އަމިއްލަ ގައުމުގައި ސާފް ޗެމްޕިއަންޝިޕެއް ހޯސްޓްކުރަން އެފްއޭއެމުން ކުރަމުން އައި އުއްމީދު ހާސިލްވިއިރު، އޮތީ ހާއްސަކަމަކާ ވެސް ގުޅިފަ އެވެ. ސާފް ޗެމްޕިއަންޝިޕްގެ ތާރީހުގައި މިހާތަނަށް ފުރަތަމަ ފަހަރަށް ރާއްޖޭން އެކަނި މުބާރާތް ހޯސްޓްކުރާ ފަހަރު ގައުމީ ޓީމުން ނުކުންނަން ޖެހޭނީ ތަށި ދިފާއުކުރާށެވެ.
މީގެ ތިން އަހަރު ކުރިން 2018 ވަނަ އަހަރު ސާފްގެ ޗެމްޕިއަންކަން ރާއްޖެ އަށް ހޯދައިދިން ޓީމުގެ މުހިއްމު ކުޅުންތެރިޔާ އިބްރާހިމް މަހުދީ (ފޭދޫ އިއްބެ)ގެ ޓާގެޓަކީ ވެސް ސަޕޯޓަރުންގެ ކުރިމަތީގައި ތަށި ދިފާއުކުރުމެވެ.
ރާއްޖޭން އެންމެ ފުރަތަމަ 2008 ވަނަ އަހަރު ސާފް ޗެމްޕިއަންޝިޕް ހޯސްޓްކުރީ ސްރީ ލަންކާއާ ގުޅިގެންނެވެ. އެ ފަހަރު ލަންކާގައި ކުޅުނު ފައިނަލުން އިންޑިއާ ބަލިކޮށް ރާއްޖޭން ފުރަަތަމަ ފަަަހަރަށް ތަށި އުފުލާލި އެވެ. ރާއްޖޭން ދެ ވަނަ ފަހަރަށް ތަށި އުފުލާލީ 2018 ވަނަ އަހަރު ބަންގްލަދޭޝްގައި ކުޅުނު ސާފް މުބާރާތް ކާމިޔާބު ކޮށްގެންނެވެ. އެ ފަހަރު ވެސް ފައިނަަލުގައި މޮޅުވީ އިންޑިއާ އަތުންނެވެ.
އަންނަ މަހު 1-16 އަށް މާލޭގައި ކުރިއަށްދާ އުރީދޫ ސާފް ޗެމްޕިއަންޝިޕަށް ތައްޔާރުވާން ގައުމީ ޓީމުން މިހާރު އަންނަނީ ގަތަރުގައި ޓްރެއިނިން ކޭމްޕެއް ފުރިހަމަ ކުރަމުންނެވެ.
ގަތަރު ޓްރެއިނިން ކޭމްޕްގެ ތެރެއިން ރޭ ރާއްޖޭން ވަނީ ގަތަރުގެ ދެ ވަނަ ޑިވިޝަނުގެ ކްލަބް، ލުސައިލް އެފްސީ 4-3 އިން ބަލިކޮށްފަ އެވެ. އެ މެޗުގައި ފޭދޫ އިއްބެ ކުޅުނުއިރު، ރާއްޖޭން ލީޑުނަގަން އަލީ ހައިޝަމް (ޗުމްޕު) ޖެހި ގޯލަށް ފުރުސަތު ތަނަވަސްކޮށްދިނީ ފޭދޫ އިއްބެ އެވެ. ފޭދޫ އިއްބެ ބަދަލުކުރީ ދެ ވަނަ ހާފްގަ އެވެ.
