ބާސެލޯނާ (ސެޕްޓެމްބަރު 17) - ސްޕެނިޝް ލީގުގައި ރޭ ރޭސިން ޑި ސަންޓަންޑޭ 7-2 އިން ބަލިކޮށް ބާސެލޯނާ އިން ލީގު ތާވަލުގެ އެއް ވަނައިގައި ތިން ޕޮއިންޓުގެ ލީޑު ދަމަހައްޓައިފި އެވެ.
އެންމެ ފަހުގެ ޗެމްޕިއަން، ބާސެލޯނާ އަކީ ސްޕެނިޝް ލީގުގެ އާ ސީޒަނުގައި ކުޅުނު ހަ މެޗުން ވެސް މޮޅުވެ، ސައްތަ އިން ސައްތަ ރެކޯޑަކާ އެކު އޮތް ހަމައެކަނި ޓީމެވެ. ބާސެލޯނާ އަށް ހަ މެޗުން 18 ޕޮއިންޓް ލިބިފައިވާއިރު، ދެ ވަނައިގައި އޮތް ވާދަވެރި ރެއާލް މެޑްރިޑްގެ އޮތީ ހަ މެޗުން 15 ޕޮއިންޓެވެ. ހޯސޭ މޮރީނިއޯގެ ކޯޗުކަމުގައި ކުޅޭ ރެއާލް ވަނީ މި ފަހަރުގެ ލީގުގައި ރެއާލް ބެޓިސް އަތުން ބަލިވެފަ އެވެ.
ބާސެލޯނާގެ ދަނޑު ކޭމްޕް ނައުގައި ރޭ ކުޅުނު މެޗުގައި، އަށް ވަނަ މިނިޓްގައި ބާސެލޯނާ އިން ލީޑުނެގި އެވެ. މިއީ، މެޗުގެ އަށް ވަނަ މިނިޓްގައި އޭރިއާބޭރުން ޖޮއާއޯ ކަންސެލޯ ފޮނުވާލި ޝޮޓަކުން ޖެހި ގޯލެކެވެ. ބާސެލޯނާ އިން ލީޑުފުޅާކުރީ މެޗުގެ 25 ވަނަ މިނިޓްގައި ރަފީނިއާ ޕެނަލްޓީ އަކުން ޖެހި ގޯލެކެވެ. އޭގެ ފަސް މިނިޓް ފަހުން، ރޭސިންގެ މަގެޓަ ގޭއި ވަނީ ބާސެލޯނާ އޭރިއާތެރެއިން ލިބުނު ފުރުސަތެއްގައި ލަނޑު ޖަހައިފަ އެެވެ.
ރޭސިން އިން ފަރަގު ކުރިތާ ފަސް މިނިޓް ތެރޭ ބާސެލޯނާ އިން އިތުރު ލަނޑެއް ޖަހައި އަލުން ދެ ގޯލުގެ ލީޑެއް ނެގި އެެވެ. މިއީ، މެޗުގެ 35 ވަނަ މިނިޓްގައި ކަންސެލޯ، މި ފަހަރު ވެސް އޭރިއާބޭރުން ޖެހި ޝޮޓަކުން ކާމިޔާބުކުރި ގޯލެކެވެ. އަދި، މެޗުގެ 41 ވަނަ މިނިޓްގައި ރޭސިންގެ އޭރިއާތެރެއިން، ރަފީނިއާ ވަނީ ލިބުނު ފުރުސަތެއްގައި ގޯލުގެ ތިރީ ކަނަށް ބޯޅަ ފޮނުވާލައި، ބާސެލޯނާ އަށް ތިން ގޯލުގެ ލީޑެއް ނަގައިދީފަ އެވެ.
ފުރަތަމަ ހާފުގެ އިތުރު ވަގުތުގެ ތެރޭގައި ބާސެލޯނާ އިން ފަސް ވަނަ ލަނޑެއް ޖަހަން ލިބުނު ފުރުސަތެއްގައި ލަމީން ޔަމާލް ފޮނުވާލި ޕެނަލްޓީ ރޭސިންގެ ކީޕަރު، ޖުލެން އަގިރެއްޒަބަލާ ވަނީ މަތަކޮށްފަ އެވެ.
މެޗުގެ 65 ވަނަ މިނިޓްގައި ރޭސިން އިން ދެ ވަނަ ލަނޑު ޖެހި އެވެ. މިއީ، ދެ ވަނަ ހާފުގައި ބާސެލޯނާ އިން ބަަދަލަކަށް އެރުވި ކީޕަރު، ވޮޒްޝިއޭ ޝެޒްނީ އަށް ހެދުނު ގޯހެއްގެ ފައިދާނަގައި، ރޭސިންގެ ޔާސިރު ޒަބީރީ ޖެހި ލަނޑެކެވެ.
ބާސެލޯނާ އިން ފަސް ވަނަ ލަނޑު ޕެނަލްޓީ އަކުން ކާމިޔާބުކޮށް ރަފީނިއާ ވަނީ ހެޓްރިކް ހަދައިފައެވެ. މިއާ އެކު، ރަފީނިއާ މި ވަނީ މި ފަހަރުގެ ލީގު ސީޒަންގެ ފުރަތަމަ ހަ މެޗުން ނުވަ ލަނޑު ޖަހައިފަ އެވެ. އަދި، މި ސީޒަނުގެ ޖުމްލަ އަށް ބަލާނަމަ، ހުރިހާ މުބާރާތެއްގައި 11 ލަނޑު ޖަހާފައިވެ އެެވެ.
މެޗުގެ 78 ވަނަ މިނިޓްގައި، ޔަމާލް ދިން ބޯޅައަކުން ބާސެލޯނާގެ ހަ ވަނަ ލަނޑު ޖެހީ، ދެ ވަނަ ހާފުގައި ބަދަލަކަށް ކުޅެން އެރި ގަބްރިއެލް ޖީސޫސް އެވެ. މިއީ، އާސެނަލް ދޫކޮށް ބާސެލޯނާ އަށް ބަދަލުވި ފަހުން ޖީސޫސް ޖެހި ދެ ވަނަ ލަނޑެވެ.
ބާސެލޯނާގެ ހަތް ވަނަ ލަނޑު ޖެހީ ޔަމާލް އެވެ. މިއީ، މެޗުގައި މޮޅު ކުޅުމެއް ދެއްކި ކަރީމް އަޑެޔޭމީ ދިން ބޯޅައަކުން ޔަމާލް ޖެހި ގޯލެކެވެ.
