ނޭޕާލުގައި މިހާރު ކުރިއަށްދާ ދެކުނު އޭޝިއާގެ ކޮލިފިކޭޝަނުގެ އަންހެން ސިންގަލްސްގެ ސެމީ ފައިނަލުން ރާއްޖޭގެ ފާތިމަތު ދީމާ އަލީ އަށް ފުރުސަތު ލިބިފައިވާއިރު، ރާއްޖޭގެ މިޝްކާ އިބްރާހިމް އަށް ސެމީ ފައިނަލުން ޖާގަ ނުލިބި ކުއާޓާ އިން މުބާރާތް ނިމިއްޖެ އެވެ.

ގްރޫޕްގެ އެއް ވަނަ ހޯދައިގެން ނޮކައުޓަށް ހޮވުނު ދީމާ އަށް ކުއާޓާގައި މެޗެއް ކުޅެން ނުޖެހުނެވެ. ސެމީ އަށް ދިމާ ދަތުރުކުރުމާ އެކު، އޭނާ މާދަމާ ފައިނަލުގެ ޖާގަ އަކަށް ކުޅޭނީ، ސްރީ ލަންކާގެ މަދުރަންގީ އިޝާރާއާ ދެކޮޅަށެެވެ. އޭނާ ސެމީން ފުރުސަތު ހޯދީ ކުއާޓާގައި، 4-3 އިން ނޭޕާލުގެ ނަބީތާ ޝްރެސްތާ، 4-3 އިން ބަލިކޮށްފަ އެވެ.

އަންހެން ސިންގަލްސްގެ ކުއާޓާ ފައިނަލުގައި ރާއްޖޭގެ މިޝްކާ ވާދަކުރީ، ސްރީ ލަންކާގެ ބަންޑާރަ ބިމަންޑީއާ ދެކޮޅަށެވެ. ބިމަންޑީ އަތުން މިޝްކާ ބަލިވީ، 4-0 އިންނެވެ. ސެޓުތައް ދިޔައީ، 11-08، 11-07، 11-05 އަދި 11-07 އިންނެވެ.

ކޮލިފައިންގައި ކުޅުނު ރާއްޖޭގެ ފިރިހެން ދެ ކުޅުންތެރިން މިއަދު ވަނީ ގްރޫޕްގެ ފަހު މެޗުތައް ކުޅެފަ އެވެ. އެ ގޮތުން، މޫސާ މުންސިފް އަހުމަދު އާއި އަޚްޔާރް އަހުމަދު ޚާލިދު ވަނީ އެ މެޗުތަކުން ބަލިވެފަ އެވެ. ގްރޫޕްގެ ތިން މެޗުން ވެސް އަހްޔާރު ބަލިވިއިރު، މުންސިފް ވަނީ ތިން މެޗުގެ ތެރެއިން އެއް މެޗުން މޮޅުވެފަ އެވެ.

މިއަދު ކުޅުނު މެޗުން ބަންގްލަދޭޝްގެ ރަމްހިމިލިއާން އަތުން އަހްޔާރް 4-0 އިން ބަލިވިއިރު، ސެޓުތައް ދިޔައީ، 10-12، 11-13، 06-11 އަދި 03-11 އިންނެވެ. މުންސިފް ބަލިވީ، ބަންގްލަދޭޝްގެ ރިދޯއި އަހުމަދު އަތުން 4-1 އިންނެވެ. މެޗުގެ ފުރަތަމަ ތިން ސެޓު ގެންދިޔައީ ރިދޯއި އެވެ. އެއީ، 13-11، 16-14 އަދި 11-08 އިންނެވެ. ހަތަރު ވަނަ ސެޓު، 09-11 އިން މުންސިފް ގެންދިިޔަ ނަމަވެސް، ދެން ކުުޅުނު ސެޓު، 11-09 އިން ގެންގޮސް ރިދޯއި މޮޅުވީ އެވެ.