ސޯޝަލް މީޑިއާގައި އިއްޔެ ދޫކޮށްލެއްވި ނަސޭހަތުގެ ބަސްކޮޅަކީ، ކުރިން ވެރިކަން ކުރެއްވި ބޭފުޅުންނާއި ދައުލަތުގެ އިސް މަގާމުތައް ފުރުއްވި ބޭފުޅުންނަށް ރައްދުކޮށް ދިން މެސެޖެއް ކަމަށް ނައިބު ރައީސް ހުސެއިން މުހައްމަދު ލަތީފް މިއަދު ވިދާޅުވެއްޖެ އެވެ.

އެމަނިކުފާނުގެ ރަސްމީ އެކްސް އެކައުންޓުން ކުރެއްވި ޕޯސްޓުގައި ވިދާޅުވެފައި ވަނީ، ކޮންމެ ކަމަކަށް ވެސް ވަގުތެއް ކަނޑައެޅިފައިވާ ކަމަށާއި އެންމެ ރަނގަޅު ގޮތަކީ އެ ލިބުނު ވަގުތަށް ޝުކުރުވެރިވުން ކަމަށެވެ.

"އެ ލިބުނު ވަގުތަށް އިހުތިރާމުކޮށް ޝުކުރުވެރި ވުމުން ލިބޭ ގަދަރާއި އުފާވެރިކަން މާ ރަނގަޅު. އެއްވެސް ކަމަކީ ދާއިމަށް ތިމާގެ ހައްގެއް ކަމަށް ނުދެކޭށެވެ،" އެމަނިކުފާނު ލިޔުއްވާފައިވެ އެވެ.

މި ލިޔުމުގައި ހުރި ކަންކަން ސާފުކޮށްދެއްވަމުން، ނައިބު ރައީސް ވިދާޅުވި ގޮތުގައި ދައުލަތުގެ ވެރިންނާއި، އިސް މަގާމުތައް ފުރުއްވާ ބޭފުޅުންނަކީ ވަކި މުއްދަތަކަށް މަސްއޫލިއްޔަތު އަދާކުރަން ޖެހޭ ބޭފުޅުންނެވެ.

"އެ މުއްދަތު ހަމަވުމުން އެކަމަށް އިހުތިރާމު ނުކުރުމަކީ ރައްޔިތުންގެ ނިންމުމަށް އިހުތިރާމް ކުޑަކޮށް، އެ ނިންމުމަށް ގޮންޖެހުން ކަމުގައި ގަބޫލުކުރުން. އެ ފަދަ ބޭފުޅުން ކުރިއަށް އޮތް ތަނުގައި ވެސް ޒިންމާދާރުކަމާއެކު ސަރުކާރު ޖަވާބުދާރީކޮށް، ރައްޔިތުންގެ ލޯތްބާއި އިހުތިރާމް ލިބޭ ގޮތަށް މަސައްކަތް ކުރިއަށް ގެންދަވާނެ ކަމަށް އުއްމީދުކުރަން،" އެ މަނިކުފާނު ލިޔުއްވާފައިވެ އެވެ.

ނައިބު ރައީސް މި ޕޯސްޓަށް ގިނަ ބަޔެއްގެ ސަމާލުކަން ލިބުނެވެ. ސޯޝަލް މީޑިއާގައި މި ޕޯސްޓަށް ކޮމެންޓު ކުރި ބައެއް މީހުން އެ ލިޔުންކޮޅު ޝަރަހަކުރީ ސަރުކާރުގެ ތެރޭގައި މައްސަލައެއް ޖެހިގެން އެމަނިކުފާނު ލިޔުއްވި ބަސްކޮޅެއްގެ ގޮތުގަ އެވެ.