ރާއްޖޭގެ ގައުމީ ހޭންޑްބޯލް ކޯޓުގައި ކުޅުނު ބައިނަލްއަގުވާމީ ފުރަތަމަ މެޗުން، ބަންގްލަދޭޝްގެ ޗެމްޕިިއަން ކްލަބް، އަންސަރުން ދިވެހި ސިފައިންގެ ކްލަބް އަތުން ކުރިހޯދައިފި އެވެ.

މިއީ، ރާއްޖެ އާއި ބަންގްލަދޭޝްގެ އަންސަރާ ދެކޮޅަށް ކުޅެން ހަމަޖެހިފައިވާ ފްރެންޑްލީ މެޗު ސީީރީސްގެ ފުރަތަމަ މެޗެވެ. ހޭންޑްބޯޅަ މޯލްޑިވްސް ރައީސް، އަހުމަދު މުޖުތަބާ (މުޖޭ) ގެ ދައުވަތަކަށް އައި އަންސަރުން އިތުރު ދެ މެޗެއް ކުޅޭނެ އެވެ.

ރޭގެ މެޗުން، ދިވެހި ސިފައިންގެ ކްލަބްގެ މައްޗަށް އަންސަރު ކުރިހޯދީ 41-27 އިންނެވެ. ފުރަތަމަ ހާފުގެ ކުޅުން ނިމިގެންދިޔައީ 19-20 އިން އަންސަރު ކުރީގައި އޮވެގެންނެވެ. ޖުމްލަކޮށް ބަލާއިރު، ފޯރިގަދަ މެޗެއް ފެނިގެންދިޔައިރު، މި މެޗުގައި އަންސަރުގެ އެމްޑީ ރޮބިއުލް އަވާލް ވަނީ 15 ލަނޑު ކާމިޔާބު ކޮށްފަ އެވެ.

މެޗުގައި ސިފައިންގެ ޓީމުގެ، އަބްދުﷲ ޒިޔާއު ހަތް ލަނޑު ކާމިޔާބުކުރިއިރު، އަހުމަދު ނަޖީބު ހަ ލަނޑު ޖެހި އެވެ. އަދި އެ ޓީމުގެ، މުހައްމަދު ޝަމާލް ފަސް ލަނޑު ކާމިޔާބުކުރި އެވެ.

ރޭގެ މެޗުގައި އިންސާފުކުރީ ދިވެހި އަންހެން ރެފްރީންނެވެ.

އަންސަރާ ދެކޮޅަށް ދެން ނުކުންނާނީ 2023 ވަނަ އަހަރުގެ ގައުމީ ޗެންޕިއަން ވެލިދޫ ޔުނައިޓެޑް އެވެ. އެ މެޗު އޮންނާނީ މާދަމާރޭ އެވެ. އަދި ފަހު މެޗުގައި އަންނަ އާދިއްތަަ ދުވަހުގެރޭ، އަންސަރާ ބައްދަލުކުރާނީ، ގައުުމީ 19 އަހަރުން ދަށުގެ ޓީމެވެ.

ރޭގެ މެޗު ޝަރަފްވެރިކޮށްދެއްވުމަށް، ސްޕޯޓްސް މިނިސްޓަރު އަބްދުﷲ ރާފިއު (ރާއްޕެ) ވަޑައިގެންނެވި އެވެ. އަދި ބަންގްލަދޭޝް ހައި ކޮމިޝަންގެ އިސް ފަރާތްތައް ވެސް ބައިވެރިވި އެވެ.