މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިދިޔަ އޯގަސްޓު 1، ގައި ބޭރު ފައިސާގެ ގަވާއިދު އިސްލާހުކޮށް، 50 އަށް ވުރެ ގިނަ ކޮޓަރި ހުންނަ ޓޫރިސްޓް ހޮޓާތަކުން ކޮންމެ ޓޫރިސްޓެއްގެ ބޮލަކަށް 500 ޑޮލަރު މާރު ކުރަން ޖެހެ އެވެ.

މި ސިޔާސަތަކީ ރާއްޖޭގެ ބޭރު ފައިސާގެ ރިޒާވް ހަރުދަނާކޮށް، އިގްތިސާދީ ފްލޯތައް ހަމައަކަށް އެޅުމަށް އެޅި ފިޔަވަޅެއްގެ ގޮތުގައި ކަމަށް ސަރުކާރުން ބުނެ އެވެ. ނަމަވެސް އެ ގަވާއިދަށް ބާރުދިނުމުގެ ގޮތުން މިދިޔަ އަންގާރަ ދުވަހު އެކުލަވާލި ފޮރެކްސް ބިލުގައި ވަނީ 50 އަށް ވުރެ ގިނަ ކޮޓަރި އޮޕަރޭޓު ކުރާ ޓޫރިސްޓް ހޮޓާތަކުންގެ އެކްސްޗޭންޖް ރިކުއަމެންޓް ކޮންމެ ޓޫރިސްޓަކަށް 25 ޑޮލަރަށް ދަށްކޮށް، 24 ގަޑިއިރު ހަމަނުވާ ޓޫރިސްޓުންނަށް އެއްވެސް އަދަދެއް މާރުކުރަން ނުޖެހޭ ގޮތައް ލުޔި ދީފަ އެވެ.

އެ ބަދަލުގެ ސަބަބުން 50 އަށް ވުރެ ގިނަ ކޮޓަރި ހިމެނޭ ހޮޓާތަކަށް ވަނީ މިހާރު އަމަލު ކުރަމުންދާ ގަވާއިދާ އަޅާބަލާއިރު ވަރަށް ބޮޑު ލުޔެއް ލިބިފަ އެވެ. އޭގެ ތެރޭގައި ރައީސް ޑރ. މުހައްމަދު މުއިއްޒުގެ މަސްލަހަތު އޮންނަ, އެމަނިކުފާނުގެ ގެކޮޅުގައި ހިންގާ ޓޫރިސްޓު ހޮޓަލެއް ކަމަށްވާ "ދިމްޔާތު ސްޓޭ" ވެސް ހިމެނެ އެވެ. ރައީސްގެ ކުރީގެ ވައުދުތަކާއި ހުށަހެޅުއްވި ބަދަލުތަކާ ތަފާތުވުމުން އެމަނިކުފާނަށް ވަނީ ފާޑުކިޔުން ވެސް އަމާޒުވެފަ އެވެ.

"ދިމްޔާތު ސްޓޭ" ގެ ވެބްސައިޓުން އެނގޭ ގޮތުގައި އެ ހޮޓަލުގައި 55 ކޮޓަރި އާއި އެޕާޓްމަންޓުގެ ގޮތުގައި ވިއްކާ ހަ ތަން އޮޕަރޭޓު ކުރެ އެވެ.

އެމަނިކުފާނުގެ ސަރުކާރަށް އެއް އަހަރު ފުރުމުގެ މުނާސަބަތުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، ކޮންމެ ޓޫރިސްޓަކަށް 500 ޑޮލަރުގެ މާރުކުރަން ޖެހޭނެ ކަމަށާއި އުސޫލަށް ބަދަލެއް ނާންނާނެ ކަމަށެވެ.