2018 ވަނަ އަހަރުގެ ސާފް ޗެމްޕިއަންޝިޕްގައި ލަނޑު ޖެހުމަށް ފަހު ފޭދޫ އިއްބެ އުފާފާޅުކުރަނީ.-- ފޮޓޯ: އިމޭޖަސް.އެމްވީ
ގައުމީ ޓީމުގެ ފުރަތަމަ އެގާރައިގައި ފަހަަކަށް އައިސް ގަވާއިދުން ކުޅެމުން އަންނަ ފޭދޫ އިއްބެ ބުނީ ގައުމީ ޓީމަށް ކުޅުމަކީ ވެސް ގައުމު ތަމްސީލްކުރުން ކަމަށެވެ. އަދި ގައުމަށް ކާމިޔާބީ ހޯދައިދޭން އަބަދު ވެސް މަސައްކަތްކުރާ ގޮތަށް މި ފަހަރުގެ އަމާޒަކީ އަމިއްލަ ފަސްގަނޑުގައި ކުޅޭ ސާފް ޗެމްޕިއަންޝިޕްގެ ތަށި ދިފާއުކުރުން ކަމަށް ފޭދޫ އިއްބެ ވަނީ ބުނެފަ އެވެ.
"މި ގޮތަށް ރާއްޖޭގައި ފުރަތަމަ ފަހަރަށް (ރާއްޖޭން ހަމައެކަނި ސާފް ޗެމްޕިއަންޝިޕް ހޯސްޓްކުރާ ފަހަރު) ބާއްވާއިރު އުއްމީދަކީ ހުރިހާ ސަޕޯޓަރުންގެ އެހީއާ އެކު ތަށި ދިފާއުކުރުން،" މާޒިޔާގެ ފުރަަތަަމަ އެގާރައިގައި މޮޅު ކުޅުމެއް ދައްކާ ފޭދޫ އިއްބެ ބުންޏެވެ.
ރާއްޖޭން 2018 ވަނަ އަހަރުގެ ސާފް ޗެމްޕިއަންޝިޕްގައި ބަންގްލަދޭޝްގެ ބަންގުބަންދު ސްޓޭޑިއަމްގައި އިންޑިއާއާ ދެކޮޅަށް ކުޅުނު ފައިނަލުގައި ފުރަތަމަ ގޯލު ޖެހީ ފޭދޫ އިއްބެ އެވެ. އޭނާ ވަނީ 2019 ވަނަ އަހަރުގެ ސައުތު އޭޝިއަން ގޭމްސްގައި ނޭޕާލްގެ ކަތުމަންޑޫގައި އެ ގައުމު ކޮޅަށް ވެސް ގޯލު ޖަހައިފަ އެވެ.
މި ފަހަރުގެ ސާފް ޗެމްޕިއަންޝިޕްގައި ވާދަކުރާ ގައުމުތަކަކީ ރާއްޖެ، އިންޑިއާ، ބަންގްލަދޭޝް، ނޭޕާލް އަދި ސްރީ ލަންކާ އެވެ. މުބާރާތުގައި ވާދަކުރާ ފަސް ގައުމުގެ މެދުގައި ކުޅޭނީ ފުރަތަމަ ލީގު ބުރެކެވެ. އެ ތަނުން އެންމެ ގިނަ ޕޮއިންޓް ހޯދާ ދެ ޓީމެއް ފައިނަލަށް ދާނެ އެވެ.
މުބާރާތުގައި ރާއްޖެ ކުޅޭ ފުރަތަމަ މެޗުގައި އަންނަ މަހު އެއް ވަނަ ދުވަހުގެރޭ ނޭޕާލާ ކުޅުމަށް ފަހު ދެ ވަނަ މެޗުގައި ހަތް ވަނަ ދުވަހުގެރޭ ބަންގްލަދޭޝްއާ ބައްދަލުކުރާނެ އެވެ. ތިން ވަނަ މެޗުގައި 10 ވަނަ ދުވަހު ހަވީރު ލަންކާއާ ކުޅުމަށް ފަހު ލީގު ބުުރުގެ ފަހު މެޗުގައި އަންނަ މަހު 13 ވަނަ ދުވަހުގެރޭ ކުޅޭނީ އިންޑިއާއާ އެވެ.
