ބައިނަލްއަގުވާމީ އެކުވެރިކަމުގެ މެޗެއްގައި މި ފަހަރުގެ ފީފާ ބްރޭކުގައި ރާއްޖެ އާއި ކިރްގިސްތާނާ ދެކޮޅަށް ކުޅޭ މެޗުތަކަކީ މުސްތަގުބަލެއް ބިނާކުރުމަށްޓަކައި ލެބަނަން އިން ކުރާ މަަސައްކަތުގައި މުހިންމު މެޗުތަކެއް ކަމަށާއި ނަތީޖާ ނެރުން ވެސް މުހިންމު ކަމަށް ލެބަނަންގެ ކޯޗު، އަލްޖީރިއާގެ މަޖީދު ބުގޭރާ ބުނެފި އެވެ.
އުމުރުން 43 އަހަރުގެ ބުގޭރާ، ލެބަަނަންގެ ކޯޗުކަމާ މި އަހަރުގެ ޖެނުއަރީ މަހު ހަވާލުވީ ތިން އަހަރުގެ ކޮންޓްރެކްޓެއްގަ އެވެ. އޭނާގެ ކޯޗުކަމުގައި މިހާތަނަށް ލެބަނަން އިން ކުޅުނީ ރަސްމީ އެންމެ މެޗެއްގަ އެވެ. އެ މެޗުން، ޔަމަން އަތުން 2-0 އިން ވަނީ މޮޅުވެފަ އެވެ. އަދި، ގަތަރުގެ ދޯހާގައި ޓްރެއިނިން ހަދަމުން އަންނަ ލެބަނަން އިން ވަނީ، ރާއްޖެ އާއި ކިރްގިސްތާނާ ކުޅުމުގެ ކުރިން، މިދިޔަ މަހުގެ 27 ވަނަ ދުވަހު، ގަތަރުގެ ކްލަބް، އަލް ސާދާ އެކު. މެޗެއް ކުޅެފަ އެވެ. އެ މެޗުން، ލެބަނަން ވަނީ 2-1 އިން މޮޅުވެފަ އެވެ.
ޔަމަން އަތުން ބަލިވެ، އޭޝިއަން ކަޕުން ލެބަނަން އަށް ޖާގަ ގެއްލުމަކީ، މުސްތަގުބަލަށް މަސައްކަތް ކުރަން ލިބުނު ފުރުސަތެއް ކަމަށް ކުރިން އަލްޖީރިއާ ގައުމީ ޓީމަށް ކުޅުނު ބުގޭރާ ވަނީ ބުނެފަ އެވެ. އަދި، ކުރިން ކޯޗުން ވެފައިވާ ގޮތަށް ވައުދުތަކެއް ވެގެން ހަމައެކަނި މަގާމުގައި ހުރެލަން ބޭނުންނުވާ ކަމަށާއި މާނައެއް ފެންނަ މަސައްކަތެއްކޮށް، ނަތީޖާ ނެރެގެން މުސްތަގުބަލަށް ޓީމެއް ބިނާކުރަން ވީ އެންމެ އަވަހަށް މަސައްކަތް ފަށަން ބޭނުންވާ ކަމަށް ބުގޭރާ ވަނީ ބުނެފަ އެވެ.
"ބޭނުންވަނީ ޖީލެއް ބިނާކުރަން. ކުރިއަށް އޮތް ފަސް އަހަރު ނޫނީ 10 އަހަރު ވިޔަސް ގައުމީ ޓީމުގައި ވަރުގަދަ އަށް ކުޅޭނެ ކުޅުންތެރިން ހިމެނޭ ޓީމެއް ބާއްވަން. މިކަން ކުރަން އިސްނެގިޔަސް ވިސްނަން ޖެހޭ އިންޓަނޭޝަނަލް ފުޓްބޯޅައިގައި ނަތީޖާ ނެރެން ވެސް ޖެހޭ. ޓީމެއް ބިނާކުރަން ފުރުސަތު އޮންނާނީ ނަތީޖާ އަށް ވެސް ބަލައިގެން،" ބުގޭރާ ބުންޏެވެ.
އޭނާ ބުނީ، ދެން އޮތް ވޯލްޑް ކަޕް/އޭޝިއަން ކަޕް ކޮލިފައިން އަންނަ އަހަރު ފަށާއިރު، ލެބަނަން އިން ރަނގަޅަށް ތައްޔާރަށް އޮތުމަށް ރާއްޖެ އާއި ކިރްގިސްތާން މެޗުގެ އިތުރުން، ނޮވެމްބަރު މަހުގެ ފީފާ ބްރޭކުގެ ތެރޭގައި ޕްލޭނެއް އޮވެގެން މަސައްކަތް ކުރާނެ ކަމަށެވެ.
"މިއީ، ލޯންގް ޓާމް ޕްރޮޖެކްޓެއް. އެކަމަކު، ޝޯޓް ޓާމްގަައި ވެސް ހާސިލްކުރެވެން ޖެހޭ ކަންކަން ހުންނާނެ،" ބުގޭރާ ބުންޏެވެ.
މި އަހަރު ތެރޭ ލެބަނަންގެ ސީނިއާ ބައެއް ކުޅުންތެރިން ވަނީ ގައުމީ ޓީމަށް ކުޅުން ހުއްޓާލައިފަ އެވެ. އަދި، ބައެއް ކުޅުންތެރިން ދޮށީ އުމުރަށް ދިއުމުން ގައުމީ ޓީމަށް ނެގުން ވެސް ބުގޭރާ ވަނީ މަޑުޖައްސާލައިފަ އެވެ. ބުގޭރާ ބުނީ، ލެބަނަން ކޯޗުކަމާ ހަވާލުވީ އުނދަގޫ ޕްރޮޖެކްޓެއްކަން އެނގި ހުރެ ވެސް ރަނގަޅު މަސައްކަތެއް ކުރެވޭނެ ކަމުގެ ޔަގީންކަން އޮތުމުން ކަމަށެވެ.
ލެބަނަން އިން ވަނީ މިހާތަނަށް ރާއްޖެއާ ކުޅުނު ފަސް މެޗުން ވެސް މޮޅުވެފަ އެވެ. އެންމެ ފަހުން، ލެބަނަން އިން ރާއްޖެއާ ކުޅުނީ 2023 ވަނަ އަހަރު އިންޑިއާގެ ބެންގަލޫރުގައި ބޭއްވި ސާފް ޗެމްޕިއަންޝިޕްގެ ގްރޫޕް ސްޓޭޖުގަ އެވެ. ލެބަނަން އިން ވަނީ އެ މެޗުގައި ރާއްޖެ އަތުން 1-0 އިން މޮޅުވެފަ އެވެ.
މިއަދު ލެބަނަން އާއި ރާއްޖޭން ބައްދަލުކުރާ މެޗު ފަށާނީ ރާއްޖެ ގަޑިން، 19:00 ގަ އެވެ.
ރާއްޖެއާ ކުޅުމަށް ފަހު، އަންނަ އާދިއްތަ ދުވަހު، ލެބަނަން އިން ކިރްގިސްތާނާ ވެސް ކުޅޭނެ އެވެ.
