"ގިނަ މެމްބަރުން [ގައުމީ މަޖިލިސް ބައްދަލުވުމުގައި] ބައިވެރިނުވީ އަޅުގަނޑަށް ގަބޫލު ކުރެވޭ ގޮތުގައި، އެއިން އެއްވެސް ބޭފުޅަކު ބޭނުމެއް ނުވޭ ރައީސް [މުހައްމަދު] ނަޝީދު ހުށަހަޅުއްވާ އެއްޗަކަށް ފާޅުގައި އިދިކޮޅަށް އެއްޗެކޭ ބުނާކަށެއް،"

އެއީ މިމަހުގެ 11 ވަނަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ރައީސް އިބްރާހިމް މުހައްމަދު ސޯލިހަށް ކުރިމަތިވި ސުވާލަކަށް އެމަނިކުފާނު ދެއްވި ޖަވާބެވެ.

ރައީސްގެ ވާހަކަފުޅުގައި އިޝާރާތް ކުރެއްވީ ރާއްޖޭގައި ކުއްލި ނުރައްކަލުގެ ހާލަތު އިއުލާން ކުރުމަށް ގޮވާލާ ރައީސް ނަޝީދު ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގެ ގައުމީ މަޖިލީހަށް ހުށަހެޅުއްވި ގަރާރު ފާސް ކުރުމަށް ބޭއްވި ބައްދަލުވުމަށެވެ.

މީގެ މަހެއްހާ ދުވަސް ކުރިން ޖުލައި 25، ގައި ބޭއްވި ގައުމީ މަޖިލީހުގެ ޖަލްސާގައި ނަޝީދު ހުށަހެޅުއްވި ގަރާރު ފާސްވީ 39 މެމްބަރުންގެ ވޯޓާއެކު އެވެ. ގަރާރު ފާސް ކުރުމަށް އެންމެ މަދުން ބޭނުންވާ އަދަދަކީ 37 ވޯޓެވެ. އެމްޑީޕީ ގައުމީ މަޖިލިހުގައި ޖުމްލަ 142 މެމްބަރުން ތިބެ އެވެ. އެހެންކަމުން ގައުމީ މަޖިލިހުގެ 72 ޕަސެންޓު މެމްބަރުން އެ ޖަލްސާއަށް ހާޒިރުނުވެ އެވެ.

ނަޝީދު، ރައީސް ސޯލިހާ ސިޔާސީ ގޮތުން ދުރުވެފައިވާއިރު، ނަޝީދު ހުށަހެޅުއްވި ގަރާރު ފާސްވި ނަމަވެސް މަޖިލިހުގެ ގިނަ މެމްބަރުން އެ ބައްދަލުވުމަށް ނުދިޔުމަކީ ސަރުކާރަށް ލިބުނު މޮޅެއް ކަމަށް މީހުން ދިޔައީ ބުނަމުންނެވެ. އަދި ހާއްސަކޮށް، ގިނަ މެމްބަރުން އެ ބައްދަލުވުމަށް ނުދިޔައީ ނަޝީދާ ދިމާލަށް ފާޅުގައި އެއްޗެއް ބުނަން ނުކެރުން ކަމަށް ރައީސްގެ ދޫފުޅުން ވިދާޅުވުމަކީ، ކާމިޔާބީ އިއުލާން ކުރެއްވުން ކަމަށް ބައެއް މީހުން ދެކެ އެވެ.

އެހެން އެކަން އޮއްވާ އަނެއްކާ ވެސް ރޭގައި އެމްޑީޕީގެ އިންތިހާބެއް ބާއްވައިފި އެވެ. އެ ޕާޓީގެ އިސްތިއުނާފް ކޮމެޓީއަށް، ގައުމީ މަޖިލިސްގެ މެމްބަރުންގެ ވޯޓުން ވަނީ މެމްބަރުން އިންތިހާބުކޮށްފަ އެވެ. ރޭ އިންތިހާބު ބޭއްވި ކޮމެޓީގެ ނުވަ ގޮނޑި، ވާދަ ކުރި 18 މީހުންގެ ތެރެއިން ކާމިޔާބު ކުރީ ވެސް ރައީސް ސޯލިހުގެ ކެންޑިޑޭޓުންނެވެ. އެހެންކަމުން މިއީ ޕާޓީގެ އެންމެ ބާރުގަދަ ގުނަވަން ކަމަށްވާ ގައުމީ މަޖިލިހުގެ ކޮންޓްރޯލް ރައީސް ސޯލިހުގެ އަތުގައި އޮތް ކަމުގެ ޝައްކެއް ނެތް މިންވަރުގެ ހެކި ކަމަށް އެމަނިކުފާނަށް ތާއީދު ކުރާ ފަރާތްތަކުން ބުނެ އެވެ.

"ރޭގައި ހޮވުނު ނުވަ ކެންޑިޑޭޓުންނަކީ ވެސް ރައީސް ސޯލިހުގެ ކެންޑިޑޭޓުން. ރައީސް ނަޝީދު ވެސް ނުވަ ކެންޑިޑޭޓުން ނެެރުއްވި، އެކަމަކު އެކަކު ވެސް ނުހޮވުން. މީގެން މި ބުނެދެނީ ވަރަށް ބޮޑު ވާހަކައެއް. އަދި މި ޔަގީންވީ ޕާޓީ ތެރޭގައި ތާއީދު ކުރީ ކޮން ބޭފުޅަކަށްކަން،" އެމްޑީޕީއަށް ނިސްބަތްވާ ރައްޔިތުންގެ މަޖިލީހުގެ މެމްބަރަކު ނޫހުގައި ނަން ނުޖެހުމަށް ޝަރުތުކޮށް ވިދާޅުވި އެވެ.

