ދިވެހިރާއްޖެ މިއަދު މި އޮތީ އެހެން އެއްވެސް ގައުމަކާ "ޖެހިގަނެގެން" އުޅެވޭ ފަދަ ހާލަތެއްގައި ނޫން ކަމަށް ވިދާޅުވެ، އިޒްރޭލުގެ ޕާސްޕޯޓު މަނާ ކުރަން ރައްޔިތުންގެ މަޖިލީހަށް ހުށަހަޅާފައި އޮތް ބިލު އިތުރަށް ކުރިއަށް ގެންދިޔުމާމެދު ވިސްނުމަށް ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ ބުދަ ދުވަހު ގޮވާލައްވައިފި އެވެ.

އިޒްރޭލު ޕާސްޕޯޓު މަނާ ކުރަން ޖޫން 10، ގައި މަޖިލީހަށް ހުށަހަޅާފައި އޮތް ބިލުގެ މަސައްކަތް އަވަސް ކުރަން މަޖިލީހަށް އިއްޔެ ހުށަހެޅި ގަރާރާ ދެކޮޅަށް ވާހަކަ ދައްކަވަމުން ސައުދުﷲ ވިދާޅުވީ، އިޒްރޭލުގެ ޕާސްޕޯޓު މަނާ ކުރަން މަސައްކަތް ކުރާއިރު ދިވެހި ރައްޔިތުންނާމެދު ވެސް ވިސްނަންޖެހެ ކަމަށެވެ.

"އަޅުގަނޑު ހަމަ ދަންނަވަން ބޭނުންވަނީ މި ބިލު އަޅުގަނޑުމެން ކުރިއަށްގެންދިޔުމާ ދޭތެރޭގައި އިތުރަށް ވިސްނައިލަން އެބަޖެހޭ ނޫނިއްޔާމު އަޅުގަނޑުމެންގެ ދާއިރާގެ ރައްޔިތުންގެ ހިޔާލު ހޯދާލަންޖެހޭ،" ސައުދުﷲ ވިދާޅުވި އެވެ.

ސައުދުﷲ ވިދާޅުވީ އިޒްރޭލު ޕާސްޕޯޓުގައި ރާއްޖެ އެތެރެވުން މަނާ ކުރުމުގެ ކުރިން އެކަމުން ރާއްޖެއަށް ވާނީ ފައިދާތޯ ނޫނީ ގެއްލުންތޯ ވެސް ބަލަންޖެހޭ ކަމަށެވެ. އަދި އެއްވެސް ފިޔަވަޅެއް އަޅަންޖެހޭނީ "ހުރިހާ ކަމަކަށް، ހުރިހާ ގޮތަކަށް" ބަލައިގެން ކަމަށް އޭނާ ވިދާޅުވި އެވެ.

"އިޒްރޭލުގެ ޕާސްޕޯޓު މަނާކުރީމަ އަޅުގަނޑުމެންގެ ރާއްޖެއަށް ވާނީ ފައިދާތޯ ގެއްލުންތޯ ވެސް އެކަން ނިންމުމުގެ ކުރިން އަޅުގަނޑުމެން ވިސްނަންޖެހޭ. އިއްޒަތްތެރި ރައީސް، އަޅުގަނޑުމެންގެ ގައުމުގެ ހާލަތު މިއަދު މި އޮތީކީ އެހެން އެއްވެސް ގައުމަކާ ޖެހިގަނެގެން އަދި އެހެން އެއްވެސް ރައްޔިތަކާ ޖެހިގަނެގެން އުޅެވޭފަދަ ހާލަތެއްގައެއް ނޫން އިއްޒަތްތެރި ރައީސް. އަޅުގަނޑުމެންގެ ހާލަތަކީ ހުރިހާ ކަމަކަށް ވެސް ހުރިހާ ގޮތަކަށް ވެސް ބަލައިގެން ފިޔަވަޅުއަޅަންޖެހޭ ހާލަތެއް އިއްޒަތްތެރި ރައީސް،" އޭނާ ވިދާޅުވި އެވެ.

އޭގެ އިތުުރުން، އަރަބި ގައުމުތަކުން އިޒްރޭލާ ދެކޮޅަށް ނާޅާ ފިޔަވަޅެއް ދިވެހިން އަޅަންޖެހޭތޯ ވެސް އޭނާ ވަނީ ސުވާލު އުފައްދައިފަ އެވެ.

"ފަލަސްތީނުގެ ވަށައިގެން އެ ތިބަ އަރަބީންނަކީ އާއިލީގޮތުން ވެސ،ް ދަރިފަސްކޮޅުގެ ގޮތުން ވެސް އަދި ދީނީ ގޮތުން ވެސް އެއްބަނޑު އެއްބަފާ ބައެއް. އެހެންކަމުން، އަޅުގަނޑުމެންނަށްވުރެ މާ މުއްސަނދ،ި މާ ފުދުންތެރި އަދި ފަލަސްތީނު ރައްޔިތުންނާ އެހާ ގާތް ބަޔަކު ނާޅާ ފިޔަވަޅެއް އަޅުގަނޑުމެން އަޅާއިރު އަޅުގަނޑުމެންގެ ރައްޔިތުންނާ ދޭތެރޭ ވެސް އަޅުގަނޑުމެން ވިސްނަންޖެހޭ،" ސައުދުﷲ ވިދާޅުވި އެވެ.

އިޒްރޭލުގެ ޕާސްޕޯޓު މަނާ ކުރުމުގެ ބިލުގެ އެއްވެސް މަސައްކަތެއްނުކޮށް ގިނަ ދުވަސްތަކެއް ތިބުމަށްފަހު މި ހިނގާ ނޮވެމްބަރު 12، ގައި ރައްޔިތުންގެ މަޖިލީހުގެ ކަމާ ބެހޭ ކޮމިޓީއިން ނިންމީ އެ ބިލުގެ މަސައްކަތް ފެބްރުއަރީ، 2025، އާ ހަމައަށް ދިގުދެންމުމަށެވެ.

އިޒްރޭލުގެ ޕާސްޕޯޓުގައި ރާއްޖެ އެތެރެވުން މަނާ ކުރަން ވަޒީރުންގެ މަޖިލީހުން ވެސް ޖޫން، 2024، ގައި ވަނީ ނިންމައިފަ އެވެ. ނަމަވެސް އޭގެ ފަހުން ބަންޑާރަ ނައިބު އަހުމަދު އުޝާމް ވިދާޅުވެފައި އޮތީ އިޒްރޭލުގެ އެންމެން ރާއްޖެ އައުން މަނާ ކުރުމާމެދު ވިސްނަންޖެހޭ ކަމަށެވެ.