އެރިކްސަން، އާއިލާ އަށް ވަގުތު ދިނުމަށް ވުލްފްސްބާގު ދޫކޮށްލައިފި

Sep 24, 2026, 8:56 AM
ވުލްފްސްބާގުން މިދިޔަ ސީޒަނުގައި ކުޅުނު މެޗެއްގެ ތެރެއިން އެރިކްސަން: އޭނާ ވަނީ އެ ކްލަބް ދޫކޮށްލައިފައި.

ވުލްފްސްބާގުން މިދިޔަ ސީޒަނުގައި ކުޅުނު މެޗެއްގެ ތެރެއިން އެރިކްސަން: އޭނާ ވަނީ އެ ކްލަބް ދޫކޮށްލައިފައި.

ކޯޕެންހާގެން، ޑެންމާކް (ސެޕްޓެމްބަރު 24) - މި ވަގުތު އާއިލާ އަށް ވަގުތު ދިނުމާއި އަމިއްލަ ސިއްހަތަށް ބަލައިގެން ކުރިއަށްދިއުމަކީ އެންމެ މުހިންމުކަން ކަމަށް ބުނެ، ޑެންމާކްގެ މިޑްފީލްޑަރު، ކްރިސްޓިއަން އެރިކްސަން، ކުޅެމުން އައި ޖަރުމަނުގެ ކްލަބް، ވުލްފްސްބާގު ދޫކޮށްލައިފި އެވެ. 

މީގެ ތިން މަސް ކުރިން، އެކުވެރިކަމުގެ މެޗެއް ކުޅެނިކޮށް، އުމުރުން 34 އަހަރުގެ އެރިކްސަން ވަނީ ދަނޑު މައްޗަށް ހޭނެތިގެން ވެއްޓިފަ އެވެ. މިއީ، 2021 ވަނަ އަހަރު އެންމެ ފުރަތަމަ މި ގޮތަށް ދިމާވި ފަހުން، މިކަން ތަކުރާރުވި ފުރަތަމަ ފަހަރެވެ. 

މިދިޔަ ސީޒަނުގައި މެންޗެސްޓާ ޔުނައިޓެޑާ އެކު އޮތް އެއްބަސްވުން ހަމަވުމުން، އެރިކްސަން، ވުލްފްސްބާގަށް ބަދަލުވީ ދެ އަހަރުގެ ކޮންޓްރެކްޓެއްގަ އެވެ. އެ އެއްބަސްވުން އަންނަ އަހަރުގެ ޖޫން މަހުގެ 30 ވަނަ ދުވަހުގެ ނިޔަލަށް އޮތް ކަމުގައި ވިޔަސް އެރިކްސަން ވަނީ އެ ކޮންޓްރެކްޓް އުވާލުމަށްޓަކައި، ވުލްފްސްބާގާ އެކު އެއްބަސްވުމަކަށް އަތުވެފަ އެވެ. 

"މިއީ، އަހަރެން އާއިލާއާ ގާތުގައި ހުންނަން ޖެހޭ ވަގުތު. އަހަރެން ވަރަށް ހިތްހަމަ ޖެހިއްޖެ، ވުލްފްސްބާގާ ވާހަަކަ ދައްކައިގެން މި ކަމުގައި ދެ ފަރާތަށް ވެސް އެންމެ ރަނގަޅު ހައްލަކަށް އާދެވުނީމަ،" ވުލްފްސްބާގަށް 34 މެޗު ކުޅެދީފައިވާ އެރިކްސަން ބުންޏެވެ. 

އެރިކްސަން ބުނީ، އުންމީދަކީ، ޖަރުމަނު ދެ ވަނަ ޑިވިޝަނުގައި މި ފަހަރު ވާދަކުރާ ވުލްފްސްބާގުން އަލުން ފުރަތަމަ ޑިވިޝަނަށް، ޖަރުމަނު ބުންޑަސްލީގާ އަށް ޕްރޮމޯޓްވާން ކުރާ މަސައްކަތް ކާމިޔާބުވުން ކަމަށެވެ. 

ޑެންމާކް ގައުމީ ޓީމަށް 154 މެޗު ކުޅެދީފައިވާ އެރިކްސަން ވަނީ ކްލަބް ކެރިއަރުގައި، އަޔަކްސް، ޓޮޓެންހަމް ހޮޓްސްޕާސް، އިންޓަ މިލާން، ބްރެންޓްފޯޑް އަދި މެންޗެސްޓާ ޔުނައިޓެޑަށް ވެސް ކުޅެފަ އެވެ. 

