ބާސެލޯނާ (އޭޕްރީލް 1) - މުސްތަގުބަލުގައި ބާސެލޯނާގެ ރައީސްކަން ކުރުމުގެ ހިޔާލެއް އަދި ނެތް ކަމަށް އެ ޓީމަށް ކުޅޭ ސްޕެއިންގެ މިޑްފީލްޑަރު ޖެރާޑް ޕީކޭ ބުނެފި އެވެ.
އުމުރުން 34 އަހަރުގެ ޕީކޭ ވަނީ މީގެ ކުރިން ބާސެލޯނާ ރައީސްކަން ކުރުމުގެ ޝައުގުވެރިކަން ގެންގުޅޭ ކަމަށް ބުނެފަ އެވެ. އެކަމަކު ދާދި ފަހުން ސްޕެއިނުގެ ނޫހަކަށް ދިން އިންޓަވިއުއެއްގައި ވާހަކަތަކެއްގެ ތެރެއިން ބާސެލޯނާގެ ރައީސްކަމަށް ޝައުގުވެރިކަން ހުރި ކަމަށް ބުނި ކަމުގައި ވިޔަސް އެއީ ޕްލޭނެއް ހަދައިގެން ކުރަން ނިންމާފައިވާ ކަމެއް ނޫން ކަމަށް ޕީކޭ ބުންޏެވެ.
ކްލަބެއްގެ ރައީސްކަން ކުރުމަކީ ކިހާ ބޮޑު ޒިންމާއެއްކަން އެނގިގެންދިޔައީ ދާދި ފަހުން ނިމިގެންދިޔަ ބާސެލޯނާގެ އިންތިހާބުގައި ކަމަށާއި ކަންތައްތައް ހިނގާދިޔަ ގޮތްތަކަށް ބަލާއިރު އެ ފަދަ މަގާމެއްގައި ހުރެވޭ ވަރަށް ފުޓްބޯޅައިގެ އެޑްމިނިސްޓްރޭޝަނުގައި މަސައްކަތްކުރުން މުހިއްމުކަން ޕީކޭ ފާހަގަކުރި އެވެ.
"މި ނިމިދިޔަ އިންތިހާބުގެ ކަންތައްތަކުގެ ތެރޭގައި އަހަރެންގެ ލޯ ހުޅުވިއްޖެ. ހާއްސަ ގޮތެއްގައި ކެންޑިޑޭޓުންގެ ބަހުސްގައި އަހަންނަށް ފެނުނީ އެ މީހުން ކްލަބެއް ކުރިއަށްގެންދަން ޕްރޮޖެކްޓްތަކެއް ގެންދާނެ ގޮތުގެ ވާހަކަތައް. އެ ހިސާބަށް އަދި އަހަރެންގެ ވިސްނުން ނުހިނގައިފާނެ. އެ ސަބަބާ ހުރެ ކަންނޭނގެ އަހަރެން ބާސެލޯނާގެ ރައީސްކަން ކުރުމުގެ ހިޔާލެއް ނެތީ," ކުރިން މެންޗެސްޓާ ޔުނައިޓެޑަށް ކުޅުނު ޕީކޭ ބުންޏެވެ.
ޕީކޭ ބުނީ އޭނާގެ އުއްމީދަކީ ދާދި ފަހުން ބާސެލޯނާގެ އިންތިހާބު ކާމިޔާބުކުރެއްވި ޖޮއާން ލަޕޯޓާގެ ލީޑަޝިޕްގައި ކުރިން އޮތް ލެވަލަށް ބާސެލޯނާ މައްޗަށް ޖައްސާލުމަށް ކަމަށެވެ.
"އަހަރެން އެދެނީ ލަޕޯޓާ އޭނާގެ މެންޑޭޓް ފުރިހަމަކުރުން. ކްލަބްގެ ދަރަނިތައް މަދުކޮށް މި ކްލަބް ކުރިއަށްދާނެ ގޮތަކަށް މަގެއް ކޮށައިދިނުން މުހިއްމު," ޕީކޭ ބުންޏެވެ.
ޕީކޭގެ އަމިއްލަ ކުންފުންޏެއް ކަމަށްވާ ކޮސްމޯސް އިންވެސްޓްމަންޓް ގްރޫޕުން އަންނަނީ އެކި ކުޅިވަރުތަކަށް ބޮޑެތި އިންވެސްޓްތަކެއް ކުރަމުންނެވެ. އެ ގޮތުން އިންޓަނޭޝަނަލް ޓެނިސް ފެޑެރޭޝަން (އައިޓީއެފް)އާ ގުޅިގެން ކޮސްމޯސް އިންވެސްޓްމަންޓުން ވަނީ ބޮޑު ކޮންޓްރެކްޓެއްގައި ސޮއިކޮށްފަ އެވެ. އެއީ އަހަރު ފަހުކޮޅުގައި އޮންނަ ފިރިހެން ޓީމް އިވެންޓް ޓެނިސް މުބާރާތް ކަމަށްވާ މަޝްހޫރު ޑޭވިސް ކަަޕް ކުރިއަށް އޮތް 25 އަހަރު އިންތިޒާމްކޮށް އޭގެއިން ވިޔަފާރީގެ ގޮތުގައި ފައިދާތަކެއް ހޯދުމަށެވެ. އެއީ ތިން ބިލިއަން ޑޮލަރުގެ އަގު ހުރި ކޮންޓްރެކްޓެކެވެ.
