ލަންޑަން (ޖޫން 2) - އަންނަ ހަފްތާގައި ފަށާ ޔޫރޯ އަށް ތައްޔާރުވުމުގެ ގޮތުން މިރޭ ކުޅުނު ބައިނަލްއަގުވާމީ އެކުވެރިކަމުގެ މެޗުތަކުން ފްރާންސާއި އިންގްލެންޑް މޮޅުވިއިރު، ޖަރުމަނާއި ނެދަލެންޑްސް ކުޅުނު މެޗުތަކުން އެއްވަރުވެއްޖެ އެވެ.
އޮސްޓްރިއާ އަތުން އަމިއްލަ ދަނޑުގައި ކުޅުނު އިންގްލެންޑް މޮޅުވީ 1-0 އިންނެވެ. ފްރާންސް އިން 3-0 އިން ވޭލްސް ބަލިކުރިއިރު، ނެދަލެންޑްސް އާއި ސްކޮޓްލެންޑް އެއްވަރުވީ 2-2 އިންނެވެ. ޖަރުމަނުން ގޯލެއް ޖަހާފައިވަނިކޮށް ޑެންމާކުން ވަނީ 1-1 އިން އެއްވަރުކޮށްފަ އެވެ.
ވޭލްސްއާ ދެކޮޅަށް މިރޭ ކުޅުނު މެޗުގައި ފްރާންސަށް ލީޑުނަގައިދޭން އެންމެ ރަނގަޅު ފުރުސަތެއް ލިބުނީ ފަސް އަހަރު ތެރޭ ފުރަތަމަ ފަހަރަށް އެ ޓީމު ޖޯޒީގައި ކުޅުނު ފޯވާޑް ކަރިމް ބެންޒެމާ އަށެވެ. ބެންޒެމާ ފޮނުވާލި ޕެނަލްޓީ ވޭލްސްގެ ކީޕަރު ޑެނީ ވޯޑް ވަނީ މަތަކޮށްފަ އެވެ. މިއީ 2015 ވަނަ އަހަރުގެ އޮކްޓޫބަރުގެ ފަހުން ބެންޒެމާ ފްރާންސް ޓީމަށް ކުޅެދިން ފުރަތަމަ މެޗެވެ.
މި ޕެނަލްޓީ ދޭން ނިންމީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު އެވެ. ބެންޒެމާ ގޯލަށް ފޮނުވާލި ބޯޅައެއްގައި ވޭލްސްގެ ޑިފެންޑަރު ނީކޯ ވިލިއަމްސް އަތްލި ކަމަށް ބަލައި ޕެނަލްޓީއެއް ދިނެވެ. އަދި ވިލިއަމްސް އަށް ވަނީ ސީދާ ރަތް ކާޑެއް ދައްކައިފަ އެވެ.
ވޭލްސްގެ ކުޅުންތެރިއަކު މަދުވުމުގެ ފައިދާނަގައި ފްރާންސް އިން ފުރަތަމަ ހާފު ނިމުމުގެ ކުރިން ލީޑުނެގި އެވެ. މި ގޯލު ޖެހީ ކީލިއަން އެމްބާޕޭ އެވެ. ދެ ވަނަ ހާފްގައި ކުޅުން ފެށިގެން މާގިނައިރެއް ނުވެ އެންޓޮއިން ގްރީޒްމަން ވަނީ ފްރާންސްގެ ދެ ވަނަ ގޯލު ޖަހައިދީފަ އެވެ. ބަދަލު ކުޅުންތެރިއެއްގެ ގޮތުގައި ކުޅެން އެރި އޮސްމާން ޑެމްބެލޭ ވަނީ މެޗުގެ 79 ވަނަ މިނިޓްގައި ފްރާންސްގެ ތިން ވަނަ ގޯލު ޖަހައިފަ އެވެ.
އިންގްލެންޑްގެ ސަކާ ގޯލު ޖެހުމަށް ފަހު އުފާފާޅުކުރަނީ.
