ބަންގްލަދޭޝްއާ ދެކޮޅަށް މީގެ ތިން ދުވަސް ކުރިން ކުޅުނު، ފީފާ ރެޖިސްޓާޑް އެކުވެރިކަމުގެ މެޗަށް ވުރެ މިއަދު ކުޅެން ޖެހޭ މެޗު އުނދަގޫވާނެކަން ގަބޫލުކުރަން ޖެހޭ ކަމަށާއި އެކަމަކު، އެކަންކަމަށް ވިސްނައި، ރަނގަޅަށް ތައްޔާރުވެގެން މަސައްކަތްކޮށްފިނަމަ ނަތީޖާއެއް ނެރެވޭނެ ކަމުގެ އިތުބާރު ގައުމީ ފުޓްބޯޅަ ޓީމުގެ ކޯޗު، އަލީ ސުޒޭން ބުނެފި އެވެ.

އަހަރެއް ފަހުން ގައުމީ ފުޓްބޯޅަ ޓީމު ކުޅުނު ފުރަތަމަ މެޗުގައި، މިދިޔަ ބުދަ ދުވަހު ވަނީ ބަންގްލަދޭޝް އަތުން 1-0 އިން މޮޅުވެފަ އެވެ. މިއީ، ބަންގްލަދޭޝްގައި ކުޅެގެން އެ ގައުމު އަތުން ރާއްޖެ އަށް ތާރީހުގައި ވެސް ލިބުނު ފުރަތަމަ މޮޅެވެ.

ބަންގްލަދޭޝްއާ ދެކޮޅަށް ކުޅޭ ދެ ވަނަ މެޗުގައި މިއަދު ރާއްޖޭން ނުކުންނާނެ އެވެ.

ރާއްޖޭގެ ޓީމުގައި މެޖޯރިޓީ ހިމެނެނީ، މާޒިޔާ ސްޕޯޓްސް އެންޑް ރެކްރިއޭޝަން ކުޅުންތެރިންނެވެ. މާޒިޔާ އިން ވަނީ ދާދި ފަހުން އޭއެފްސީ ޗެލެންޖް ލީގުގައި ކުޅެފަ އެވެ. ސުޒޭން ވަނީ ފުރަތަމަ މެޗުން ރާއްޖެ މޮޅުވިއިރު، މާޒިޔާގެ ކުޅުންތެރިންގެ ފަރާތުންނާއި ޖުމްލަކޮށް، މުޅި ގައުމީ ޓީމު އެކުގައި ކުރި މަސައްކަތް ފާހަގަކޮށްފަ އެވެ.

ޗެލެންޖް ލީގުގައި މާޒިޔާގެ ކިބައިން ވެސް ފެނިގެންދިޔަ ކަމަކީ، ފުރަތަމަ މެޗުގައި ދެއްކި ކުޅުން ދެން ކުޅުނު މެޗުތަކުގައި ތަކުރާރުކުރަން އުނދަގޫވުމެވެ. ސަބަަބަކީ، ރާއްޖޭގެ ފުޓްބޯޅަ ސީޒަން ނުފަށައި، ރަސްމީ މެޗެއް ނުކުޅެ ވީ މުއްދަތު ދިގުވެފައިވުމެވެ.

ގައުމީ ފުޓްބޯޅަ ޓީމުން ވެސް ކުރު މުއްދަތެއްގެ ތެރޭގައި، ގާތްގާތުގައި ދެ ވަނަ މެޗެއް ކުޅޭއިރު، އެ ފަދަ މައްސަލައެއް ކުރިމަތިވެދާނެތޯ، "އަދަދު ސްޕޯޓްސް" އިން ސުވާލުކުރުމުން ސުޒޭން ބުނީ، އެ ކަހަލަ ގޮންޖެހުންތަކެއް ހުންނާނެކަން ގަބޫލުކުރަން ޖެހޭ ކަމަށެވެ.