އޭނާ ވިދާޅުވީ ޕާޓީ ތެރޭގައި ރައީސް ނަޝީދުއާ މެދު ފާޅުގައި ގިނަ މެމްބަރުން ދެކޮޅު ހަދަން ބޭނުންނުވާ ކަމަށެވެ. ރޭގެ ވޯޓުން ރައީސް ސޯލިހަށް ތާއީދު ކުރި މެމްބަރުންނަށް ސާފު އަގުލަބިއްޔަތެއް ލިބުމުގެ އެއް ސަބަބަކީ ވޯޓު ސިއްރުވުން ކަމަށް ވެސް އެ މެމްބަރު ވިދާޅުވި އެވެ.

"ފާޅު ވޯޓެއްގައި ރައީސް ނަޝީދާ ދެކޮޅަށް ވޯޓު ދޭން ނުކެރުނަސް ސިއްރުވީމަ އެކަމުގައި މައްސަލައެއް ނެތް. މީގެން އެނގިގެންދަނީ ރައީސް ސޯލިހަށް ޕާޓީގެ މެމްބަރުންގެ އިތުބާރު އެބަ އޮތްކަން،" އޭނާ ފާހަގަ ކުރަން ބޭނުންވާ ނުކުތާ މެމްބަރު ބުނެދިނެވެ.

ރޭގެ އިންތިހާބުގެ ކުރިން ޕާޓީގެ އެތެރޭގެ ކޮންޓްރޯލް ކުރެއްވުމުގެ މަސައްކަތް ރައީސް ސޯލިހާއި ވަނީ މަސައްކަތް ކުރައްވައިފަ އެވެ. އެމްޑީޕީގެ އެންމެ ގިނަ ދުވަސްވީ އެއް މެމްބަރު ހަސަން އަފީފް ޓީވީ ޝޯއެއްގައި ވާހަކަ ދައްކަވަމުން ރައީސް ސޯލިހަކީ އަދާލަތު ޕާޓީގެ މެމްބަރެއްތޯ ސުވާލު ކުރެއްވުމުން އެ މައްސަލަ ބަލައިދިނުމަށް އެމަނިކުފާނު ވަނީ ޕާޓީގެ ޗެއާޕާސަން ހަސަން ލަތީފަށް ހުށަހަޅުއްވައިފަ އެވެ.

އޭގެ ކުރިން، ކުއްލި ނުރައްކާ ގަރާރު ފާސް ކުރަން ޖަލްސާ ބޭއްވި ރޭ ޕާޓީގެ ޕާލަމެންޓަރީ ގްރޫޕުގެ ލީޑަރު އަލީ އާޒިމްއާ ރައީސް ސޯލިހު ބައްދަލު ކުރެއްވި އެވެ. އަދި އެންމެ ބޮޑު ކަމެއްގައި ފާހަގަ ކުރެވުނީ، ވެރިކަން ހިންގުމުގެ ކަންކަމުގައި ނަޝީދާ މަޝްވަރާ ކުރައްވަންޖެހިވަޑައިނުގަންނަވާ ކަމަށް ވިދާޅުވުމުންނެވެ.

"ސިޔާސީ ބައެއް ކަންތައްތަކުގައި ރައީސް ނަޝީދާ އަޅުގަނޑާ ބައެއް ފަހަރު ހިޔާލު ތަފާތުވޭ. އެމަނިކުފާނު ވެރިކަމުގައި ހުންނެވިއިރުގައި ވެސް އެމަނިކުފާނު ނިންމަވާ ބައެއް ނިންމުންތަކަށް އަޅުގަނޑަށް ކަމުނުގޮސް އަޅުގަނޑު ހުންނާނެ އަޅުގަނޑަށް ފެންނަ ގޮތް ހާމަކޮށްފަ. އެހެންނަމަވެސް ވެރިކަމުގައި އެމަނިކުފާނު ހުންނެވިއިރުގައި އަމަލު ކުރައްވާނީ ވަރަށް ބޮޑަށް ވިސްނަވައިފަ. ވަށައިގެން ހުރި ހުރިހާ ކަންތައްތަކަށް ބައްލަވާފަ. ބައެއް ފަހަރު އަޅުގަނޑު ވިސްނުމާ އިދިކޮޅަށް، އަޅުގަނޑު ހުށަހަޅާ ހިޔާލުތަކާ އެއްގޮތްނުވާ ގޮތަށް ކަންތައްތައް ނިންމަވާ. އެއީ މައްސަލައެއް ނޫން،" ރައީސް އޯގަސްޓު 11، ގައި ބޭއްވި ނޫސްވެރިންގެ ބައްދަލުވުމުގައި ވިދާޅުވެފައިވެ އެވެ.

ކުރިއަށް ދެން އޮތީ ވެސް އެމްޑީޕީގެ ބޮޑު އިންތިހާބެކެވެ. ސެޕްޓެމްބަރު މަހު ބާއްވާ ދާއިރާތަކުގެ އިންތިހާބަކީ އަނެއްކާ ވެސް ޕާޓީގެ ކޮންޓްރޯލް އޮތީ ކޮން ބޭފުޅެއްގެ އަތުގައިތޯ ވަޒަން ކުރަން ލިބޭ ފުރުސަތެކެވެ. މިހާރު ވެސް ދާއިރާތަކަށް ވާދަ ކުރައްވާ ކެންޑިޑޭޓުން ގެންދަވަނީ ރައީސް ސޯލިހާއި ނަޝީދުގެ ނަންފުޅުގައި ކެމްޕެއިން ކުރަމުންނެވެ.