ފްރާންސްގެ އުތުރުގައި ފަސިންޖަރުން އުފުލާ ރޭލެއް ދަގަނޑުން ކަހާލައި ހިނގި ހާދިސާއެއްގައި، މަދުވެގެން 44 މީހަކަށް އެކިވަރުގެ އަނިޔާވެފައިވާ ކަމަށް އެ ގައުމުގެ އޮފިޝަލުން ބުނެފި އެވެ. އަނިޔާވި މީހުންގެ ތެރެއިން އެކެއްގެ ހާލު ސީރިއަސް ކަމަށް ރިޕޯޓުތައް ބުނެ އެވެ.
މި ހާދިސާގައި ސީރިއަސް އަނިޔާތަކެއް ލިބުނު އުމުރުން 18 އަހަރުގެ އަންހެނަކު، އިތުރު ފަރުވާއަށް ހެލިކޮޕްޓަރުގައި ވަނީ ހޮސްޕިޓަލަށް ގެންގޮސްފަ އެވެ.
ފްރާންސްގެ ޓްރާންސްޕޯޓް މިނިސްޓަރު ފިލިޕް ޓަބަރޯޓް ވިދާޅުވި ގޮތުގައި، ނޯމަންޑީ ސަރަހައްދުގެ ރޫއަން އާއި ކޭންއާ ދެމެދު ދަތުރުކުރި މި ރޭލުގައި ހާދިސާ ހިނގިއިރު 180 ފަސިންޖަރުން ތިއްބެވެ.
މިނިސްޓަރު އިތުރަށް ވިދާޅުވީ، ހުކުރު ދުވަހުގެ އިރުއޮއްސުނު ވަގުތު ރޫއަންގެ ދެކުނުން އޮންނަ ކްލިއޯން ކޮމިއުން ކައިރީގައި ހިނގި މި އެކްސިޑެންޓާ ގުޅިގެން، ފަޔާ ފައިޓަރުންނާއި ކުއްލި ހާލަތްތަކުގައި ހަރަކާތްތެރިވާ ޓީމުތައް ހިމެނޭހެން ޖުމްލަ 140 މީހުން އެ ސަރަހައްދުގައި ހަރަކާތްތެރިވަމުންދާ ކަމަށެވެ.
ރޭލު ދަގަނޑުމަތިން ކައްސާލަން މެދުވެރިވި ސަބަބެއް މިހާތަނަށް ސާފުވެފައެއް ނުވެ އެވެ.
މި ހާދިސާއަށްފަހު އާންމުވި ފޮޓޯތަކުން ފެންނަ ގޮތުގައި، އެކްސިޑެންޓުވި ރޭލުން ފަސިންޖަރުން ދިޔައީ ފައިބަމުންނެވެ. ފްރާންސްގެ މީޑިއާތަކުން ރިޕޯޓުކޮށްފައިވާ ގޮތުގައި، މި ހާދިސާގައި ރޭލުގެ ތިން ބައި ވަނީ ފުރޮޅާލައިފަ އެވެ.
ފްރާންސްގެ ދައުލަތުގެ ރޭލު ކުންފުނި، އެސްއެންސީއެފް އިން ބުނީ މި ހާދިސާގެ ސަބަބުން އެ ސަރަހައްދުގެ ރޭލު ދަތުރުތަކަށް ބޮޑެތި ބުރޫތަކެއް އަރާފައިވާ ކަމަށެވެ. އަދި ރޭލުގެ ބަދަލުގައި ފަސިންޖަރުން އުފުލުމަށް ބަސްތައް ހަމަޖައްސައިދޭނެ ކަމަށް ވެސް އެ ކުންފުނިން ބުނެފައިވެ އެވެ.
