ހުރިހާ ދިވެހި ރައްޔިތުންގެ ހިއްސާ އޮންނަ ގޮތަށް ސަރުކާރުން ތަރައްގީކުރާނެ ކަމަށް ބުނެފައިވާ ޓޫރިސްޓު ރިސޯޓުތަކުގެ ތެރެއިން ބައެއް ރިސޯޓުތަކުގެ މަސައްކަތް އަންނަ ނޮވެމްބަރުގައި ފަށާނެ ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.
ދިވެހިން ހިއްސާވާ ރިސޯޓުތަކަކީ މި އަހަރުގެ ރިޔާސީ ބަޔާން އިއްވަވަމުން މުއިއްޒު އިއުލާންކުރެއްވި ކަމެކެވެ. އެ ދުވަހު އެމަނިކުފާނު ވިދާޅުވީ 10 ރިސޯޓެއް ތަރައްގީކޮށް، ރާއްޖޭގެ ކޮންމެ ރައްޔިތަކަށް ބޭރު ފައިސާ ޖަމާކޮށްދޭނެ ކަމަށެވެ.
މި މަސައްކަތް ކުރިއަށް ގޮސްފައިވާ ގޮތުގައި އަދާހަމަ ހިއްސާކުރައްވަމުން ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި މުއިއްޒު ވިދާޅުވީ މި ހަފުތާގެ ތެރޭގައި ރިސޯޓުތައް ތަރައްގީކުރަން ބޭނުންވާ ތަންތަން ކަނޑައަޅާ ނިމޭނެ ކަމަށެވެ.
"އަޅުގަނޑުމެން މިހާރު 10 ރިސޯޓު ގާއިމުކުރުމަށް މާލެ އަތޮޅާއި އެކި އަތޮޅުތަކުން ބިންތަކާއި ފަޅުތަކާއި ރަށްތައް ކަނޑައަޅާ ނިމި، މި ހަފުތާ ތެރޭގައި ނިމި، ދެން އަޅުގަނޑުމެން އޭގެ ދެން ހުރި މަސައްކަތްތަކަށް ގޮސް، އިރާދަކުރެއްވިއްޔާ ހަމަ އުއްމީދަކީ ހަމަ ނޮވެމްބަރު މަހުގެ ތެރޭގައި އަޅުގަނޑުމެންނަށް މީގެ ބައެއް މަޝްރޫއުތައް ފެށިގެންދާނެ،"
މުއިއްޒު ވަނީ ކުރިން ވެސް ވިދާޅުވި ގޮތަށް ތިން އަހަރު ނުވަތަ 36 މަސް ދުވަހުގެ ތެރޭގައި މި ރިސޯޓުތަކުގެ މަސައްކަތް ނިމޭނެ ކަމަށް ވިދާޅުވެފަ އެވެ. އަދި، މި ޕްރޮޖެކްޓުގެ މަސައްކަތް ބާރަށް ކުރިއަށްދާ ކަމަށް އެމަނިކުފާނު ވިދާޅުވި އެވެ.
ރިސޯޓުތަކެއް ތަރައްގީކޮށް، ރައްޔިތުންނަށް ހިއްސާ ބަހައި، ޑޮލަރުން ފައިސާ ބަހަން މުއިއްޒު ވައުދުވެވަޑައިގެންފި
"އަންދާޒާ ކުރެވެނީ މި އިންވެސްޓްމަންޓުން ދިވެހި ރައްޔިތުންގެ އެކައުންޓަށް ފައިސާ ޖަމާވާން ފަށާނީ 2030 ވަނަ އަހަރުން ފެށިގެން ކަމަށް. ހިސާބު ހަދާލާއިރު އެވްރެޖްކޮށް ކޮންމެ ރައްޔިތެއްގެ އެކައުންޓަށް އިރާދަކުރެއްވިއްޔާ އަހަރަކު މަދުވެގެން 400 ޑޮލަރު ޖަމާވެގެންދާނެ."
މި ރިސޯޓުތަކުގެ އަދާހަމަ ހިއްސާކުރައްވަމުން މުއިއްޒު ވަނީ، މިއީ ނުވާނެ ކަމެއްކަމަށް ބުނެ މި ކަމަށް ފާޑުކިޔާ މީހުންނަށް ވެސް ރައްދެއް ދެއްވާފަ އެވެ. އަދި، ވިދާޅުވީ މި ކަމުގެ އަދާހަމަ ހިއްސާކުރެއްވީ ވެސް އެއީ ހަމަ ދެއްކި ވާހަކައެއް ނޫން ކަން ދަންނަވާލުމުގެ ގޮތުން ކަމަށެވެ.
"މި ޕްރޮޖެކްޓު ވެސް ވަރަށް ބާރަށް ހިނގާ ވާހަކަ ދަންނަވާލީ، އަޅުގަނޑު ހަމަ ރިޔާސީ ބަޔާނުގައި ހަމަ ޖުމްލައެއް ގޮތުގައި އިއުލާންކޮށްލި ކަމެއް ނޫން ކަން ދަންނަވާލުމުގެ ގޮތުން،" މުއިއްޒު ވިދާޅުވި އެވެ.
ދިވެހިން ހިއްސާވާ ރިސޯޓުތަކުގެ މަސައްކަތް ކުރިއަށްދާ ކަމަށް ސަރުކާރުން ބުނިއިރު، މި ކަމަށް ހަރަދު ކުރާނެ ގޮތެއް ނޫނީ އެ ހަރަދު ކުރާ ފައިސާ ހޯދާނެ ގޮތެއް ސަރުކާރަކުން އަދި ނުބުނެ އެވެ.
ރާއްޖޭގެ މަޝްހޫރު ޓްރެވަލް އެޖެންސީއެއް ކަމުގައި ރިސޯޓު ލައިފުން އަންދާޒާ ކުރާ ގޮތުގައި، 100 އެނދުގެ ޕްރީމިއަމް ނުވަތަ ހަތަރު ތަރީގެ ރިސޯޓެއް ތަރައްގީކުރަން މަދުވެގެން 40 މިލިއަން ޑޮލަރު ހަރަދު ވާނެ އެވެ. މިހެންކަމުން މި ރޭންޖުގެ 10 ރިސޯޓު ތަރައްގީކުރަން މަދުވެގެން 400 މިލިއަން ޑޮލަރު ބޭނުން ވާނެ އެވެ.
