ދުނިޔޭގެ މަޝްހޫރު ސާފް އަދި ލައިފްސްޓައިލް ބްރޭންޑެއް ކަމަށްވާ ރިޕް ކާލް (Rip Curl) ގެ އުފެއްދުންތައް ރާއްޖޭގެ ރަށްތަކާއި، މޫދު ކުޅިވަރަށް ލޯބިކުރާ ފަރާތްތަކުގެ އިތުރުން ފަތުރުވެރިންނާ ގާތަށް ފޯރުކޮށްދިނުމަށްޓަކައި، ކ. މާފުށީގައި އެ ބްރޭންޑުގެ އާ ފިހާރައެއް ހުޅުވައި ރާއްޖޭގައި އެ ބްރޭންޑުގެ ވިޔަފާރި އިތުރަށް ފުޅާކޮށްފި އެވެ.
ސިމްޑީ ގްރޫޕުން (SIMDI Group) މާފުށީގައި ހުޅުވި މި ފިހާރައިން ފިރިހެނުންނާއި، އަންހެނުން އަދި ކުޑަކުދިންނަށް ހާއްސަ، އަސްލު ރިޕް ކާލް ބްރޭންޑުގެ ސާފް ވެއާ، ސްވިމް ވެއާ، ބީޗް ވެއާ އަދި ކެޝުއަލް ލައިފްސްޓައިލް ކަލެކްޝަންތައް ލިބެން ހުންނާނެ އެވެ. މާފުށީގައި މި ހުޅުވި އައުޓްލެޓާއެކު، ކްރޮސްރޯޑްސް މޯލްޑިވްސް، ނިޔާމަ ޕްރައިވެޓް އައިލެންޑްސް، އަދާރަން ސެލެކްޓް ހުދުރަންފުށި އަދި ހުޅުމާލޭގައި ހިންގަމުންދާ ރިޕް ކާލްގެ ފިހާރަތަކުގެ ނެޓްވޯކް އިތުރަށް ވަރުގަދަވެގެންދާނެ އެވެ.
ރިޕް ކާލް މާފުށި ފިހާރަ ރަސްމީކޮށް ހުޅުވައިދެއްވީ ސިމްޑީ ގްރޫޕްގެ ޗެއާމަން އިބްރާހިމް މުހައްމަދު ދީދީ އާއި، އެ ގްރޫޕްގެ ސީއީއޯ ޑރ. މަރިޔަމް ޝަކީލާގެ އިތުރުން ރިޕް ކާލްގެ ފަރާތުން އެޑްވިން ސްޓީވަންސް އެވެ. ރާއްޖޭގައި ރިޕް ކާލް ބްރޭންޑް ފުޅާކުރުމަށް ކުރަމުންދާ މަސައްކަތުގެ މުހިންމު ކުރިއެރުމެއްގެ ގޮތުގައި ފާހަގަކުރެވުނު މި ރަސްމިއްޔާތުގައި ދައުވަތު އެރުވުނު މެހެމާނުންނާއި މާފުށީގެ ގިނަ އަދަދެއްގެ ރައްޔިތުން ބައިވެރިވި އެވެ.
ފިހާރަ ހުޅުވުމުގެ ރަސްމިއްޔާތުގައި ވާހަކަދައްކަވަމުން ސިމްޑީ ގްރޫޕްގެ ސީއީއޯ ޑރ. މަރިޔަމް ޝަކީލާ ވަނީ، މާފުއްޓަކީ ފަތުރުވެރިކަމާއި ކަނޑުގެ ހަރަކާތްތަކާ ވަރަށް ބޮޑަށް ގުޅިފައިވާ ރަށަކަށް ވުމުން، އެ ރަށުގައި ރިޕް ކާލްގެ ފިހާރައެއް ހުޅުވުމުގެ މުހިންމުކަމުގެ މައްޗަށް އަލިއަޅުއްވާލައްވާފަ އެވެ.
