ނައިބު ރައީސް ހުސެއިން މުހައްމަދު ލަތީފުގެ ނަސޭހަތުގެ ބަސްކޮޅެއް މިއަދު ސޯޝަލް މީޑިއާ ޕްލެޓްފޯމް އެކްސްއަށް ދޫކޮށްލައިފި އެވެ.

އެމަނިކުފާނުގެ ރަސްމީ އެކްސް އެކައުންޓުން ކުރެއްވި ޕޯސްޓުގައި ވިދާޅުވެފައި ވަނީ، ކޮންމެ ކަމަކަށް ވެސް ވަގުތެއް ކަނޑައެޅިފައިވާ ކަމަށާއި އެންމެ ރަނގަޅު ގޮތަކީ އެ ލިބުނު ވަގުތަށް ޝުކުރުވެރިވުން ކަމަށެވެ.

"އެ ލިބުނު ވަގުތަށް އިހުތިރާމުކޮށް ޝުކުރުވެރި ވުމުން ލިބޭ ގަދަރާއި އުފާވެރިކަން މާ ރަނގަޅު. އެއްވެސް ކަމަކީ ދާއިމަށް ތިމާގެ ހައްގެއް ކަމަށް ނުދެކޭށެވެ،" އެމަނިކުފާނު ކުރެއްވި ޕޯސްޓުގައި އިތުރަށް ލިޔުއްވާފައިވެ އެވެ.

ނައިބު ރައީސް ކުރެއްވި ޕޯސްޓަކީ ވަކި ބޭފުޅަށް ރައްދު ކުރައްވައި ނުވަތަ ވަކި ކަމަކާ ގުޅިގެން ކުރެއްވި ޕޯސްޓެއް ކަމެއް ސާފެއް ނޫނެވެ. ނައިބު ރައީސްގެ މަގާމަށް ވަޑައިގެންނެވި ފަހުން އެފަދަ ޕޯސްޓެއް އެމަނިކުފާނު މީގެ ކުރިން ކުރައްވާފައެއް ނުވެ އެވެ.

ނައިބު ރައީސް ހުސެއިން މުހައްމަދު ލަތީފަކީ ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ ކުރީގެ މެންބަރެވެ. ކުރިން އެމަނިކުފާނު ވަނީ ކުރީގެ ރައީސް އަބްދުﷲ ޔާމީންއާއެކު ވަރަށް ގާތުން މަސައްކަތް ކުރައްވައިފަ އެވެ.

ނަމަވެސް ރައީސް މުހައްމަދު މުއިއްޒު ވެރިކަމަށް ވަޑައިގެންނެވިތާ ކުޑަ ދުވަސްކޮޅެއްގެ ތެރޭގައި ޔާމީން ވަނީ ވެރިކަން ހިންގާ ޕާޓީއާ ދުރަށްޖެހިވަޑައިގެންފަ އެވެ.