ލަންޑަން (ޖުލައި 18) - އިންގްލެންޑްގެ ކޯޗުގެ މަގާމުން ގަރެތު ސައުތުގޭޓް އިސްތިއުފާ ދިނުމާ އެކު، އެ މަގާމަށް އާ ކޯޗެއް ހަމަޖައްސަން ކުރާ މަސައްކަތުގައި އިނގިރޭސި އެފްއޭގެ ޝޯޓްލިސްޓުގެ ކުރީގައި އޮތީ ނިއުކާސަލް ޔުނައިޓެޑްގެ ކޯޗު، އެޑީ ހޯވް ކަމަށް ރިޕޯޓްތައް ބުނެފި އެވެ.

ޖެހިޖެހިގެން ދެ ޔޫރޯ ފުޓްބޯޅަ މުބާރާުތުގެ ފައިނަލުން ބަލިވުމާ އެކު، ސައުތުގޭޓް ވަނީ އަށް އަހަރަށް ފަހު، އިންގްލެންޑްގެ ކޯޗުކަން އަމިއްލަ އަށް ދޫކޮށްލައިފަ އެވެ. ސައުތުގޭޓް، އިންގްލެންޑާ އެކު ހަދާފައި އޮތް ކޮންޓްރެކްޓް ވެސް އޮތީ މި އަހަރުގެ ނިޔަލަށެވެ.

އިނގިރޭސި އެފްއޭ އިން ބުނެފައިވަނީ، އާ ކޯޗެއް ހޯދުމުގެ މަސައްކަތް ކުރަމުން އަންނަ ކަމަށެވެ. އެ ގޮތުން، އިންގްލެންޑުން ވާހަކަ ދައްކާ ކޯޗުންގެ ތެރޭގައި ހޯވްގެ އިތުރުން، ޗެލްސީ އަށް ކުރިން އިރުޝާދުދިން ތިން ކޯޗުން ކަމަށްވާ ގްރަހަމް ޕޮޓާ، މައުރީސިއޯ ޕޮޗެޓީނޯ އަދި ތޯމަސް ޓުޗެލް ހިމެނެ އެވެ.

މީގެ ތެރެއިން، އިންގްލެންޑްގެ ޓެކްނިކަލް ޑިޕާޓްމަންޓުން ލަފާދެނީ، ހޯވް، 46، އާ އިންގްލެންޑް ހަވާލުކުރުމަށެވެ. މީގެ ކުރިން، ހޯވް ވަނީ އިންގްލެންޑާ ހަވާލުވާން ފުރުސަތު ލިބިއްޖެނަމަ ފުންކޮށް ވިސްނާނެ ކަމަށް ބުނެފަ އެވެ.

ކުރިން ބޯންމައުތަށް ކޯޗުކޮށްދިން ހޯވް، މި ވަގުތު ނިއުކާސަލްއާ ހަވާލުވެ ހުރީ ދިގު މުއްދަތުގެ ކޮންޓްރެކްޓެއްގައި ކަމަށް އެ ކްލަބުން ވަނީ ބުނެފަ އެވެ. އެ އެއްބަސްވުން އުވާލަން ދައްކަން ޖެހޭ ފީއެއް ސީދާ ހިމަނާފައިނުވާއިރު، ރިޕޯޓްތައް ބުނާގޮތުން، ހޯވް ގެންދާނަމަ، އިންގްލެންޑުން 10 މިލިއަން ޑޮލަރު ހޭދަކުރަން ޖެހޭނެ އެވެ.

އެކަމަކު، ނިއުކާސަލްގެ ސީއީއޯ، ޑަރެން އީގަލްސް ވަނީ، ހޯވް ދޫކޮށްނުލާނެ ކަމަށް ވިދާޅުވެފަ އެވެ.