ވިލާ ކޮލެޖުގެ 2026 ވަނަ އަހަރުގެ ދަސްވެނިވުމުގެ ޙަފްލާ، ފެށީ 30 ސެޕްޓެމްބަރު 2026 ގައެވެ.
ތިން ދަންފަޅިއަކަށް ބަހާލައިގެން ވިލާ ކޮލެޖުގެ ކިއުއައި ކެމްޕަހުގައި ދެ ދުވަހަށް ކުރިއަށްދިޔަ މި ހަފްލާގައި، މި އަހަރު ޖުމްލަ 1،237 ދަރިވަރުން ދަސްވެނިވި އެވެ. މީގެ ތެރެއިން '70 އިންސައްތައަކީ އަންހެން ދަރިވަރުންނެވެ.
މި އަހަރުގެ ތަފާސްހިސާބުތަކަށް ބަލާއިރު، ދަސްވެނިވާ ދަރިވަރުންގެ 60 އިންސައްތައަކީ ވިލާ ކޮލެޖުގެ އަމިއްލަ ޕްރޮގްރާމްތައް ފުރިހަމަކުރި ދަރިވަރުންނެވެ.
ބާކީ ދަރިވަރުން ދަސްވެނިވެފައިވަނީ ވިލާ ކޮލެޖުން ހިންގާ އިނގިރޭސިވިލާތުގެ ޔުނިވަރސިޓީ އޮފް ދަ ވެސްޓް އޮފް އިންގްލެންޑް (ޔޫ.ޑަބްލިޔު.އީ) ޕްރޮގްރާމްތަކުންނެވެ.
މި އަހަރުގެ ދަސްވެނިންނާއެކު ވިލާ ކޮލެޖުން ދަސްވެނިވި ދަރިވަރުންގެ ޖުމްލަ އަދަދު 27،000 އަށްވުރެ މައްޗަށް އަރާފައިވާކަމަށް ކޮލެޖުން ބުނެއެވެ.
ތިން ދަންފަޅީގައިވެސް ދަސްވެނިންނާ މުޚާޠަބުކުރައްވައި ވިލާ ކޮލެޖުގެ ރެކްޓަރ ޑރ. އަޙްމަދު އަންވަރު ވިދާޅުވީ، މި ހަފްލާއަކީ ހަމައެކަނި ކިޔެވުން ނިންމުން ފާހަގަކުރުމަށް ބާއްވާ ޙަފްލާއެއް ނޫން ކަމަށާއި، ދަރިވަރުން ހޯދި ކާމިޔާބީއާއި އެކަމަށް ކުރި ބުރަ މަސައްކަތާއި ހިތްވަރުގެ އަގުވަޒަންކުރުމަށް ބާއްވާ ހަފްލާއެއް ކަމަށެވެ.
"މިއަދު މި ދަރުބާރުގައި އަޅުގަނޑުމެން މި ފާހަގަކުރަނީ، ތިޔަ ދަސްވެނިން ވޭތުވެދިޔަ މަސްތަކުގައި ނުވަތަ އަހަރުތަކުގައި އާއިލީ ޒިންމާތަކާއި ވަޒީފާގެ މަސްއޫލިއްޔަތުވެސް އުފުލަމުން ކުރި ބުރަ މަސައްކަތުގެ ކާމިޔާބީ،" ރެކްޓަރ ވިދާޅުވިއެވެ.
ރެކްޓަރ އިތުރަށް ފާހަގަކުރެއްވި ގޮތުގައި، ދަސްވެނިން ރަމްޒުކޮށްދެނީ ޢާއިލާތަކުގެ އުއްމީދާއި، އިލްމު ހޯދުމަށް ކުރި ގަދަ ހިތްވަރާއި ގުރުބާނީ އެވެ. ވިލާ ކޮލެޖަކީ އިންޑަސްޓްރީތަކަށް ބޭނުންވާ ގާބިލު މީހުން ތަމްރީނުކުރާ މަރުކަޒެއްކަން ފާހަގަކުރައްވައި، ދުނިޔެ އާދައާ ހިލާފު ބާރުމިނެއްގައި ކުރިއަރަމުންދާ މި ދަނޑިވަޅުގައި، ކޮންމެ ދަސްވެނިއަކުވެސް އިސްލާމީ މަތިވެރި އަގީދާގައި ސާބިތުވެހުރި، ދިވެހިންގެ ސަގާފަތަށް އިހްތިރާމްކުރާ، ތެދުވެރި ދިވެއްސަކަށް ވުމަށް ރެކްޓާ ނަސޭހަތްތެރިވެވަޑައިގެންނެވި އެވެ.