ކޮންމެ މީހެއް ވެސް ގާނޫނާ ގަވާއިދަށް ތަބާވާން ޖެހޭނެ ކަމަށާއި "އަޅުގަނޑު މި ގަވާއިދަށް ބަދަލެއް ނުގެންނާނަން" ކަމަށެވެ. އެ ވަރުގަދަ ޔަގީންކަމުގެ ސަބަބުން އެ ސިޔާސަތަށް ހަރުކަށިކަމާއެކު އަމަލުކުރުމުގެ ރާގު ކަނޑައެޅިގެން ދިޔަހެން އެންމެނަށް ވެސް ހީވި އެވެ.

އެހެން ނަމަވެސް، ހުށަހެޅުއްވި ފޮރެކްސް ބިލު އޮތީ ރައީސްގެ ވާހަކައާ ތަފާތުކޮށެވެ. ޖުމުލަ 50 ކޮޓަރިން މަތިވި ނަމަވެސް ހޮޓާތަކުން ޓޫރިސްޓެއްގެ ބޮލަކަށް މާރުކުރަން ޖެހޭނީ އެންމެ 25 ޑޮލަރެވެ. މީގެ ތެރެއިން 24 ގަޑިއިރު ހަމަނުވާ ޓޫރިސްޓުން އިސްތިސްނާވެ އެވެ.

އޮކްޓޯބަރު 1، ގައި އާންމުކުރި ގަވާއިދާ ހިލާފަށް ފޮރެކްސް ގާނޫނުގައި ގެނެސްފައިވާ ބަދަލުތަކުގެ ސަބަބުން "ދިމްޔާތު ސްޓޭ" ފަދަ އިމާރާތްތަކުގައި ޓޫރިސްޓު ހޮޓާ އޮޕަރޭޓުކުރާ މީހުންނަށް ވަރަށް ބޮޑު ލުޔެއް ލިބެ އެވެ.

ސިޔާސަތަށް ގެނައި ބަދަލާ ގުޅިގެން ފަތުރުވެރިކަމުގެ ދާއިރާގެ ގިނަ ފަރާތްތަކާއި ސިޔާސި ބައެއް ފަރާތްތަކުގެ ފާޑުކިޔުން ވަނީ ސަރުކާރަށް އަމާޒުވެފަ އެވެ. މި ބަދަލުތައް ގެނައުމަށް ހުށަހަޅާފައިވާ ވަގުތާއި އެއިން ކުރާނެ އަސަރާ މެދު ގިނަ ބަޔަކު ސުވާލު އުފައްދަމުން އަންނައިރު، ބައެއް ފަރާތްތަކުން ތުހުމަތު ކުރާ ގޮތުގައި އާ ފޯރެކްސް ބިލުގައި ގައުމުގެ އިގްތިސާދީ ބޭނުންތަކަށް ވުރެ ވެރިކަމުގައި ތިއްބެވި ބޭފުޅުންގެ އަމިއްލަ މަސްލަހަތަށް އިސްކަން ދެވެ އެވެ.

ބޭރު ފައިސާގެ ގާނޫނަށް ގެންނަން ހުށަހަޅާފައިވާ ބަދަލުތަކުގެ ސަބަބުން އިންވެސްޓަރުންގެ އިތުބާރު ހީނަރުވެދާނެ ކަމަށް ޓޫރިޒަމް ދާއިރާގެ ގިނަ ބަޔަކު ބުނަމުންދާ އިރު، ސަރުކާރުން ހުށަހަޅާފައިވާ ފޮރެކްސް ބިލުގެ އިންސާފުވެރި ކަމާމެދު ޓޫރިޒަމް ދާއިރާގެ ވިޔަފާރިތަކުން ސުވާލު އުފައްދަ އެވެ.

މި ގާނޫނު ތަރައްގީވެގެންދާ ގޮތާއި، ރާއްޖޭގެ އިގްތިސާދީ ސިޔާސަތާއި ހިންގުމުގެ މިންގަނޑުތަކަށް އޭގެ ސަބަބުން ކުރިމަތިވެދާނެ ބޮޑެތި މައްސަލަތަކާއި ނުކުމެދާނެ ނުރަގަނޅު ނަތީޖާތަކުގެ މައްޗަށް ވަރަށް ބޮޑު އާންމުންގެ ކަންބޮޑުވުން އެބަ އޮތެވެ.