މީގެ ކުރިން، 2021 ވަނަ އަަހަރު ބޭއްވި ޔޫރޯ 2020 މުބާރާތުގެ ތެރެއިން، ފިންލެންޑާ ދެކޮޅަށް ކުޅުނު މެޗުގައި އެރިކްސަން ވަނީ ހިތްހުއްޓިގެން ދަނޑުމައްޗަށް ހޭނެތިގެން ވެއްޓިފަ އެވެ. އޭގެ ފަހުން، އެރިކްސަން ކުޅުމަށް އެނބުރި އައީ ޕޭސްމޭކަރެއް ލަައްވައިގެންނެވެ. މީގެ ތިން މަސް ކުރިން، ޔޫކްރެއިންއާ ދެކޮޅަށް ޑެންމާކުން ކުޅުނު މެޗުގައި އެ ޓީމުން 2-1 އިން ކުރީގައި އޮއްވައި، އެރިކްސަން ދަނޑުމައްޗަށް ވެއްޓުނީ މެޗުގެ 65 ވަނަ މިނިޓްގަ އެވެ. ވަގުުތުން ރެފްރީ މެޗު ހުއްޓާލައި، އެރިކްސަންގެ ފަރުވާގެ ކަންަކަން އަވަސްކުރި އެވެ. ދެ ޓީމުގެ ކުޅުންތެރިން އެރިކްސަން އަށް ފަރުވާ ދިނުމަށްޓަކައި ވަށްބުރެއް ހަދައި، ޖާގަ ތަނަވަސްކޮށްދިނެވެ. ފަހުން، އެރިކްސަން ވަނީ ސަލާމަތްވީ ޕޭސްމޭކަރު ރަނގަޅަށް މަސައްކަތް ކުރުމުން ކަމަށް ބުނެފަ އެވެ. 

ގިނަ ބަޔަކު އަންނަނީ އެރިކްސަން ފުޓްބޯޅައިން ރިޓަޔާކުރަން ގޮވާލައި، ޝުއޫރުފާޅުކުރަމުންނެވެ. އެ އަށް އެރިކްސަން ސީދާ ގޮތެއް ނިންމާފައިނުވި ނަމަވެސް، ވުލްފްސްބާގްްގެ ކޮންޓްރެކްޓް އުވާލުމަކީ އެރިކްސަން ފުޓްބޯޅައާ ދުރަށް ޖެހިލުމަށް ގެންގުޅޭ ވިސްނުމުގެ ފުރަތަމަ ފިޔަވަޅު ކަމަށް ރިޕޯޓްތައް ބުނެ އެވެ. 

ކޮމެންޓް

ފަހުގެ ޚަބަރު

ސިޓީ އާއި އާސެނަލަށް މޮޅެއް ނުލިބުނު، ޗެލްސީ ބަލިވެއްޖެ

އިނގިރޭސި ޕްރިމިއާ ލީގުގައި ރޭ ކުޅުނު މެޗުތަކުން މެންޗެސްޓާ ސިޓީ އާއި އާސެނަލް އެއްވަރުވިއިރު، ޗެލްސީ ވަނީ ލީޑްސް ޔުނައިޓެޑް އަތުން 4-1 އިން ބަލިވެފައި. ސިޓީ އާއި ފުލަމް ބައްދަލުކުރި މެޗު 1-1 އިން އެއްވަރުވިއިރު، އާސެނަލް އާއި ނިއުކާސަލް ބައްދަލުކުރި މެޗު ނިމުނީ 2-2 އިން އެއްވަރުވެގެން.

އޮޑިން ކޮންމެ މެޗެއްގައި ވެސް ޓީމު ވަރުގަދަކޮށްގެން ނަތީޖާ ނެރެން

ދިވެހި ޕްރިމިއާ ލީގުގައި އޮޑި ސްޕޯޓްސް ކްލަބުން ކޮންމެ މެޗަކަށް ވެސް ނުކުންނަނީ ޓީމު ވަރުގަދަކޮށް ރަނގަޅު ނަތީޖާއެއް ނެރުމުގެ އަމާޒުގައި ކަމަށް އެ ޓީމުގެ ކޯޗު ލޫޗޯ ބުނެފި. ލީގުގެ ބްރޭކުގެ ތެރޭގައި ޓީމުގެ ފިޓްނަސް އާއި ކުޅުން ރަނގަޅުކުރަން ގިނަ މަސައްކަތްތަކެއް ކޮށްފައިވާއިރު، މާދަމާ ޓީސީއާ ދެކޮޅަށް ނުކުންނާނީ މެޗުގެ ކޮންޓްރޯލް ހޯދައިގެން މޮޅުވާން

ނިއު ރޭޑިއަންޓް ބަލިކުރުން މުޅި ވިކްޓަރީ އަށް އިތުބާރަކަށްވާނެ

ދިވެހި ޕްރިމިއާ ލީގުގައި ނިއު ރޭޑިއަންޓާ ދެކޮޅަށް ކުޅޭ މެޗުން މޮޅުވުމަކީ ވިކްޓަރީގެ އިތުބާރު ބޮޑުވެ، ސަޕޯޓަރުންގެ ޝައުގުވެރިކަން އިތުރުވާނެ ކަމެއް ކަމަށް އެ ޓީމުގެ ކޯޗު މޯހަން ބުނެފި ލީގުގައި މިހާތަނަށް ބަލިނުވެ އޮތް މި ދެ ޓީމުގެ ކުރިމަތިލުމަށް ވިކްޓަރީ އޮތީ ވަރަށް ރަނގަޅަށް ތައްޔާރުވެފައި ކަމަށްވެސް އޭނާ ފާހަގަކުރި

