ބުރާސްފަތި ދުވަހު ބާއްވާ އިންޖިނިއަރިން އެވޯޑުގައި ހައުސިން މިނިސްޓަރު އަބްދުﷲ މުއްތަލިބު ލައްވައި ރައީސް މުހައްމަދު މުއިއްޒަށް އެވޯޑެއް އެރުވުމަށް ހަމަޖެހިފައިވާކަން އެނގިއްޖެ އެވެ.
އަދަދު އަށް އެނގިފައިވާ ގޮތުގައި މުއިއްޒަށް މި އެވޯޑު އެރުވުމަށް ހަމަޖެހިފައިވަނީ އިންޖިނިއަރިން ދާއިރާއަށް އެމަނިކުފާނު ކޮށްދެއްވާފައިވާ ހިދުމަތްތަކުގެ އަގުވަޒަން ކުރުމުގެ ގޮތުން ކަމަށް ބުނެ އެވެ.
ކޮންމެ އަހަރެއްގެ އޮގަސްޓް 30، ވަނަ ދުވަހަކީ ގައުމީ ފެންވަރުގައި ފާހަގަކުރާ އިންޖިނިއަރުންގެ ދުވަސް ކަމަށް މުއިއްޒު ކަނޑައެޅުއްވީ މިދިޔަ އަހަރު އެވެ. އޭގެއިތުރުން ކޮންމެ އަހަރަކު އިންޖިނިއަރުންގެ އެވޯޑު ބާއްވަން ވެސް ނިންމެވީ މުއިއްޒު އެވެ.
މިކަމާ ގުޅިގެން ރައީސް އޮފީހާއި ހައުސިން މިނިސްޓްރީއާ ސުވާލުކުރުމުން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.
ބުރާސްފަތި ދުވަހު ބާއްވާ އިންޖިނިއަރިން އެވޯޑުގައި މޯލްޑިވްސް ޕޮލިޓެކްނިކްގެ ދަރިވަރަކު ދޭ ސްޕީޗުގައި ކުރީގެ ރައީސް އިބްރާހިމް ނާސިރު އާއި ކުރީގެ ރައީސް މައުމޫން އަބްދުލްގައްޔޫމް އަދި އަލްއަމީރު މުހައްމަދު ފަރީދު ދީދީގެ ނަން ހިމެނުމުން އެ ނަންތައް އުނިކޮށް، ސްޕީޗުގައި ހަމައެކަނި މުއިއްޒުގެ ނަން ހިމަނަން ހައުސިން މިނިސްޓްރީން ވަނީ އަންގާފަ އެވެ.
ހައުސިން މިނިސްޓްރީން ބާއްވާ އިންޖިނިއާސް އެވޯޑް ބޭއްވުމަށް ހަމަޖެހިފައިވަނީ "ހޮނަރިން އެކްސެލެންސް، މޭކިން ހިސްޓްރީ" ތީމްގެ ދަށުންނެވެ. މި އެވޯޑް ހަފްލާގައި 10 ދާއިރާއަކުން އެވޯޑް ދިނުމަށް ވަނީ ހަމަޖެހިފަ އެވެ.
މި އަހަރުގެ އިންޖިނިއަރުންގެ ދުވަސް ފާހަގަކުރަމުންދާއިރު، އިންޖިނިއަރިން ދާއިރާއަށް މުއިއްޒު ކޮށްދެއްވި ހިދުމަތްތަކަށް ޕީއެސްއެމްގެ އިތުރުން ސަރުކާރަށް ސަނާކިޔާ މީޑިއާތަކުން ދަނީ ތައުރީފްކޮށް އެކި ކަންކަން ކުރަމުންނެވެ. އޭގެއިތުރުން ރައީސް އޮފީހުން ވަނީ މުއިއްޒު ކޮށްދެއްވި ހިދުމަތަށް ހާއްސަކޮށް ޕްރޮމޯޝަނަލް ވީޑިއޯއެއްވެސް ހަދާފަ އެވެ.
