އިސްތަންބޫލް، ތުރުކީ (ފެބްރުއަރީ 5) - ތުރުކީގެ އިސްތަންބޫލް ބަސަކްޝެހީރާ އެކު ހަދާފައިވާ ކޮންޓްރެކްޓް އުވާލައި، ފުޓްބޯޅަ ކުޅުން ހުއްޓާލަން ޖަރުމަންގެ މިޑްފިލްޑަރު، މެސުޓް އޮޒިލް ނިންމައިފި އެވެ.

ތުރުކީގެ ބަސަކްޝެހީރަށް އޮޒިލް ސޮއިކުރީ މިދިޔަ ސީޒަންގައި އޭނާ ކުޅުނު ފެނަބާޗޭއާ އެކު ހަދާފައިވާ ކޮންޓްރެކްޓް އުވާލުމަށްފަހުގަ އެވެ. ފެނަބާޗޭގެ ކޯޗަކަށް އޭރު ހުރި އިސްމާއިލް ކާޓަލް އާ މައްސަލަޖެހި އޮޒިލް މިދިޔަ ޖުލައި މަހު އޭނާގެ ކޮންޓްރެކްޓް އުވާލީ ކޮންޓްރެކްޓްގައި ބަކީ ތިން އަހަރު އޮއްވަ އެވެ. އޭގެ ފަހުން އެއް އަހަރު ދުވަހުގެ އެއްބަސްވުމެއްގެ ދަށުން ބަސަކްޝެހީރަށް ސޮއިކުރުމަށް ފަހު އެ ކުލަބާ އެކުވެސް ހަދާފައިވާ ކޮންޓްރެކްޓް ހަ މަސްތެރޭގައި އުވާލަން އޭނާ ވަނީ ނިންމާފަ އެވެ.

ތުރުކީގެ ނޫސްތަކުން ބުނާ ގޮތުން އެންމެ ފަހުން ބަސަކްޝެހީރުން ކުރި ޕްރެކްޓިސްތަކުގައި ވެސް އޮޒިލް ބައިވެރިނުވެ އެވެ. އެ ކުލަބުން ލީގުގައި ކޭސެރިސްޕޯ އަތުން ބަލިވި މެޗުގެ 45 މިނެޓު އޮޒިލް ކުޅުނެވެ. ނަމަވެސް އޭގެ ފަހުން އެ ޓީގެ އެއްވެސް ކަމެއްގައި އޭނާ ބައިވެރިނުވެ އެވެ.

ކުލަބުގެ ކޮންޓްރެކްޓް އުވާލައި ފުޓްބޯޅަ ކުޅުން އެއްކޮށް ހުއްޓާލަން އޮޒިލް ނިންމާފައިވާ ކަމަށް ކުލަބުގެ ކުޅުންތެރިން ގާތު އޮޒިލް ބުނެފައިވާ ކަމަށް ވެސް މީޑިއާ ރިޕޯޓްތައް ބުނެ އެވެ.

އޮޒިލް، 34, އަށް މި ސީޒަންގައި ބަސަކްޝެހީރަށް ކުޅެވުނީ އެންމެ ހަަތަރު މެޗުގަ އެވެ. އަނިޔާގެ މައްސަލަތަކާ ހުރެ ގިނަ ދުވަސްތަކެއް ކުޅުމާ ދުރުގައި އޮޒިލް ހުންނަން ޖެހުނުއިރު, އޭނާގެ ފަރާތުން ކުލަބަށް އެކަށީގެންވާ އެއްބާރުލުން ނުލިބޭކަމަށް ކޯޗާ ހަވާލާދީ މީޑިއާތަކުން ރިޕޯޓްކުރި އެވެ.

