އުޒްބެކިސްތާންގައި މިހާރު ކުރިއަށްދާ ދުނިޔޭގެ ބޮޑީބިލްޑިން އެންޑް ސްޕޯޓްސް ފިޒީކް މުބާރާތުގައި ރާއްޖޭން ދެ ރިހި މެޑަލް ހޯދައިފި އެވެ.
ރާއްޖެ އަށް ރިހި މެޑަލް ހޯދައިިދިނީ 65 ކިލޯގެ ބައިން މުހައްމަދު ރަޝީދު އާއި 55 ކިލޯގެ ބައިން މުހައްމަދު މޫސާ އެވެ. މީގެ ތެރެއިން މުހައްމަދު މޫސާ ވަނީ 2019 ވަަނަ އަހަރުގެ ދެކުނު އޭޝިއާ މުބާރާތުގެ 55 ކިލޯގެ ބައިން ރަން މެޑަލާއި ހަމަ އެ އަހަރު އިންޑޮނީޝިއާގެ ބަތާމްގައި ބޭއްވި އޭޝިއާގެ މުބާރާތުން ލޯ މެޑަލް ހޯދައިފަ އެވެ.
މި ފަހަރުގެ ދުނިޔޭގެ މުބާރާތުގައި ރާއްޖޭގެ ފަރާތުން ވަނީ ހަ އެތުލީޓަކު ވާދަކޮށްފަ އެވެ. މި މުބާރާތުގައި ވާދަކުރާ ގައުމީ ބޮޑީބިލްޑިން ޓީމު އެކުލަވާލާފައިވަނީ މިިދިޔަ ޖުލައި މަހުގެ 16 ވަނަ ދުވަހު ބޭއްވި ސިލެކްޝަން ތެރެއިން ހޮވާލައިގެންނެވެ.
ކޮވިޑް-19ގެ ސަބަބުން ބައިނަލްއަގުވާމީ ބޮޑީބިލްޑިން މުބާރާތްތައް ވެސް ފަސްކުރަން ޖެހުނުއިރު، މިއީ ކޮވިޑާ ގުޅިގެން އައި މެދުކެނޑުމަކަށް ފަހު ރާއްޖޭން ވާދަކުރި ބައިނަލްއަގުވާމީ ފުރަތަމަ ބޮޑީ ބިލްޑިން މުބާރާތެވެ.
ބައިނަލްއަގުވާމީ ލެވަލަށް ބަލާއިރު، އޭޝިއާ އާއި ދުނިޔޭގެ ލެވަލް މުބާރާތްތަކުގައި ރާއްޖެ އަށް ކުޅިވަރުން މިހާތަނަށް ލިބިގެންދިޔަ ޝަރަފްވެރި ކާމިޔާބީގެ ލިސްޓުގައި ބޮޑީބިލްޑިން އޮތީ ކުރީގަ އެވެ. އޭޝިއާގެ މުބާރާތުން ރާއްޖެ އަށް ބޮޑީބިލްޑިން އިން ވަނީ މިހާތަނަށް ތިން މެޑަލް ހޯދައިފަ އެވެ. އަދި ދުނިޔޭގެ މުބާރާތުން ވަނީ ހަތަރު މެޑަލް ހޯދައިފަ އެވެ.
މި އަހަރު އޭޝިއަން ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕް ބާއްވަން ނިންމީ ރާއްޖޭގަ އެވެ. ކ.މާފުށީގައި ބާއްވަން ނިންމި އެ މުބާރާތް މިހާރު ވަނީ އަންނަ އަހަރަށް ފަސްކޮށްފަ އެވެ.