"ހުންނާނެ އުނދަގޫ ކަންކަން. އެކަމަކު، ގަބޫލުކުރަން ޖެހޭ، ގައުމީ ޓީމުގައި މި ހިމެނޭ ކުޅުންތެރިން އެއް ރޫހެއްގައި އެ ކުރާ މަސައްކަތް. ކަމެއް ސާބިތުކޮށްދޭން ބޭނުންވާތީ، އެއް ޖޯޝެއްގައި މޮޅުވާން ކުރި މަސައްކަތުން ނަތީޖާ ނެރެފައި އެ އޮތީ ފުރަތަމަ މެޗުގައި، އިރާދަކުރެއްވިއްޔާ، އެ މަސައްކަތް އެ އަށް ވުރެ ރަނގަޅަށް ދެ ވަނަ މެޗުގައި ވެސް ކުރާނެ ކަމުގެ އިތުބާރު އެބައޮތް،" ސުޒޭން ބުންޏެވެ.

މިއީ، އަންނަ އަހަރުގެ މާޗް މަހުގައި ފަށާ، އޭޝިއަން ކަޕް ކޮލިފައިންގެ ކުރިން ގައުމީ ޓީމު ކުޅޭނެ ފަހު މެޗެވެ. ސުޒޭން ބުނީ، އޭޝިއަން ކަޕް ކޮލިފައިން އަށް ދާއިރު ރަނގަޅު ރޫހެއްގައި ޓީމުގެ ކަންކަން އޮތުމަށް ބަންގްލަދޭޝް ދެ މެޗު ވަރަށް މުހިންމު ކަމަށެވެ.

"ކޮންމެ ގޮތެއް ވިޔަސް، އެއް އަހަރާއި ހަތަރު މަސް ވަންދެން މެޗެއް ނުކުޅެ ހުރެފައި، އޭޝިއަން ކަޕް ކޮލިފައިން އަށް ދިއުމަށް ވުރެ، ރަނގަޅު ދެ މެޗު ކުޅެގެން ނަތީޖާއަކާ އެކު ކޮލިފައިން އަށް ދިއުމަކީ ވަރަށް ރަނގަޅުވާނެ ކަމެއް، ފުޓްބޯޅަ އަށް ދިރުމެއް ވެސް ލިބޭނެ ކަމެއް،" ސުޒޭން ބުންޏެވެ.

ސުޒޭން ބުނީ، މާޒިޔާގެ ކުޅުންތެރިންނާ އެކު، ސްކޮޑުގެ ހުރިހާ ކުޅުންތެރިން އެއްކޮށް ގިނަ ޕްރެކްޓިސްތަކެއް ކޮށްލުމަށް ފަހު، ބަންގްލަދޭޝް މެޗުތައް ކުޅެން ލިބުނުނަމަ، ފުރަތަމަ މެޗުގައި އެ ދެއްކި ކުޅުމަށް ވުރެ މާ ރަނގަޅަށް ރާއްޖެ ކުޅޭނެ ކަމަށެވެ. އެކަމަކު، މުޅި ޓީމުު އެކުގައި ލިބުނު މަދު ޕްރެކްޓިސްތަކާ އެކު ވެސް ފުރަތަމަ މެޗުގައި ދެއްކި ކުޅުމާ މެދު ސުޒޭން ހިތްހަމަޖެހެ އެވެ.

"ކުރިން ކުޅުނު ޕޮޒެޝަން ފުޓްބޯޅަ ނުލައި ވެސް، ކައުންޓަ އެޓޭކުގައި ވެސް އަހަރެމެން ރަނގަޅު ގިނަ ޗާންސްތަކެއް ކްރިއޭޓްކުރި، ހަމަ ރަނގަޅު ޗާންސްތަކެއް. ދެން، މީގެ ވިސްނަން ޖެހޭ ކައުންޓަ އެޓޭކުގައި ކުޅެން ޖެހޭ ހާލަތު އައީ ކީއްވެތޯ. ކޮންމެ ގޮތަަކަށް ކުޅުނު ކަމުގައި ވިޔަސް ހިތްވަރު ފެނިއްޖެ،" ސުޒޭން ބުންޏެވެ.

ބަންގްލަދޭޝާ ދެކޮޅަށް ކުޅޭ ދެ ވަނަ މެޗުގައި ވެސް ސަޕޯޓަރުންގެ ހެޔޮދުއާ އާއި ގައުމީ ޓީމަށް ސަޕޯޓް ބޭނުންވާ ކަމަށް ސުޒޭން ވަނީ ބުނެފަ އެވެ.

ރާއްޖެ އާއި ބަންގްލަދޭޝް ކުޅޭ މެޗު ފަށާނީ މިއަދު ހަވީރު 17:00 ގަ އެވެ.