މޯލްޑިވްސް އިންސްޓިޓިއުޓް އޮފް ޓެކްނޮލޮޖީ (އެމްއައިޓީ) ކޮލެޖެއްގެ ގޮތުގައި ރަޖިސްޓްރީ ކޮށްފި އެވެ.

ހަޔާ އެޑިއުކޭޝަން މިނިސްޓްރީއިން އިއްޔެ ކުރި އިއުލާނެއްގައި ބުނީ އެމްއައިޓީއިން ކޮލެޖެއްގެ ދަރަޖަ ހޯދުމަށް އެދި އެ މިނިސްޓްރީއަށް ހުށަހެޅި އެޕްލިކޭޝަން ދިރާސާކުރުމަށްފަހު، ކޮލެޖެއްގައި ހުންނަންޖެހޭ ޝަރުތުތައް ފުރިހަމަކޮށްފައި ވާތީ ކޮލެޖެއްގެ ގޮތުގައި އެ އިންސްޓިޓިއުޓް އިއްޔެ ރަޖިސްޓްރީކޮށްފައިވާ ކަމަށެވެ.

ރާއްޖޭގައި މަތީ ތައުލީމާއި ތަމްރީނުދޭ މަރުކަޒެއް، ކޮލެޖެއްގެ ގޮތުގައި ރަޖިސްޓަރީކުރެވޭނީ އެ މަރުކަޒެއް އިންސްޓިޓިއުޓެއްގެ ގޮތުގައި މެދުނުކެނޑި ހިންގާތާ މަދުވެގެން 10 އަހަރު ވެފައިވާނަމަ އެވެ. އަދި އެމަރުކަޒެއްގައި ގައުމީ ސަނަދުތަކުގެ އޮނިގަނޑުގެ ލެވެލް ފަހެއްގެ ޕްރޮގްރާމްތައް މެދުކެނޑުމެއް ނެތި ފަސް އަހަރުވަންދެން ހިންގާފައި ވުމަކީ ވެސް ޝަރުތެކެވެ.

އެމްއައިޓީއަކީ 2008 ވަނަ އަހަރުން ފެށިގެން މަތީ ތައުލީމާއި ތަމްރީނުދޭ އިންސްޓިޓިއުޓެއްގެ ގޮތުގައި ރަޖިސްޓަރީ ކޮށްގެން ހިންގަމުން އަންނަ މަރުކަޒެކެވެ.

އެމްއައިޓީން މިހައިތަނަށް ހިންގަމުން އައިއީ މަަސައްކަތްތެރިކަމުގެ ދާއިރާގެ ތަމްރީނު ޕްރޮގްރާމްތަކެވެ. އޭގެ ތެރޭގައި މެކޭނިކަލް އަދި އިލެކްޓްރިކަލް އިންޖިނިއަރިން ޕްރޮގްރާމްތަކާއި އައިޓީ ދާއިރާގެ ޕްރޮގްރާމްތައް ހިމެނެ އެވެ. ޓޫރިޒަމް އަދި ހޮސްޕިޓަލިޓީ ދާއިރާގެ ކޯސްތައް ވެސް އެތަނުން ހިންގަ އެވެ.