ޖަރުމަނުގެ ޝާލްކާ އިން 2006 ވަނަ އަހަރު ފުޓްބޯޅަ ކެރިއަރު ފެށި އޮޒިލް ދެން ބަދަލުވީ ވާޑާ ބްރެމެން އަށެވެ. އެ ޓީމަށް 2008 އިން 2010 ވަނަ އަހަރާ ހަމަ އަށް ކުޅުނެވެ. ދެކުނު އެފްރިކާގައި 2010 ވަނަ އަހަރު ބޭއްވި ފީފާ ވޯލްޑް ކަޕްގައި ވާދަކުރި ޖަރުމަނު ޓީމުގައި ހިމެނި އޮޒިލް ދެއްކި މޮޅު ކުޅުމުގެ ސަބަބުން ރެއާލް މެޑްރިޑުން އޮޒިލްގެ ސޮއި ހޯދި އެވެ. އެ ޓީމަށް ކުޅެދިން ތިން އަހަރު ތެރޭގައި އޮޒިލް ވެފައިވަނީ ޔޫރަޕްގެ އެންމެ ނުފޫޒުގަދަ މިޑްފީލްޑަރުންގެ ތެރޭގަ އެވެ.

އޮޒިލް އާސެނަލަށް ބަދަލުވީ 2013 ވަނަ އަހަރު އެވެ. އެއީ 42.3 މިލިއަން ޕައުންޑު (50 މިލިއަން ޑޮލަރު)ގެ އަގަކަށެވެ. އާސެނަލްގެ ތާރީހުގައި އެންމެ ކާމިޔާބު ކޯޗު، އާސެން ވެންގާއާ އެކު ރަނގަޅު މަސައްކަތްތަކެއް ކުރި އޮޒިލް އަށް އާސެނަލަށް ފަހުން ކޯޗުކޮށްދިން ދެ ކޯޗުން ކަމަށްވާ އުނާއި އެމެރީ އާއި މިހާރުގެ ކޯޗު މިކޭލް އާޓެޓާގެ އިރުޝާދުގެ ދަށުން މާ އެދެވޭ ކުޅުމެއް ނުދެއްކެ އެވެ.

ކޯޗު އާޓެޓާގެ ޕްލޭންގައި ނުހިމެނޭތީ އޮޒިލް އާސެނަލް ދޫކޮށްލީ 2021ގަ އެވެ. އާސެނަލް ދޫކޮށްލިއިރު އޭނާ އެ ޓީމާ އެކު ތިން އެފްއޭ ކަޕް ކާމިޔާބުކުރި އެވެ.

ޖަރުމަނު ގައުމީ ޓީމުން 2014 ވަނަ އަހަރުގެ ވޯލްޑް ކަޕް ކާމިޔާބުކުރި ޓީމުގައި މޮޅަށް ކުޅުނު އޮޒިލް 2018 ވަނަ އަހަރުގެ ވޯލްޑް ކަޕަށް ފަހު ޖަރުމަނު ޓީމުން ރިޓަޔާކުރީ އޭރު ޖަރުމަނުގެ ކޯޗު ޔަކީމް ލޯ އުފެދުނު ހިޔާލު ތަފާތުވުންތަކެއްގެ ސަބަބުންނެވެ.

އޮޒިލްގެ ކެރިއަރު އަޑިގަނޑަކަށް ވެއްޓުނީ ތުރުކީގެ ރައީސް ރަޖަބު ތައްޔިބު އުރުދުގާންއާ އެކު ނަގާފައިވާ ފޮޓޯއެއް ސޯޝަލް މީޑިއާގައި އާންމުވި ހިސާބުންނެވެ.

އޭގެ ފަހުން ގައުމީ ޓީމުން އޭނާ އަށް ފުރުސަތު ލިބުމުގައި އުނދަގޫތަކެއް ދިމާވިއިރު، 2019 ވަނަ އަހަރު ޗައިނާ އިން އެ ގައުމުގެ ހުޅަނގު ސަރަހައްދުގެ ޒިންޖިއާންގެ މުސްލިމް މައިނޯރިޓީ އުއިގޫރް މީހުންނާ މެދު އަނިޔާވެރި އަމަލުތައް ހިންގާ ކަމަށް ތުހުމަތުކުރެވޭ މައްސަލައިގައި ޗައިނާ އަށާއި މުސްލިމް ގައުމުތައް ހަނުތިބޭތީ އެ ކަމަށް ފާޑުކިޔައި އޮޒިލް ދެއްކި ވާހަކަތަކުގެ ސަބަބުން ވެސް އޭނާ އަށް ކުލަބުން ޕްރެޝަރު އަ އެވެ. އެ ގޮތުން އޮޒިލްގެ އަމަލުތައް ކުށްވެރިކޮށް އާސެނަލުން ބަޔާނެއް ވެސް ނެރުނެވެ.