ޔަމަނުގެ ހޫތީ ހަނގުރާމަވެރި ޖަމާއަތުން ދެމުންދާ ހަމަލާތަކާ ގުޅިގެން، ސައުދީ އަރަބިއްޔާގެ ސަލާމަތާއި ރައްކާތެރިކަމަށް އެއްވެސް އުނިކަމެއް އަތުވެދާނެ ފަދަ ކަމަކަށް ފުރުސަތު ނުދެއްވާނެ ކަމަށް އެ ގައުމުގެ ވަލީއަހުދު މުހައްމަދު ބިން ސަލްމާން (އެމްބީއެސް) ވައުދުވެވަޑައިގެންފި އެވެ. ވަލީއަހުދު ވިދާޅުވީ ޔަމަނުގެ ހަނގުރާމަވެރިން އިޚްތިޔާރު ކުރީ "ހަމަނުޖެހުމާއި ސުންނާފަތިކުރުން" ކަމަށާއި، އޭގެ ސަބަބުން ޔަމަނުގެ ރައްޔިތުންނަށާއި މުޅި ސަރަހައްދަށް ނުރައްކާ ކުރިމަތިވެފައިވާ ކަމަށެވެ.
ސައުދީ އަރަބިއްޔާގެ ޝޫރާ މަޖިލީހުގެ ނުވަވަނަ ދައުރުގެ ތިންވަނަ އަހަރުގެ ޖަލްސާތައް ފެށުމަށް ބުދަ ދުވަހު ބޭއްވި ރަސްމިއްޔާތުގައި، ރަސްގެފާނު ސަލްމާން ބިން އަބްދުލްއަޒީޒްގެ ފަރާތްޕުޅުން ތަގުރީރު ކުރައްވަމުން ވަލީއަހުދު މުހައްމަދު ވިދާޅުވީ، ގައުމުގެ ސަލާމަތަށް ނުރައްކާވާ ފަދަ ކޮންމެ ހަމަލާއަކަށް ނުވަތަ އިންޒާރަކަށް "ސާބިތުކަމާއެކު ރައްދު ދިނުމުގައި ފަސްޖެހުމެއް ނެތް" ކަމަށެވެ.
މިދިޔަ އޯގަސްޓް މަހު ތުރުކީވިލާތާއި ޕާކިސްތާނާއެކު ރަސްމީކޮށް ގާއިމުކުރި "މައްކާ ޖޮއިންޓް ޑިފެންސް އެގްރީމަންޓް" އަށް އިޝާރާތް ކުރައްވައި ވަލީއަހުދު ވިދާޅުވީ، މި އިއްތިހާދަކީ ސަރަހައްދީ ހަމަޖެހުން ވަރުގަދަކުރުމަށާއި، މަސްލަހަތު ގޯސްވުމުގެ ސަބަބުން ކުރިމަތިވާ ނޭދެވޭ އަސަރުތަކުން ސަރަހައްދު ސަލާމަތްކުރުމަށް ސައުދީން ކުރާ މަސައްކަތުގެ ހެއްކެއް ކަމަށެވެ.
ހަމައެއާއެކު، މަސްލަހަތު ފިނިކުރުމަށާއި ޑިޕްލޮމެޓިކް ހައްލުތައް ހޯދުމަށް ސައުދީ އަރަބިއްޔާއިން ކުރެވެން ހުރި ހުރިހާ މަސައްކަތެއް ކުރަމުންދާ ކަމަށާއި، ނަމަވެސް އެއީ ގައުމުގެ ސަލާމަތާއި ރައްކާތެރިކަމަށް އެއްވެސް އުނިކަމެއް އަންނާނެ ގޮތަކަށް ކުރާނެ ކަމެއް ނޫން ކަމަށްވެސް ވަލީއަހުދު ވިދާޅުވި އެވެ.
ރަތްކަނޑާއި ބާބުލް މަންދަބު ކަނޑުއޮޅިން ދަތުރުކުރާ އުޅަނދުފަހަރަށް ހޫތީން ދެމުންދާ ހަމަލާތަކަށް އިޝާރާތް ކުރައްވައި، ބައިނަލްއަގުވާމީ ކަނޑުގެ ސަރަހައްދުތަކަކީ ސިޔާސީ ނުވަތަ އިގްތިސާދީ ގޮތުން ފިއްތުންތައް ކުރިމަތިކުރުވާ ވަސީލަތެއްގެ ގޮތުގައި ބޭނުންކުރުން ވަލީއަހުދު މުހައްމަދު ބިން ސަލްމާން ވަނީ ކުށްވެރިކުރައްވާފަ އެވެ.
ވަލީ އަހުދު އިތުރަށް ވިދާޅުވީ، ބައިނަލްއަގުވާމީ ކަނޑުގެ ސަރަހައްދުތަކުގައި ހުރި "އެންމެންގެ މަސްލަހަތުތައް" ހިމާޔަތްކުރުމަށްޓަކައި ގިނަ ގައުމުތައް ހިމެނޭ ކަނޑުގެ ދިފާއީ އިއްތިހާދެއް މިހާރު އެކުލަވާލާފައިވާ ކަމަށެވެ.