"ކްރޮސްރޯޑްސް މޯލްޑިވްސް، އަދާރަން ސެލެކްޓް ހުދުރަންފުށި، ނިޔާމަ ޕްރައިވެޓް އައިލެންޑްސް އަދި ހުޅުމާލެ ފަދަ މުހިންމު މަންޒިލްތަކުގައި މިހާރު ވެސް ރިޕް ކާލްގެ އައުޓްލެޓްތައް އެބަހުރި. މާފުއްޓަށް މި ބްރޭންޑް ތައާރަފްކުރެވުމަކީ އަޅުގަނޑުމެންނަށް ލިބޭ ވަރަށް ބޮޑު އުފަލެއް. މާފުއްޓަކީ ފަތުރުވެރިކަން ކުރިއަރާފައިވާ، ކަނޑާ ވަރަށް ބޮޑު ގުޅުމެއް އޮތް ރަށަކަށް ވުމުން، މިއީ ރިޕް ކާލްއަށް އެންމެ އެކަށީގެންވާ ތަނެއް. އަޅުގަނޑުމެން ގަބޫލުކުރާ ގޮތުގައި މިއީ އަޅުގަނޑުމެންގެ އެންމެ ކާމިޔާބު އެއް އައުޓްލެޓަށް ވެގެންދާނެ. އަދި މާކެޓް އޮތް އެހެން ސަރަހައްދުތަކަށް ވެސް ރިޕް ކާލް ގެންދިއުމުގެ ފުރުސަތުތައް އަޅުގަނޑުމެން ހޯދަމުންދާނަން،" ޑރ. ޝަކީލާ ވިދާޅުވިއެވެ.
މި ފިހާރަ ހުޅުވުމުގެ އުފަލުގައި، މާފުށީގެ ރިޕް ކާލް ފިހާރައަށް ޒިޔާރަތްކުރާ ކަސްޓަމަރުންނަށް ހާއްސަ ޕްރޮމޯޝަނެއް ވަނީ ފަށާފައެވެ. މިގޮތުން 2024 ސެޕްޓެމްބަރު 27 އިން އޮކްޓޯބަރު 11 ގެ ނިޔަލަށް، ފިހާރައިގެ ހުރިހާ މުދަލަކުން 40 އިންސައްތައާ ހަމައަށް ޑިސްކައުންޓް ލިބޭނެ އެވެ.
މާފުށީގައި ހުޅުވި މި ފިހާރަ ފަރުމާކޮށްފައިވަނީ ރިޕް ކާލްގެ ތަފާތު "ކޯސްޓަލް އައިޑެންޓިޓީ" ނުވަތަ އަތިރިމަތީގެ ދިރިއުޅުމާ ގުޅޭ ސިފަތައް ރަމްޒުކޮށްދޭ ގޮތަށެވެ. މިއީ އެ ބްރޭންޑުގެ ސާފް ސަގާފަތާއި ރާއްޖޭގެ ރަށްތަކުގެ ހިތްފަސޭހަ މާހައުލު ގުޅުވައިދޭ ގޮތަށް ތައްޔާރުކޮށްފައިވާ ތަނެކެވެ. މި ފިހާރައިގެ ސަބަބުން މާފުށީގެ ރައްޔިތުންނަށާއި، ރާއްޖޭގެ މަގުބޫލު މި މަންޒިލަށް ޒިޔާރަތްކުރާ ދުނިޔޭގެ އެކި ކަންކޮޅުތަކުގެ ފަތުރުވެރިންނަށް ބޮޑެތި ފަސޭހަތަކެއް ލިބިގެންދާނެ އެވެ.
ސިމްޑީ ގްރޫޕާއި ރިޕް ކާލްގެ މެދުގައި ޕާޓްނަޝިޕް ގާއިމުކުރީ 2019 ވަނަ އަހަރުއެވެ. އެއަށްފަހު ރާއްޖޭގެ މުހިންމު ވިޔަފާރި މަރުކަޒުތަކާއި ރިސޯޓުތަކުގައި އެ ބްރޭންޑުގެ ފިޔަވަޅުތައް ދަނީ ފުޅާކުރަމުންނެވެ.
