ހައުސިން މިނިސްޓްރީ އާއި އިންފްރާސްޓަރަކްޗާ މިނިސްޓްރީގައި ރޯވެ އަނދަމުން އެބަ އެ އެވެ.

އެމްއެންޑީއެފުން ދަނީ އަލިފާން ނިއްވުމުގެ މަސައްކަތް ކުރަމުންނެވެ. އެ ދެ މިނިސްޓްރީ ހުރި އިމާރާތުން ދުމުގެ އިޝާރާތް ފެނުނީ ހެނދުނު ހަތެއް ޖަހާކަން ހައިރު އެވެ. ނަމަވެސް، އޭރު އިމާރާތުގެ ބޭރަށް ދުމެއް ނުނިކުމެ އެވެ.

މި ހާދިސާގައި އެއްވެސް މީހަކަށް ގެއްލުމެއް ލިބުނުކަން އަދި ނޭނގެ އެވެ. އަދި ހާދިސާ ހިނގަން މެދުވެރިވި ސަބަބެއް އަދި ނޭނގެ އެވެ.

އެމްއެންޑީއެފް ފަޔާ އެންޑް ރެސްކިއު ހުންނަނީ އެ ސަރަހައްދާ ކައިރީގައި ކަމުން، އަލިފާން ނިއްވާ ވެހިކަލްތައް ވަގުތުން ގޮސް ހަރަކާތްތެރިވާން ފެށި އެވެ. އިމާރާތުގެ ބޭރަށް ދުންގަނޑު ފަޅައިގެން ގޮސް ނުކުތީ އޭގެ އިރުގަނޑެއް ފަހުންނެވެ.

އެންވަޔަރަމެންޓު މިނިސްޓްރީ ވެސް ހުންނަނީ އަލިފާން ރޯވި އިމާރާތާ އިންވެގެންނެވެ. ނަމަވެސް މި އިމާރާތުގައި ރޯވި ކަމެއް އަދި ކަށަވަރެއް ނުވެ އެވެ.

މި ސަރަހައްދުގައި ހަރަކާތްތެރި ވަމުންދާ "އަދަދު" ގެ ނޫސްވެރިޔަކު ބުނީ ބޮޑަށް ހުޅުގަނޑު ހިފާފައި ހުރީ ހައުސިން އާއި އިންފްރާސްޓްރަކްޗާ ހިންގާ ތަނުގައި ޓިނުން ހަދާފައި ހުރި އިމާރާތުގައި ކަމަށެވެ. އެ އިމާރާތް މިހާރު ބިމާހަމަވާން ކައިރިވެފައިވާ ކަމަށް ވެސް އޭނާ ބުންޏެވެ.