އިންޑިއާގެ ބޮޑުވަޒީރު ނަރެންދުރަ މޯދީ ހުވާ ކުރެއްވުމުގެ ރަސްމިއްޔާތު ލައިވް ކުރަން ނިންމި ހަބަރާއި އެކަމަށް ފާޑުކިޔުން އަމާޒުވި ފަހުން އެ ކަވަރޭޖު ނުގެނެސްދޭން ޕަބްލިކް ސާވިސް މީޑިއާ (ޕީއެސްއެމް) އިން ނިންމި ހަބަރަކީ "އަދަދު" އިން ޝާއިއު ކުރި މައްސަލަ ޕީއެސްއެމްއިން މޯލްޑިވްސް މީޑިއާ ކައުންސިލަށް ހުށަހަޅައިފި އެެވެ.

މޯދީ ހުވާ ކުރައްވާ ރަސްމިއްޔާތު ލައިވް ކުރަން އުޅެފައި އިއްޔެ އެކަން ކެންސަލް ކުރި ސަބަބާ ގުޅޭ ގޮތުން ޕީއެސްއެމްގެ ޑެޕިއުޓީ މެނޭޖިން ޑިރެކްޓަރު، ޔާމީން ރަޝީދުއާ ސުވާލު ކުރުމުން ވިދާޅުވީ މޯދީ ހުވާ ކުރައްވާ ރަސްމިއްޔާތު ލައިވް ކުރަން އެއް އިރަކު ވެސް ނުނިންމާ ކަމަށެވެ.

"އަޅުގަނޑުމެން އެއްވެސް އިރެއްގައި ލައިވް ކުރާކަށް ނުނިންމަން، އެއީ ކަނޑައެޅިގެން ދޮގު ހަބަރެއް،" ޔާމީން ވިދާޅުވި އެވެ.

މޯދީ ހުވާ ކުރައްވާ ރަސްމިއްޔާތު ގެނެސްދިނުމަށް ޕީއެސްއެމްއިން ހެދި ގްރެފިކްސް

އޭނާ އެހެން ވިދާޅުވި ނަމަވެސް "އަދަދު" އަށް ވަނީ ޕީއެސްއެމް ޕްރޮގްރާމްތަކުގެ ޝޫޓިން ތާވަލު ލިބިފަ އެވެ. މޯދީގެ ރަސްމިއްޔާތުގެ ލައިވް ކަވަރޭޖު ގެނެސްދިނުމަށް ޕީއެސްއެމް ޕްރޮގުރާމްތަކުގެ ޝޫޓިން ތާވަލުގައި ހިމަނާފައި އޮތީ އިއްޔެ އިރުއޮއްސި 6:00 އިން 8:00 އާ އަށެވެ. އެ ކަވަރޭޖު ގެނެސްދިނުމަށް އެގަޑިއަށް ތާވަލުކޮށް ޕްރެޒެންޓަރުންނާއި ޓެކްނީޝަނުންގެ އިތުރުން ސައުންޑް އަދި ލައިޓްްސްއަށް ވެސް މުވައްޒަފުން ހަމަޖައްސާފައިވެ އެވެ.

ޕީއެސްއެމްގެ ޝޫޓިން ތާވަލުގައި ލައިވް ކަވަރޭޖު ހިމަނާފައި

އޭގެ އިތުރުން، ކަވަރޭޖު ގެނެސްދޭއިރު ފަހަތަށް އަރުވާނެ ގްރެފިކްސް ވެސް ޕީއެސްއެމްއިން ހެދި އެވެ. އެ ގްރެފިކްސް ވެސް މި ނޫހަށް ވަނީ ލިބިފަ އެވެ. މޯދީ ހުވާ ކުރެއްވުމުގެ ރަސްމިއްޔާތު ލައިވް ކުރަން ނިންމިކަން ޕީއެސްއެމްގެ ތިން މުވައްޒަފަކު ވެސް މި ނޫހަށް ކަށަވަރުކޮށްދިނެވެ.

ޕީއެސްއެމް އިން މިއަދު މިނޫހަށް ފޮނުވި އަދި ފަހުން ސޯޝަލް މީޑިއާގައި އާއްމުކުރި ބަޔާނެއްގައި ބުނީ މޯދީ ހުވާކުރެއްވުމުގެ ރަސްމިއްޔާތު ލައިވްކުރަން އެކުންފުނިން އެއްވެސް އިރެއްގައި ނިންމާފައި ނުވާ ކަމަށާ އެހެން ނަމަވެސް ރައީސުލް ޖުމްހޫރިއްޔާ ރާއްޖޭން ބޭރަށް ވަޑައިގަންނަވާ ދަތުރުތައް ކަވަކުރާނެ ކަމަށެެވެ.

"މިއީ ހުވާކުރުމުގެ ރަސްމިއްޔާތަށް ހާއްސަކޮށް ގެނެސްދޭ ކަވަރޭޖެއް ނޫން،" އެ ބަޔާނުގައި ބުންޏެވެ.