ލަންޑަން (އޭޕްރީލް 19) - އިނގިރޭސި އެފްއޭ ކަޕްގެ ދެ ވަނަ ސެމީ ފައިނަލުގައި މިރޭ ސައުތެމްޓަން އަތުން 1-0 އިން މޮޅުވެ، ލެސްޓާ ސިޓީން 52 އަހަރަށް ފަހު މުބާރާތުގެ ފައިނަލުން ފުރުސަތު ހޯދައިފި އެވެ.
އަންނަ މަހު 15 ވަނަ ދުވަހު ކުޅޭ ފައިނަލުގައި ލެސްޓާ ބައްދަލުކުރާނީ ފުރަތަމަ ސެމީގައި މެންޗެސްޓާ ސިޓީ ކަޓުވާލުމަށް ފަހު ފައިނަލުގެ ފުރަތަމަ ޖާގަ ހޯދި ޗެލްސީއާ އެވެ. ޗެލްސީ ބަލިކޮށް މިދިޔަ އަހަރުގެ އެފްއޭ ކަޕް ކާމިޔާބުކުރީ އާސެނަލުންނެވެ. ލެސްޓާ އެންމެ ފަހުން އެފްއޭ ކަޕް ފައިނަލެއްގައި ކުުޅުނީ 1969 ވަނަ އަހަރު އެވެ.
ބްރެންޑަން ރޮޖާސްގެ ކޯޗުކަމުގައި ކުޅެމުން އަންނަ ލެސްޓާ އިން ސެމީގެ ފުރުސަތު ހޯދީ ކުއާޓާ ފައިނަލުގައި މެންޗެސްޓާ ޔުނައިޓެޑް ކަޓުވާލައިފަ އެވެ. ލެސްޓާ އިން 1982 ވަނަ އަހަރަށް ފަހު ފުރަަތަމަ ފަހަރަށް މި މުބާރާތުގެ ސެމީ ފައިނަލުގައި ކުޅުނުއިރު، އެ ޓީމު މޮޅުކޮށްދިން ގޯލު ޖެހީ ފަހަކަށް އައިސް ތަފާތު ފޯމެއްގައި ހުރި ނައިޖީރިއާގެ ފޯވާޑް ކެލެޗީ އިހެނާޗޯ އެވެ.
އިނގިރޭސި ރަސްމީ ސްޓޭޑިއަމް ވެމްބްލީ އަށް 4000 މީހުން ވައްދައިގެން ކުޅުނު މިރޭގެ މެޗުގައި ސައުތެމްޓަން އަށް ލެސްޓާ ގޯލަށް އަމާޒުކޮށް މާ ރަނގަޅު ހަމަލާތަކެއް ފޮނުވާލެވޭ ގޮތެއްނުވި އެވެ. އެ ޓިމުން އެންމެ ރަނގަޅު ހަމަލާއެއް އުފެއްދީ އިބްރާހިމް ޑިއާލޯ އެވެ. އޭނާ ފޮނުވާލި ބޯޅަ ދިޔައީ ބޭރުންނެވެ.
މެޗަށް ފަހު ލެސްޓާގެ ކޯޗު ރޮޖާސް ބުނީ ލެސްޓާގައި މިހާރު އޮތް ޓީމު އަނެއް ލެވަލަށް ދާން އެންމެ ބޭނުންވާ އެއްޗަކީ ޓްރޮފީ އެއް ހޯދުން ކަމަށެވެ. އެކަން ކުރަން ލެސްޓާ ނުކުންނަން ޖެހޭނީ ރޮޖާސްގެ ކޯޗިން ކެރިއަރު ފެށި ޗެލްސީއާ ދެކޮޅަށެވެ. ރޮޖާސް ބުނީ ފައިނަލުގައި މޮޅުވާން ކުރެވެން ހުރި ހުރިހާ މަސައްކަތެއް ކުރާނެ ކަމަށެވެ.
