ލަންޑަން (ޖޫން 9) - ލެސްޓާ ސިޓީގެ މިޑްފީލްޑަރު، ހަމްޒާ ޗޯދުރީ، އެންމެ ފަހުން ބަންްގްލަދޭޝް ގައުމީ ޓީމަށް ކުޅެން ނިންމައިފި އެވެ.

މީގެ ދެ އަހަރު ކުރިން ބަންގްލަދޭޝް ފުޓްބޯޅަ ފެޑެރޭޝަނުން ވަނީ ހަމްޒާގެ އާއިލާއާ މަޝްވަރާކޮށްގެން އޭނާ ބަންގްލަދޭޝް ޓީމަށް ކުޅުވަން މަސައްކަތް ފަށައިފަ އެވެ. ގިނަ އަހަރުތަކެއްގެ މަޝްވަރާ އަށް ފަހު، ހަމްޒާ މިހާރު ވަނީ ބަންގްލަދޭޝަށް ކުޅެން ނިންމައިފަ އެެވެ.

ހަމްޒާ، 26، އަކީ ބަންގްލަދޭޝް ދަރިކޮޅަށް ނިސްބަތްވާ ކުޅުންތެރިއެކެވެ. އަދި އޭނާއާ އާއިލީ ގޮތުން އެފްރިކާގެ ގްރެނާޑާއާ ވެސް ގުޅުން އެބައޮތެވެ.

ބަންގްލަދޭޝަށް ކުޅެން ހަމްޒާ ނިންމިކަން ކަށަވަރުވީ، ލަންޑަނުގައި ހުންނަ ބަންގްލަދޭޝް އެމްބަސީ އަށް ގޮސް، އެ ގައުމުގެ ޕާސްޕޯޓް ހައްދަން ހަމްޒާ ހުށަހެޅުމުންނެވެ.

ބަންގްލަދޭޝްގެ ފުޓްބޯޅަ ފެޑެރޭޝަންގެ ޖެނެރަލް ސެކްރެޓަރީ، އިމްރާން ހުސެއިން ތުޝާރު ވިދާޅުވީ، ހަމްޒާ ބަންގްލަދޭޝް ޓީމަށް ކުޅުވަން ކުރަން ޖެހޭ މަސައްކަތް ވަރަށް ބާރަށް ކުރިއަށްދާ ކަމަށެވެ.

ރިޕޯޓްތައް ބުނާގޮތުން، ހަމްޒާގެ ކަންކަން ހަމަޖެހިގެން ގޮސް، އަންނަ ސެޕްޓެމްބަރު މަހުން ފެށިގެން ބަންގްލަދޭޝް ޓީމަށް އޭނާ އަށް ކުޅެވޭނެ އެވެ.

އިނގިރޭސި 21 އަހަރުން ދަށުގެ ގައުމީ ޓީމަށް ހަތް މެޗު ކުޅެފައިވާ ހަމްޒާ، ބަންގްލަދޭޝަށް ކުޅެން ނިންމީ އިނގިރޭސި ސީނިއާ ޓީމުން އޭނާ އަށް ފުރުސަތު ނުލިބޭނެކަން ޔަގީންވުމުންނެވެ.

ހަމްޒާ ކުޅެމުން އަންނަ ލެސްޓާ ވަނީ އަންނަ ސީޒަނުގައި އިނގިރޭސި ޕްރިމިއާ ލީގަށް ޕްރޮމޯޓްވެފަ އެވެ. މީގެ ކުރިން ލެސްޓާ އިން ޕްރިމިއާ ލީގުގައި ކުޅުނުއިރު، ހަމްޒާ ވަނީ އެ ޓީމަށް ކުޅެފަ އެވެ.

މީގެ ކުރިން ވެސް ބަންގްލަދޭޝް އިން ވަނީ އެ ގައުމުގެ ދަރިކޮޅަށް ނިސްބަތްވާ ކުޅުންތެރިންނަށް ފުރުސަތު ދީފަ އެވެ. އެ ގޮތުން މި ވަގުތު ބަންގްލަދޭޝް ގައުމީ ޓީމަށް ކުޅެމުން އަންނަ ތޯރިގު ގާޒީ އަކީ މީގެ ކުރިން ފިންލެންޑްގެ ޔޫތު ގައުމީ ޓީމަށް ކުޅެފައިވާ ކުޅުންތެރިއެކެވެ.

ފީފާ އިން 2020 ވަނަ އަހަރު ގައުމީ ޓީމުގެ ކުޅުންތެރިން އެއް ގައުމުން އަނެއް ގައުމަށް ބަދަލުވުމުގެ އުސޫލަށް ވަނި ލުޔެއް ދީފަ އެވެ. އެ ގޮތުން 21 އަހަރުން މަތީގެ ކުޅުންތެރިއަކު އެއް ގައުމަށް ތިން މެޗަށް ވުރެ އިތުރަށް ނުކުޅެ ހުއްޓައި، އޭނާއާ އާއިލީ ގޮތުން ގުޅުން އޮތް އެހެން ގައުމެއްގެ ގައުމީ ޓީމަށް ކުޅެން ބަދަލުވެވޭނެ އެވެ.