މުޑްރިކް އާއި ޔޫކްރެއިން އެފްއޭގެ ކޯޅުމެއް

މަނާބޭހުގެ މައްސަލައެއްގައި 21 މަސް ދުވަހުގެ ސަސްޕެންޝަނެއް ފުރިހަމަކުރުމަށްފަހު، ޔޫކްރެއިންގެ މިހައިލޯ މުޑްރިކް އެ ގައުމުގެ ފުޓްބޯޅަ އެސޯސިއޭޝަނުން އިހުމާލުވި ކަމަށް ބުނެ ކުރި ތުހުމަތުތަކާ ގުޅިގެން މައްސަލަ ހޫނުވެއްޖެއެވެ. މުޑްރިކްގެ މި ވާހަކަތަކަށް ރައްދު ދެއްވަމުން ޔޫކްރެއިން އެފްއޭގެ ރައީސް އަންޑްރީ ޝެވްޗެންކޯ ވިދާޅުވީ މުޑްރިކް ހަދަނީ ދޮގު ކަމަށާއި، މިއީ އެސޯސިއޭޝަނުގެ އަގުވައްޓާލަން ކުރާ ކަމެއް ކަމަށެވެ.

ޓޮމް ބްރެޑީ ޗެލްސީގެ ހިއްސާއެއް ގަންނަނީ

އެމެރިކަން ފުޓްބޯޅަ ލެޖެންޑް ޓޮމް ބްރެޑީ، ކްލިއަލޭކް ކެޕިޓަލް މެދުވެރިކޮށް އިނގިރޭސި ކްލަބް ޗެލްސީގެ މައިނޯރިޓީ ހިއްސާއެއް ގަތުމަށް ދަނީ މަސައްކަތް ކުރަމުންނެވެ. މި އިންވެސްޓްމަންޓާއެކު އޭނާއަށް ވޯޓުލުމުގެ ހައްގު ނުލިބުނު ނަމަވެސް، ކުރިއަށް އޮތް ތަނުގައި ކްލަބުގެ ބޯޑުން ފުރުސަތު ލިބުމުގެ ފުރުސަތު އެބައޮތެވެ. ބްރެޑީ މި ފިޔަވަޅު އަޅަނީ ބާމިންހަމް ސިޓީގައި އޮތް އޭނާގެ ހިއްސާ ދޫކޮށްލުމަށްފަހުއެވެ.

ބަޔާން އެއްވަރުވި މެޗުގައި ކޭން އަށް ސީރިއަސް އަނިޔާއެއް

ޖަރުމަނު ލީގުގައި ކޮލޯންއާ ދެކޮޅަށް ކުޅުނު މެޗުގައި ބަޔާން މިއުނިކްގެ ފޯވާޑް ހެރީ ކޭންގެ ކުޑަހުޅަށް ލިބުނު ސީރިއަސް އަނިޔާއަކާ ގުޅިގެން، ތިން މަސް ދުވަހަށް އޭނާ ކުޅުމާ ދުރުގައި ހުންނަން ޖެހިއްޖެ. ބަޔާން މި މެޗުން 1-1 އިން އެއްވަރުވިއިރު، މި ނަތީޖާއާއެކު ލީގުގެ އެއްވަނަ މަގާމު ގެއްލުމުގެ ބިރު އެ ޓީމަށް ވަނީ ކުރިމަތިވެފައި

ސްޕެއިން ކައިރިން ބަދަލުހިފަން ޒިދާން ބޭނުމެއް ނޫން

ނޭޝަންސް ލީގުގެ ކުއާޓާ ފައިނަލުގައި ސްޕެއިނާ ދެކޮޅަށް ނުކުންނައިރު، ފްރާންސްގެ އަމާޒަކީ ވޯލްޑް ކަޕްގެ ބަލިވުމުގެ ބަދަލުހިފުމުގެ ބަދަލުގައި މުބާރާތުގެ ތަށި ހޯދުން ކަމަށް ކޯޗު ޒިދާން ބުނެފި. ޒިދާން ފާހަގަކުރި ގޮތުގައި މިއީ އާ މުބާރާތެއް ކަމަށާއި، އަންނަ މާޗް މަހު އޮންނަ މި މެޗުތަކަށް ޓީމު އޮތީ ވަރުގަދަ އަމާޒެއްގައި

Newsletter

Get the latest news delivered straight to your inbox