ފުރަތަމަ ހާފުގައި އޮސްޓްރިއާ ކޮޅަށް ގޯލެއް ޖަހަން އިންގްލެންޑްގެ ޓްރެންޓް އަލެކްސަންޑަ-އާނޯލްޑާއި ހެރީ ކޭން އަދި ބުކާޔޯ ސަކާ ފޮނުވާލި ބޯޅަތައް ގޯލަކަށް ހަދައިނުލެވުނެވެ. ދެ ވަނަ ހާފް ފަށައިގެން 12 މިނިޓް ތެރޭ އިންގްލެންޑްގެ ހަމައެކަނި ގޯލު ޖެހީ ބުކާޔޯ ސަކާ އެވެ. މިއީ އާސެނަލަށް މި ސީޒަނުގައި މޮޅު ކުޅުމެއް ދެއްކި ސަކާ އިންގްލެންޑަށް ޖަހައިދިން ފުރަތަމަ ގޯލެވެ. މިއީ އޭނާ ސީނިއާ ގައުމީ ޓީމަށް ކުޅެދިން ފަސް ވަނަ މެޗެވެ.
އޮސްޓްރިއާ އަށް އެއްވަރުކޮށްދޭން މާސެލް ސަބިޓްޒާ ޖެހި ޝޮޓް އިންގްލެންޑްގެ ކީޕަރު ޖޯޑަން ޕިކްފޯޑް އަތުގައި ޖެހިފައި އަމާޒުވީ ގޯލުގެ ހުރަސްދަނޑިއަށެވެ. އޭގެ ފަހުން ވެސް އެ ޓީމުން ވަނީ ގޯލެއް ޖަހަން ރަނގަޅު ފުރުސަތުތަކެއް ތަނަވަސްކޮށްފަ އެވެ.
ބަދަލު ކުޅުންތެރިންގެ ގޮތުގައި ކުޅެން އެރި އިންގްލެންޑްގެ ދެ ފޯވާޑުން ކަމަށްވާ ޑޮމިނިކް ކަލްވެޓް-ލެވިން އާއި އޮލީ ވަޓްކިންސް ގުޅިގެން އެޓޭކްތަކެއް ކުރި ނަމަވެސް ގޯލެއް ޖެހޭގޮތެއްނުވި އެވެ. އިންގްލެންޑް މި މެޗުން މޮޅުވި ނަމަވެސް އެ ޓީމުގެ ދެ ކުޅުންތެރިއަކަށް ވަނީ އަނިޔާވެގެން ބަދަލުކުރަން ޖެހިފަ އެވެ. އެއީ އާނޯލްޑްގެ އިތުރުން ޖެކް ގްރީލިޝް އެވެ.
އަމިއްލަ ދަނޑުގައި ކުޅުނު ޖަރުމަނުން ވަނީ ދެ ވަނަ ހާފްގެ ކުރީކޮޅުގައި ފްލޯރިއަން ނިއުހައުސް ޖެހި ގޯލުން ލީޑުނަގައިފަ އެވެ. އެކަަމަކު މެޗުގައި ރަނގަޅު ކުޅުމެއް ދެއްކި ޑެންމާކުގެ ޔޫސެފް ޕޯލްސަން ވަނީ އެ ޓީމަށް އެއްވަރުކޮށްދީފަ އެވެ.
ނެދަލެންޑްސްގެ ޑިޕާއި (ކ) އާއި ވައިނަލްޑަމް އުފާފާޅުކުރަނީ.
ނެދަލެންޑްސް ދަނޑުގައި ކުޅުނު މެޗުގައި ލީޑުނެގީ ސްކޮޓްލެންޑުންނެވެ. މެޗުގެ 11 ވަނަ މިނިޓްގައި ސްކޮޓްލެންޑްގެ ގޯލު ޖެހީ ޖެކް ހެންޑްރީ އެވެ. އެކަމަކު އޭގެ ހަ މިނިޓް ފަހުން މެމްފިސް ޑިޕާއި ވަނީ ނެދަލެންޑްސް އަށް އެއްވަރުކޮށްދީފަ އެވެ.
މެޗުގެ 64 ވަނަ މިނިޓްގައި ކެވިން ނިސްބެޓް ޖެހި ގޯލާ އެކު ސްކޮޓްލެންޑް ވަނީ އަލުން ލީޑުނަގައިފަ އެވެ. އެކަމަކު މެޗުގެ ފަހު މިނިޓްގައި ޑިޕާއި ވަނީ އިތުރު ގޯލެއް ޖަހައި ދެ ވަނަ ފަހަރަށް ނެދަލެންޑްސް އަށް އެއްވަރުކޮށްދީފަ އެވެ. މެޗުގައި ތަފާތު ކުޅުމެއް ދެއްކި ޑިޕާއި މި ގޯލު ޖެހީ ހިލޭ ޖެހުމަކުންނެވެ.
