޯ ކެޓަގަރީގައި ވާދަކުރިއިރު، ނަގާފައިވާ ފޮޓޯއެއް.
ހިއުމަން ނިއުޓްރިޝަން އެންޑް ފުޑް ސައިންސް އިން މާސްޓާ ޑިގްރީ ހާސިލްކޮށްފައިވާ ވޮން ވަނީ 15 އަހަރަށް ވުރެ ގިނަ ދުވަހު ބޮޑީބިލްޑަރުން ޓްރެއިން ކުރުމުގައި ހަރަކާތްތެރިވެފަ އެވެ.
ރާއްޖޭގައި އޭޝިއާގެ މައި ބޮޑީބިލްޑިން މުބާރާތް ބޭއްވުމުގެ ފުރުސަތު ލިބުނީ 2019 ވަނަ އަހަރު މުބާރާތް ބާއްވަންކުރި ބިޑް ކާމިޔާބުކޮށްގެންނެވެ. އިންޑޮނީޝިއާގެ ބަތާމްގައި 2019 ވަނަ އަހަރުގެ އޭޝިއާ ޗެމްޕިއަންޝިޕްގެ ތެރެއިން އިއުލާނުކުރީ 2020 ވަނަ އަހަރު މުބާރާތް ބާއްވާނީ މާފުށީގައި ކަމަށެވެ. އެކަމަކު، ކޮވިޑް-19ގެ ސަބަބުން މިދިޔަ ދެ އަހަރު މުބާރާތް ކުރިއަށް ނުގެންދެވުނުއިރު، ބީބީއޭއެމް އިން މިހާރު ރަސްމީކޮށް އިއުލާނުކޮށްފައިވަނީ އަންނަ ޖުލައި މަހު 15-21 އަށް މާފުށީގައި މުބާރާތް ބޭއްވުމުގެ ހުރިހާ ކަމެއް ފައިނަލްވެފައިވާނެ ކަމަށެވެ.
މިއީ ރާއްޖޭގައި ހޯސްޓްކުރެވޭ ބައިނަލްއަގުވާމީ ބޮޑީބިލްޑިން ދެ ވަނަ މުބާރާތެވެ. ރާއްޖޭން ވަނީ 2001 ވަނަ އަހަރުގެ ސައުތު އޭޝިއަން ބޮޑީބިލްޑިން މުބާރާތް ބަނޑޮހުގައި ބާއްވައިފަ އެވެ.
ބޮޑީބިލްޑިން އަކީ ރާއްޖެ އަށް ގިނަ ރަން މެޑަލްތަކެއް ގެނެސްދީފައިވާ ކުޅިވަރެކެވެ. އޭޝިއާގެ މުބާރާތުން ވެސް ރާއްޖެ ވަނީ ރަން މެޑަލް ހޯދައިފަ އެވެ. އަމިއްލަ ގައުމުގައި އޭޝިއާގެ ބޮޑު މުބާރާތް ބޭއްވުމުން ދިވެހި ބޮޑީބިލްޑަރުންނަށް ކާމިޔާބު ހޯދުމަށް ފަސޭހަވެގެންދާނެ އެވެ. ބީބީއެމް އިން މައުލޫމާތު ދޭގޮތުގައި މި ފަހަރުގެ އޭޝިއާ މުބާރާތުގައި ހޯސްޓްގެ ހައިސިއްޔަތުންނާ އެކު ވީހާ ވެސް ގިނަ ބޮޑީބިލްޑަރުންނަށް ފުރުސަތު ދިނުމުގެ ގޮތުން ރާއްޖެ އިން 20 އެތުލީޓުން ވާދަކުރާނެ އެވެ. ރާއްޖޭގެ މެޑަލް ޓާގެޓަކީ 10 އެކެވެ. އެކަން ހާސިލްވެއްޖެނަމަ މިއީ ބޮޑީބިލްޑިން ތާރީހުގައި ރާއްޖެ އަށް އެންމެ ކާމިޔާބު މުބާރާތަށް ވާނެ އެވެ.
ކޯޗު ވޮން އައުމުގެ ކުރިން ގައުމީ ބޮޑީބިލްޑިންގެ ޓްރެއިނިން ކުރިއަށް ގެންގޮސްފައިވަނީ މިހާރު ވޮންގެ އެސިސްޓަންޓަކަށް ހުރި އަބްދުލް ހަސީބްގެ އިތުރުން މެނޭޖަރު، އިބްރާހިމް އަބްދުﷲގެ އެހީތެރިކަމާ އެކު އެވެ.