މާފުށީގައި ރިޕް ކާލްގެ ފިހާރަ ހުޅުވުމަށް އެކި ގޮތްގޮތުން އެހީތެރިކަން ފޯރުކޮށްދިން ހުރިހާ ފަރާތްތަކަށް ސިމްޑީ ގްރޫޕުން ވަނީ އިހުލާސްތެރި ޝުކުރެއް އަދާކޮށްފައެވެ. އެ ގްރޫޕުން އަބަދުވެސް މަސައްކަތް ކުރަމުންދަނީ ދުނިޔޭގެ ކުރިއަރާފައިވާ ބްރޭންޑުތަކާއި ތަޖުރިބާތައް ރާއްޖޭގެ އެކި ކަންކޮޅުތަކަށް ފޯރުކޮށްދިނުމަށެވެ.
ކުރިއަށް އޮތް ތަނުގައި ވެސް ރާއްޖޭގެ އިތުރު ސަރަހައްދުތަކުގައި ރިޕް ކާލްގެ ފިހާރަތައް ހުޅުވުމަށް ވަނީ ރޭވިފަ އެވެ.
ފިހާރަ ހުންނަ ތަން: ރިޕް ކާލް ސްޓޯ މާފުށި ކ. މާފުށި، ދިވެހިރާއްޖެ ލޮކޭޝަން މެޕް: https://share.google/lVFk5a7RCjPWY261M ފޭސްބުކް: https://www.facebook.com/ripcurlmv އިންސްޓަގްރާމް: https://www.instagram.com/ripcurl_maldives/
ރިޕް ކާލްއާ ބެހޭ ގޮތުން: 1969 ވަނަ އަހަރު އުފެދުނު ރިޕް ކާލްއަކީ އައު އީޖާދުތަކާއި، ފެންވަރު ރަނގަޅު އުފެއްދުންތަކަށް ދުނިޔޭގައި މަގުބޫލުކަން ހޯދާފައިވާ ސާފް ބްރޭންޑެކެވެ. "ދަ އަލްޓިމޭޓް ސާފިން ކޮމްޕެނީ" ގެ ނަމުން މަޝްހޫރު މި ކުންފުނިން ދަނީ ރާޅާ އެޅުމާއި ކަނޑުގެ ހަރަކާތްތަކަށް ލޯބިކުރާ ފަރާތްތަކަށް ހާއްސަ އުފެއްދުންތަކާއި ތަޖުރިބާތައް ފޯރުކޮށްދެމުންނެވެ.
ސިމްޑީ ގްރޫޕާ ބެހޭގޮތުން: ސިމްޑީ ގްރޫޕަކީ ރާއްޖޭގެ އެންމެ ކުރިއަރާފައިވާ އެއް ވިޔަފާރި ގްރޫޕެވެ. އެ ކުންފުނިން ދުނިޔޭގެ 200 އަށްވުރެ ގިނަ ބްރޭންޑު ތަމްސީލުކުރާއިރު، ތަފާތު ދާއިރާތަކުން 15،000 އަށްވުރެ ގިނަ އުފެއްދުންތަކާއި ހިދުމަތްތައް ފޯރުކޮށްދެ އެވެ. މީގެ ތެރޭގައި ބުއިންތަކާއި، ޓެކްނޮލޮޖީ، އެފްއެމްސީޖީ، ރިސޯޓު ސަޕްލައި، ރީޓެއިލް، ތައުލީމު، ސިއްހީ ހިދުމަތް އަދި ލައިފްސްޓައިލް ދާއިރާ ހިމެނެ އެވެ. ސިމްޑީގެ މައިގަނޑު އަމާޒަކީ ދުނިޔޭގެ ފެންވަރުގެ މުދަލާއި ހިދުމަތްތައް ދިވެހި މާކެޓަށް ތައާރަފްކުރުމެވެ.
