އެޕަލްގެ އާ އައިފޯން ޑުއޯ ބާޒާރަށް ނެރުނުތާ މަދު ދުވަސްކޮޅެއްގެ ތެރޭގައި، އެ ފޯނުގެ ސްކްރީނަށް ދިމާވި މައްސަލަތަކާ ގުޅިގެން، މައްސަލަ ޖެހިފައިވާ ފޯނުތައް ބަދަލުކޮށްދޭނެ ކަމަށް އެ ކުންފުނިން ބުނެފި އެވެ.
ޖުމްލަ 2،668 ޑޮލަރަށް ވިއްކަން ފެށި، އެޕަލްގެ އެންމެ ފުރަތަމަ ފޯލްޑަބަލް ނުވަތަ ފަތްޖަހާލެވޭ ފޯނުގެ ސްކްރީނަށް ދިމާވެފައިވާ މައްސަލަތައް ދައްކައިދޭ ފޮޓޯތަކެއް ސޯޝަލް މީޑިއާގައި ވަނީ އާންމުވެފަ އެވެ. އެ ފޮޓޯތަކުން ފެންނަ ގޮތުގައި ފޯނުގެ ސްކްރީނުގައި ރޮނގުތަކެއް ވަނީ އެޅިފަ އެވެ.
މިކަމާ ގުޅިގެން އެޕަލް އިން ބުނީ، މަދު އަދަދެއްގެ ފޯނުތަކެއްގެ އެތެރޭގެ ޑިސްޕްލޭއަށް މައްސަލައެއް ދިމާވެފައިވާކަން އެ ކުންފުންޏަށް އެނގިފައިވާ ކަމަށެވެ. އަދި މި މައްސަލަ ދިމާވި ކަސްޓަމަރުން، ފޯނު ބަދަލުކުރުމަށް އެޕަލްއާ ގުޅުމަށް އެ ކުންފުނިން ވަނީ އިލްތިމާސްކޮށްފަ އެވެ.
ދުނިޔޭގެ އެކި ކަންކޮޅުތަކުގައި ހުންނަ އެޕަލް ސްޓޯރުތަކަށް ގިނަ ބަޔަކު ޖަމާވި، އައިފޯން ޑުއޯ ބާޒާރަށް ނެރުނީ އެޕަލްގެ އުފެއްދުންތަކަށް އާ ދިރުމެއް ދީ، ވާދަވެރި ކުންފުނިތަކުން ނެރެމުންދާ ފަތްޖަހާލެވޭ ފޯނުތަކާ ވާދަކުރުމުގެ މަގްސަދުގަ އެވެ.
އައިފޯން ޑުއޯ ބޭނުންކުރާ ބައެއް މީހުން ވަނީ ފޯނުގެ ސްކްރީން ފަތްޖަހާލާ ހިސާބުން ރެނދުލާފައިވާ ފޮޓޯތަކެއް ވެސް އާންމުކޮށްފަ އެވެ. މީގެ އިތުރުން، ފޯނު ހުޅުވާލާއިރު ކޮންމެވެސް އެއްޗެއް މުގުރޭ ކަހަލަ އަޑެއް އިވޭ ކަމަށް ވެސް ބައެއް މީހުން ވަނީ ރިޕޯޓްކޮށްފަ އެވެ.
މި މައްސަލަ ދިމާވެފައިވަނީ ކިހާ މިންވަރަކަށް ކަމެއް އަދި ސާފެއް ނުވެ އެވެ. އެޕަލް އިން މި މައްސަލަ ދިމާވި ފޯނުތަކުގެ އަދަދު ހާމަކޮށްފައި ނުވާއިރު، ސޯޝަލް މީޑިއާގައި ދައުރުވާ ބައެއް ފޮޓޯތަކަކީ އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ހަދާފައިވާ ފޮޓޯތަކަކަށް ވުން ވެސް އެކަށީގެންވެ އެވެ.
އައިފޯން ޑުއޯގެ 7.6 އިންޗީގެ އެތެރޭގެ ސްކްރީން ގުޅުވައިދެނީ މެދުގައި އިންނަ ހިންޖަކުންނެވެ. މިއީ އިންޖިނިއަރިންގެ ގޮތުން ވަރަށް ކޮމްޕްލެކްސް ނުވަތަ އުނދަގޫ މަސައްކަތަކަށް ވާއިރު، އެޕަލްގެ ވާދަވެރި ކުންފުނިތަކުން ނެރުނު ފަތްޖަހާލެވޭ ފޯނުތަކަށް ވެސް މީގެ ކުރިން މިފަދަ މައްސަލަތަކެއް ދިމާވެފައިވެ އެވެ.
އެގޮތުން، ސެމްސަންގުން އެންމެ ފުރަތަމަ ނެރުނު ފަތްޖަހާލެވޭ ފޯނު ކަމަށްވާ 'ގެލެކްސީ ފޯލްޑް' 2019 ވަނަ އަހަރު ބާޒާރަށް ނެރުނުއިރު، އެ ފޯނު ރިވިއު ކުރި މީހުންނަށް ވެސް ސްކްރީން ހަލާކުވުމުގެ މައްސަލަތަކާ ކުރިމަތިވެ، ބޮޑެތި ގޮންޖެހުންތަކެއް ކުރިމަތިވި އެވެ.
އެންޑްރޮއިޑް ފޯނު ބޭނުންކުރާ މީހުންނަށް މިހާރު ވެސް ފަތްޖަހާލެވޭ ގިނަ މޮޑެލްތަކެއް ލިބެން ހުރިއިރު، އެޕަލް އިން އައިފޯން ޑުއޯ ބާޒާރަށް ނެރުނީ މި ޓެކްނޮލޮޖީ ތަރައްގީ ކުރުމަށް ގިނަ އަހަރުތަކެއް ހޭދަކުރުމަށްފަހު އެވެ.
އައިފޯން ޑުއޯ އަކީ ފާއިތުވި ވިއްސަކަށް އަހަރު ތެރޭގައި އައިފޯނުގެ ޑިޒައިނަށް ގެނައި އެންމެ ބޮޑު ބަދަލެވެ. މި ފޯނު ތައާރަފްކޮށްދެއްވީ މިދިޔަ ސެޕްޓެމްބަރު މަހު ޓިމް ކުކްގެ ބަދަލުގައި އެޕަލްގެ ސީއީއޯގެ މަގާމާ ހަވާލުވެވަޑައިގެންނެވި ޖޯން ޓާނަސް އެވެ.
ފޯނު ލައްޕާލާފައި އޮންނައިރު އައިފޯން ޑުއޯ ފެންނަނީ އާދައިގެ އައިފޯނަކަށް ވުރެ ތަންކޮޅެއް ފުޅާ ފޯނެއްގެ ގޮތުގަ އެވެ. ނަމަވެސް، އެ ހުޅުވާލުމުން ކުޑަ ޓެބްލެޓެއް ފަދަ ޑިވައިސަކަށް ބަދަލުވެ އެވެ.
